ກອງປະຊຸມ ປຶກສາຫາລື ຄົ້ນຄ້ວາສັງລວມ ບັນຫາໃນຂົງເຂດ ການທ່ອງທ່ຽວ ແລະ ກະສິກໍາ

ວັນທີ 14 – 15 ກໍລະກົດ 2021, ທີ່ ເມືອງປາກເຊ ແຂວງຈໍາປາສັກ. ສະພາການຄ້າ ແລະ ອຸດສາຫະກຳ ແຂວງຈໍາປາສັກ ໂດຍຮ່ວມມືກັບ ສະພາການຄ້າ ແລະ ອຸດສາຫະກໍາແຫ່ງຊາດລາວ, ພາຍໃຕ້ການສະໜັບສະໜູນຂອງໂຄງການສ້າງສະພາບແວດລ້ອມທີ່ເອື້ອອຳນວນຕໍ່ທຸລະກິດລາວ, ໄດ້ຈັດກອງປະຊຸມກອງປະຊຸມ ປຶກສາຫາລື ຄົ້ນຄ້ວາສັງລວມ ບັນຫາໃນຂົງເຂດການທ່ອງທ່ຽວ ແລະ ກະສິກໍາ. ຈຸດປະສົງຂອງກອງປະຊຸມແມ່ນເພື່ອເປັນເວທີເປີດກວ້າງສໍາລັບສະມາຊິກ ແລະ ຕົວແທນຈາກຫົວໜ່ວຍທຸລະກິດໃນຂະແໜງການດັ່ງກ່າວເຂົ້າຮ່ວມປຶກສາຫາລື, ກໍານົດບັນຫາບູລິມະສິດຂອງຂະແໜງການ ແລະ ວິທີແກ້ໄຂເພື່ອສະເໜີໃຫ້ບັນດາກະຊວງ ແລະ ກົມທີ່ກ່ຽວຂ້ອງເພື່ອພິຈາລະນາ.

ກອງປະຊຸມດັ່ງກ່າວແມ່ນໄດ້ຮັບກຽດເປັນປະທານຮ່ວມໂດຍ ທ່ານ ນາງ ບຸນເຮືອງ ແຄຣໍ ລິດດັງ, ປະທານ ສະພາການຄ້າ ແລະ ອຸດສາຫະກໍາ ແຂວງຈໍາປາສັກ ແລະ ທ່ານ ພູໄຊ ເທບພະວົງ, ເລຂາທິການສະພາ ການຄ້າ ແລະ ອຸດສາຫະກຳແຫ່ງຊາດລາວ. ນອກນັ້ນ, ຍັງມີບັນດາຜູ້ເຂົ້າຮ່ວມກໍຄື ຕາງໜ້າຈາກສະມາຄົມທຸລະກິດທ່ອງທ່ຽວ, ສະມາຄົມໂຮງແຮມ ແລະ ຮ້ານອາຫານ, ສະມາຄົມໄກ໋ນໍາທ່ຽວ, ກຸ່ມຂົນສົ່ງ ແລະ ເຮືອ, ສະມາຄົມແຫຼ່ງທ່ອງທ່ຽວ ແລະ ສະມາຄົມກາເຟ ແລະ ບັນດາທຸລະກິດທີ່ຕິດພັນກັບກາເຟ ພາຍໃນແຂວງຈໍາປາສັກ.

ທ່ານ ນາງ ບຸນເຮືອງ ແຄຣໍ ລິດດັງ, ປະທານ ສະພາການຄ້າ ແລະ ອຸດສາຫະກໍາ ແຂວງຈໍາປາສັກ ໄດ້ກ່າວເປີດກອງປະຊຸມ ໂດຍເນັ້ນໜັກເຖິງຄວາມສໍາຄັນຂອງກອງປະຊຸມພາກທຸລະກິດ ແລະ ຮຽກຮ້ອງໃຫ້ພາກທຸລະກິດທີ່ເຂົ້າຮ່ວມໃນກອງ ປະຊຸມຄັ້ງນີ້ເພື່ອແລກປ່ຽນສົນທະນາຢ່າງກົງໄປກົງມາ, ໝູນໃຊ້ເວທີນີ້ໃນການສະເໜີບັນຫາຂໍ້ຫຍຸ້ງຍາກຕ່າງໆທີ່ເປັນອຸປະສັກແກ່ການດໍາເນີນທຸລະກິດ ໂດຍສະເພາະແມ່ນບັນຫາທີ່ຕິດພັນກັບນະໂຍບາຍລັດຖະບານ, ລະບຽບການ ແລະ ກົດໝາຍຕ່າງໆ.

