ອົງການພັດທະນາສາກົນຂອງສະຫະລັດອາເມລິກາ (USAID) ໃຫ້ການສະໜັບສະໜູນ ການຈັດກອງປະຊຸມ ແລກປ່ຽນສົນທະນາດ້ານນະໂຍບາຍ, ສິ່ງທ້າທາຍ ແລະ ກາລະໂອກາດໃນການພັດທະນາ ເສດຖະກິດຂັ້ນແຂວງ ຜ່ານເສັ້ນທາງລົດໄຟ ລາວ-ຈີນ.
ນະຄອນຫຼວງວຽງຈັນ, ວັນທີ 05 ເມສາ 2022. ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ໂດຍໄດ້ຮັບການສະໜັບສະໜູນຈາກອົງການພັດທະນາສາກົນ ຂອງສະຫະລັດອາເມລິກາ (USAID) ຜ່ານໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ, ໄດ້ຈັດກອງປະຊຸມແລກປ່ຽນສົນທະນາດ້ານນະໂຍບາຍຄັ້ງທຳອິດຂຶ້ນໃນສົກປີ 2022. ຫົວຂໍ້ຂອງການສົນທະນາໃນມື້ນີ້ແມ່ນແນໃສ່ສິ່ງທ້າທາຍ ແລະ ກາລະໂອກາດທີ່ຕິດພັນກັບ ເສັ້ນທາງລົດໄຟລາວ-ຈິນ, ເຊິ່ງເປັນຫົວຂໍ້ທີ່ສືບຕໍ່ຈາກກອງປະຊຸມສົນທະນາບັນຫານະໂຍບາຍຂອງປີທີ່ຜ່ານມາ.
ກອງປະຊຸມດັ່ງກ່າວໄດ້ຮັບກຽດການເປັນປະທານຮ່ວມໂດຍ ທ່ານ ນາງ ວາລີ ເວດສະພົງ, ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ທ່ານ ຄູເລິນ ຮິວຊ໌, ຮອງຜູ້ຕາງໜ້າອົງການພັດທະນາສາກົນຂອງສະຫະລັດອາເມລິກາປະຈຳລາວ, ເຊິ່ງມີຜູ້ເຂົ້າຮ່ວມໃນທີ່ປະຊຸມຜ່ານລະບົບກອງປະຊຸມທາງໄກຫຼາຍກວ່າ 60 ທ່ານ ຈາກບັນດາພາກລັດ ແລະ ພາກເອກະຊົນຂອງແຂວງ, ກະຊວງ ໂຍທາທິການ ແລະ ຂົນສົ່ງ, ກະຊວງ ກະສິກຳ ແລະ ປ່າໄມ້, ພາກທຸລະກິດພ້ອມດ້ວຍສະຖາບັນການສຶກສາ.
ກອງປະຊຸມແລກປ່ຽນສົນທະນາດ້ານນະໂຍບາຍໃນຄັ້ງນີ້ໄດ້ແບ່ງອອກເປັນ 2 ພາກ. ພາກທີໜຶ່ງ ແມ່ນການນໍາສະເໜີບົດລາຍງານກ່ຽວກັບຜົນຂອງການລົງຢ້ຽມຢາມ 3 ແຂວງພາກເໜືອທີ່ເສັ້ນທາງລົດໄຟແລ່ນຜ່ານ. ພາກທີສອງ ແມ່ນເວທີສົນທະນາໃນຫົວຂໍ້ “ການແກ້ໄຂຄວາມຫຍຸ້ງຍາກ ແລະ ກາລະໂອກາດທາງດ້ານການເງິນ ແລະ ບັນຫາທາງດ້ານເສດຖະກິດໂດຍຜ່ານເສັ້ນທາງລົດໄຟລາວ-ຈີນ”. ກອງປະຊຸມຄັ້ງນີ້ໄດ້ຮັບກຽດການປະກອບສ່ວນຈາກບັນດານັກສຳມະນາກອນ ຕາງໜ້າຈາກກະຊວງອຸດສາຫະກຳ ແລະ ການຄ້າ, ໜ່ວຍງານລັດຖະບານແຂວງ, ສະພາການຄ້າ ແລະ ອຸດສາຫະກໍາແຂວງ, ຜູ້ຕາງໜ້າຈາກພາກທຸລະກິດ ແລະ ນັກເສດຖະສາດ.
