ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມທົບທວນ ການຈັດຕັ້ງປະຕິບັດໂຄງການ LCT

ນະຄອນຫຼວງວຽງຈັນ, ວັນທີ 23 ພະຈິກ 2020, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມທົບທວນການຈັດຕັ້ງປະຕິບັດ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT) ຂຶ້ນ ເພື່ອທົບທວນວຽກງານໂຄງການພາຍໃນ 6 ເດືອນທີ່ຜ່ານມາທີ່ໂຮງແຮມ ຄຣາວ ພຣາຊາ. ກອງປະຊຸມໄດ້ໃຫ້ກຽດເປັນປະທານໂດຍ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ. ກອງປະຊຸມດັ່ງກ່າວໄດ້ໃຫ້ກຽດເຂົ້າຮ່ວມໂດຍບັນດາຜູ້ຕາງໜ້າຈາກກະຊວງ ແລະ ກົມກອງທີ່ກ່ຽວຂ້ອງ, ກໍຄື ພາກສ່ວນຈັດຕັ້ງປະຕິບັດໂຄງການ, ບັນດາຜູ້ໃຫ້ທຶນ ແລະ ຄູ່ຮ່ວມພັດທະນາ ລວມທັງໝົດເກືອບ 90 ທ່ານ.
ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າໄດ້ກ່າວເປີດກອງປະຊຸມວ່າ: “ເຖິງວ່າຈະໄດ້ຮັບຜົນກະທົບຈາກການລະບາດຂອງພະຍາດ ໂຄວິດ-19 ກໍຕາມ, ໂຄງການດັ່ງກ່າວກໍສາມາດບັນລຸໝາກຜົນເບື້ອງຕົ້ນທີ່ສໍາຄັນຈໍານວນໜຶ່ງໄດ້. ໃນກອງປະຊຸມມື້ນີ້, ພວກເຮົາຈະໄດ້ປຶກສາຫາລືສິ່ງທ້າທາຍ, ບັນຫາທີ່ຍັງຄົງຄ້າງ ແລະ ຊອກຫາວິທີແກ້ໄຂໃຫ້ທັນກັບເວລາ ເພື່ອຮັບປະກັນການບັນລຸເປົ້າໝາຍລວມ ແລະ ເປົ້າໝາຍສະເພາະຂອງໂຄງການ”.

ຫຼັງຈາກນັ້ນ, ຜູ້ຕາງໜ້າຈາກພາກສ່ວນ ຈັດຕັ້ງປະຕິບັດໂຄງການໄດ້ນໍາສະເໜີຄວາມຄືບໜ້າ ຂອງວຽກງານຂອງຕົນຕາມວາລະກອງປະຊຸມ, ເຊິ່ງເລີ່ມຈາກເສົາຄໍ້າ ກ ຜູ້ລາຍງານກ່ຽວກັບຄວາມຄືບໜ້າການຈັດຕັ້ງປະຕິບັດ ໂຄງການທີ່ຕິດພັນກັບການປັບປຸງ ສະພາບແວດລ້ອມການດໍາເນີນທຸລະກິດໃຫ້ງ່າຍ ແລະ ສະດວກສະບາຍຍິ່ງຂຶ້ນ, ເຊິ່ງໄດ້ລວມເອົາການເຊື່ອມສານ ແລະ ການອອກໃບອະຍາດການດໍາເນີນທຸລະກິດ ແລະ ການສະໜັບສະໜູນການປັບປຸງການດໍາເນີນທຸລະກິດຂ້າມຊາຍແດນ. ຫຼັງຈາກນັ້ນ, ພາກສ່ວນຈັດຕັ້ງປະຕິບັດໃນເສົາຄໍ້າ ຂ ໄດ້ນໍາສະເໜີກ່ຽວກັບຄວາມຄືບໜ້າໃນການສະໜັບສະໜູນ ກອງເລຂາການອໍານວຍຄວາມສະດວກ ດ້ານການຄ້າແຫ່ງຊາດ, ແລະ ທຶນສົມທົບຍ່ອຍເພື່ອສົ່ງເສີມການຄ້າ.

ໃນພາກບ່າຍຂອງກອງປະຊຸມ, ຜູ້ຕາງໜ້າຈາກເສົາຄໍ້າ ຄ ໄດ້ນໍາສະເໜີຄວາມຄືບໜ້າໃນການຈັດຕັ້ງປະຕິບັດ ທຶນສົມທົບເພື່ອສົ່ງເສີມທຸລະກິດໄລຍະ II, ເຊິ່ງນອນຢູ່ໃນເປົ້າໝາຍຂອງເສົາຄໍ້າ ຄ, ກໍຄື ການປັບປຸງຄວາມສາມາດໃນການແຂ່ງຂັນໃຫ້ພາກທຸລະກິດ. ຫຼັງຈາກນັ້ນ, ຜູ້ຕາງໜ້າຈາກເສົາຄໍ້າ ງ ໄດ້ສະຫຼຸບຫຍໍ້ກ່ຽວກັບການຈັດຕັ້ງປະຕິບັດ ກ່ຽວກັບການສະໜັບສະໜູນເພື່ອປັບປຸງການສ້າງນະໂຍບາຍທີ່ແທດເໝາະ ແລະ ມີສ່ວນຮ່ວມ, ໂດຍສະເພາະແມ່ນການສະໜັບສະໜູນການປຶກສາຫາລືລະຫວ່າງພາກລັດ ແລະ ພາກທຸລະກິດ. ສຸດທ້າຍ, ຫົວໜ້າພະແນກ ຄຸ້ມຄອງການຈັດຕັ້ງປະຕິບັດໂຄງການ ຊ່ວຍເຫຼືອຕ່າງປະເທດ ໄດ້ນໍາສະຫຼຸບຜົນສໍາເລັດໝາກຜົນສໍາເລັດເບື້ອງຕົ້ນ ແລະ ບຸລິມະສິດຂອງແຕ່ລະເສົາຄໍ້າຂອງໂຄງການ. ໃນລະຫວ່າງກອງປະຊຸມ, ຜູ້ເຂົ້າຮ່ວມໄດ້ມີໂອກາດປະກອບສ່ວນຖາມຕອບ ແລະ ປຶກສາຫາລືກ່ຽວກັບສິ່ງທ້າທາຍ ແລະ ແຜນຈັດຕັ້ງປະຕິບັດໃນຕໍ່ໜ້າ.

ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນ ຂອງພາກທຸລະກິດ.