ພິທີເປີດນຳໃຊ້ກາໝາຍສິນຄ້າ ໜຶ່ງເມືອງໜຶ່ງຜະລິດຕະພັນ (ODOP) ແຫ່ງຊາດ ເພື່ອສົ່ງເສີມຜະລິດຕະພັນ ທີ່ເປັນເອກະລັກສະເພາະ ຈາກແຂວງ ຫຼວງນຳ້ທາ
ແຂວງຫຼວງນໍ້າທາ, ໃນລະຫວ່າງວັນທີ 15 – 16 ມີນາ 2022, ພະແນກອຸດສາຫະກໍາ ແລະ ການຄ້າ ແຂວງຫຼວງນໍ້າທາ ໄດ້ຈັດພິທີເປີດນຳໃຊ້ກາໝາຍສິນຄ້າ ໜຶ່ງເມືອງໜຶ່ງຜະລິດຕະພັນ (ODOP) ແຫ່ງຊາດ ຢູ່ເມືອງຫຼວງນໍ້າທາ ແລະ ເມືອງສິງ, ແຂວງຫຼວງນໍ້າທາ, ພາຍໃຕ້ການສະໜັບສະໜູນຂອງໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງໄດ້ຮັບທຶນຊ່ວຍເຫຼືອຈາກໂຄງການເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF).
ຈຸດປະສົງຂອງພິທີເປີດປ້າຍກາໝາຍ ODOP ໃນຄັ້ງນີ້ ແມ່ນເພື່ອຢັ້ງຢືນ ແລະ ສົ່ງເສີມຜະລິດຕະພັນທີ່ເປັນເອກະລັກສະເພາະຂອງທ້ອງຖິ່ນ ໄດ້ແກ່ກຸ່ມຫັດຖະກຳຕ່ຳຫູກ ຢູ່ບ້ານສິນອຸດົມ, ເມືອງຫຼວງນໍ້າທາ; ກຸ່ມຫັດຖະກໍາຖັກແສ່ວເຄື່ອງຊົນເຜົາອາຄ່າ, ບ້ານ ຫຼັກຄໍາ ແລະ ກຸ່ມຜະລິດຖົ່ວເນົາ, ບ້ານນໍ້າແກ້ວຫຼວງ, ເມືອງສິງ. ພະແນກ ອຄ ແຂວງ ແນໃສ່ສົ່ງເສີມຜະລິດຕະພັນທ້ອງຖິ່ນຂອງຕົນໃຫ້ນຳໃຊ້ກາໝາຍ ODOP ເພື່ອຢັ້ງຢືນເຖິງຄຸນນະພາບ ແລະ ເອກະລັກສະເພາະຂອງຜະລິດຕະພັນ ໃນການເຂົ້າຫາຕະຫຼາດພາຍໃນ ແລະ ສາກົນ ເຊິ່ງຈະສາມາດສ້າງລາຍຮັບໃຫ້ກັບບັນດາຄອບຄົວທຸກຍາກທີ່ຢູ່ຫ່າງໄກຊອກຫຼີກ ໂດຍສະເພາະແມ່ນແມ່ຍິງ ໃຫ້ມີວຽກເຮັດງານທຳ.
ງານເປີດປ້າຍກາໝາຍດັ່ງກ່າວແມ່ນໄດ້ຮັບກຽດໃນການເປັນປະທານໂດຍ ຄະນະພະແນກອຸດສາຫະກໍາ ແລະ ການຄ້າແຂວງຫຼວງນໍ້າທາ ແລະ ໄດ້ຮັບກຽດເຂົ້າຮ່ວມໂດຍຜູ້ຕາງໜ້າຈາກກົມແຜນການ ແລະ ການຮ່ວມມື, ກົມສົ່ງເສີມການ ຄ້າ, ກະຊວງອຸດສາຫະກໍາ ແລະ ການຄ້າ, ຄະນະນຳເມືອງ, ຫົວໜ້າກຸ່ມຜູ້ຜະລິດຕ່າງໆ ແລະ ໜ່ວຍງານຕ່າງໆທີ່ກ່ຽວຂ້ອງ ຫຼາຍກວ່າ 60 ທ່ານ (ໃນນັ້ນ ແມ່ຍິງ: 45 ທ່ານ).
ກາໝາຍ “ໜຶ່ງເມືອງໜຶ່ງຜະລິດຕະພັນ” ນີ້ໄດ້ພັດທະນາໃນລະດັບຊາດ ເພື່ອສະໜັບສະໜູນໃຫ້ປະຊາຊົນລາວສາມາດພັດທະນາເສດຖະກິດໃນຂົງເຂດຂອງຕົນ ໂດຍການຫັນເອົາຜະລິດຕະພັນທີ່ເປັນເອກະລັກສະເພາະທ້ອງຖິ່ນພາຍໃນເມືອງຈາກສີມືຂອງຊຸມຊົນໃຫ້ກາຍເປັນສິນຄ້າອອກສູ່ຕະຫຼາດ, ເຊິ່ງສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ ໃນການຫຼຸດຜ່ອນຄວາມທຸກຍາກເທື່ອລະກ້າວ.
ພິທີເປີດໂຕດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງເປັນໂຄງການທີ່ໄດ້ຮັບການສະໜັບສະໜູນໂດຍ ໂຄງການ ເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF). ໂຄງການດັ່ງກ່າວແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