ທ່ານ ພູໄຊ ເທບພະວົງ ເລຂາທິການສະພາອຸດສາຫະກໍາແຫ່ງຊາດລາວ ຍັງໄດ້ກ່າວຕື່ມອີກວ່າ: ກອງປະຊຸມພາກທຸລະກິດເປັນໜຶ່ງອົງປະກອບສໍາຄັນຂອງກົນໄກການປຶກສາຫາລື ລະຫວ່າງພາກລັດ ແລະ ພາກເອກະຊົນ (LPPD) ເພື່ອພາກທຸລະກິດໄດ້ກໍານົດບັນຫາທີ່ເປັນບູລິມະສິດ, ຄົ້ນຄວ້າ-ວິເຄາະ ແລະ ຮ່າງບົດສະເໜິີບັນຫາເພື່ອກະກຽມໃຫ້ແກ່ກອງປະຊຸມປຶກສາຫາລືວິຊາການລະຫວ່າງພາກລັດ ແລະ ພາກທຸລະກິດທີ່ມີແຜນຈະຈັດໃນ ເດືອນສິງຫາ 2021 ນີ້.

ຫຼາຍບັນຫາໄດ້ຖືກຍົກຂື້ນໃນກອງປະຊຸມຂອງທັງສອງຂະແໜງການ ລວມມີ: ການເຂົ້າເຖິງແຫຼ່ງທຶນກູ້ຢືມທີມີເງື່ອນໄຂສູງ, ລະບຽບ ແລະ ກົດໝາຍທີ່ຍັງບໍ່ສອດຄ່ອງຢູ່ຂັ້ນແຂວງ, ການເກັບຄ່າທໍານຽມທີ່ສູງ ແລະ ຊໍ້າຊ້ອນ ລວມທັງບັນຫາຂາດແຮງງານທີ່ມີທັກສະໃນຂະແໜງກະສິກໍາ. ບັນຫາທີ່ຖືກຍົກຂຶ້ນເຫັນວ່າຈະເປັນບັນຫາທີ່ຕິດພັນກັບຜົນກະທົບຈາກການລະບາດຂອງພະຍາດ COVID-19 ແລະ ມາດຕະການປິດປະເທດ.
ພາກທຸລະກິດໃນຂະແໜງການທ່ອງທ່ຽວຍັງໄດ້ສະເໜີໃຫ້ຊຸກຍູ້ການສັກວັກຊີນໃຫ້ແກ່ປະຊາຊົນ ເພື່ອໃຫ້ ສປປ ລາວ ສາມາດເປີດດ່ານ ແລະ ເປີດປະເທດໄດ້ໂດຍໄວ, ຊ່ວຍໃຫ້ຂະແໜງການທ່ອງທ່ຽວສາມາດກັບມາດໍາເນີນທຸລະກິດໄດ້ຢ່າງປົກກະຕິ. ສໍາລັບຂະແໜງກາເຟເຫັນວ່າ ການຂົນສົ່ງຂ້າມແດນຍັງເປັນບັນຫາທ້າທ້າຍຕໍ່ການສົ່ງອອກ, ການສືບຕໍ່ມາດຕະການປິດປະເທດເຮັດໃຫ້ລາຄາການຂົນສົ່ງສູງຂຶ້ນ.

ໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວຈະສືບຕໍ່ໃຫ້ການສະໜັບສະໜຸນກົນໄກການປຶກສາຫາລືພາກລັກ-ທຸລະກິດ ຢູ່ແຂວງຈໍາປາສັກ, ເພື່ອຮັບປະກັນບັນຫາຂອງພາກທຸລະກິດຂັ້ນແຂວງໄດ້ຮັບການແກ້ໄຂຢ່າງເປັນຮູບປະທໍາ, ເຮັດໃຫ້ສະພາບແວດລ້ອມໃນການດໍາເນີນທຸລະກິດດີຂື້ນ.

ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.

ສໍາລັບຂໍ້ມູນເພີ່ມຕື່ມ ກະລຸນາຕິດຕໍ່:
ໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ
ນ. ສາຍສະໝອນ ສຣິດທິຣາດ, ຜູ້ຮັບພິດຊອບວຽກງານການສືສານໂຄງການ
E: ssrithirath@ibi-worldwide.com | www.ibi-worldwide.com
T: +856 20 5632 4964