ທ່ານ ນາງ ວາລີ ເວດສະພົງ, ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ໄດ້ເນັ້ນໜັກໃນບົດກ່າວເປີດຂອງເພິ່ນວ່າ: “ກອງປະຊຸມແລກປ່ຽນສົນທະນາດ້ານນະໂຍບາຍ ແມ່ນເວທີໜຶ່ງທີ່ເປີດໂອກາດໃຫ້ພາກທຸລະກິດ, ໂດຍສະເພາະແມ່ນ ທຸລະກິດຂະໜາດນອ້ຍ ແລະ ກາງ (SMEs), ສາມາດມີສ່ວນຮ່ວມ ເພື່ອສົນທະນາປຶກສາຫາລືເຖິງ ບັນຫາ ແລະ ຂໍ້ຈຳກັດ ທີ່ຕິດພັນກັບການດໍາເນີນທຸລະກິດ. ພ້ອມດຽວກັນນັ້ນ, ກອງປະຊຸມດັ່ງກ່າວ ຍັງຊ່ວຍໃນການປັບປຸງນະໂຍບາຍຕ່າງໆທີ່ຈະສ້າງຄວາມເຂັ້ມແຂງໃຫ້ແກ່ສະພາບແວດລ້ອມຂອງການດຳເນີນທຸລະກິດອີກດ້ວຍ”. ເພິ່ນຍັງໄດ້ກ່າວຕື່ມອີກວ່າ: “ທັງສອງວຽກງານທີ່ກ່າວມາຂ້າງເທິງນັ້ນ ຖືເປັນວຽກງານທີ່ສຳຄັນ ແລະ ໃຊ້ເວລາໃນການປຶກສາຫາລືກ່ຽວກັບຜົນກະທົບຂອງເສັ້ນທາງລົດໄຟລາວ-ຈີນ ພ້ອມທັງຊອກຫາກາລະໂອກາດ ແລະ ແກ້ໄຂສິ່ງທ້າທາຍຕ່າງໆທີ່ກ່ຽວຂ້ອງກັບການສົ່ງເສີມການເຕີບໂຕທາງເສດຖະກິດຂອງ ສປປ ລາວ, ໂດຍສະເພາະໃນໄລຍະຂອງການແຜ່ລະບາດພະຍາດໂຄວິດ-19.
ທ່ານ ຄູເລິນ ຮິວຊ໌, ຮອງຜູ້ຕາງໜ້າອົງການພັດທະນາສາກົນຂອງສະຫະລັດອາເມລິກາປະຈຳລາວ, ໄດ້ຢືນຢັນເຖິງຄຳໝັ້ນສັນຍາຂອງລັດຖະບານສະຫະລັດອາເມລິກາ ໃນການສືບຕໍ່ໃຫ້ການສະໜັບສະໜູນລັດຖະບານແຫ່ງ ສປປ ລາວ ໃນການປັບປຸງສະພາບແວດລ້ອມການດຳເນີນທຸລະກິດ ແລະ ແກ້ໄຂຜົນກະທົບທາງເສດຖະກິດທີ່ເກີດຈາກ ການແຜ່ລະບາດຂອງພະຍາດ COVID-19. ເພິ່ນຍັງໄດ້ກ່າວວ່າ: “ກອງປະຊຸມແລກປ່ຽນສົນທະນາດ້ານນະໂຍບາຍ ຈະຊ່ວຍໃຫ້ລັດຖະບານເຂົ້າໃຈບັນຫາທີ່ພົ້ນເດັ່ນ ທີ່ກ່ຽວຂ້ອງກັບເສັ້ນທາງລົດໄຟ ແລະ ການຂົນສົ່ງສິນຄ້າ. ໃນປັດຈຸບັນນີ້, ສປປ ລາວ ມີໂອກາດພິເສດທີ່ຈະໄດ້ຮັບຜົນປະໂຫຍດທາງເສດຖະກິດທີ່ສູງສຸດຈາກເສັ້ນທາງລົດໄຟລາວ-ຈີນນີ້”. ທ່ານ ຄູເລິນ ຮິວຊ໌ ຍັງກ່າວຕື່ມອີກວ່າ: “ກອງປະຊຸມແລກປ່ຽນສົນທະນາດ້ານນະໂຍບາຍສະແດງໃຫ້ເຫັນເຖິງຄວາມສຳຄັນຂອງການຮ່ວມມືລະຫວ່າງພາກລັດ ແລະ ພາກທຸລະກິດ ໃນການແກ້ໄຂບັນຫາຕ່າງໆທີ່ກ່ຽວຂ້ອງກັບເສັ້ນທາງທາງລົດໄຟລາວ-ຈີນ”.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວໂດຍຜ່ານການສະໜັບສະໜູນຈາກ ອົງການພັດທະນາສາກົນຂອງສະຫະລັດອາເມລິກາ (USAID-LBE) ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
