ອົງການພັດທະນາສາກົນຂອງສະຫະລັດອາເມລິກາ (USAID) ໃຫ້ການສະໜັບສະໜູນ ການຈັດກອງປະຊຸມ ປຶກສາຫາລືພາກທຸລະກິດ ຂະແໜງການທ່ອງທ່ຽວ, ຫັດຖະກຳ ແລະ ກະສິກຳ ທີ່ ແຂວງ ຈຳປາສັກ.

ນະຄອນປາກເຊ, ລະຫວ່າງວັນທີ 07-08 ມິຖຸນາ 2022. ສະພາການຄ້າ ແລະ ອຸດສາຫະກໍາ ແຂວງຈໍາປາສັກ ໄດ້ຈັດກອງປະຊຸມປຶກສາຫາລື ພາກທຸລະກິດຂະແໜງການທ່ອງທ່ຽວ, ຫັດຖະກຳ ແລະ ກະສິກຳ ທີ່ ແຂວງ ຈຳປາສັກ ເປັນເວລາ 2 ວັນ ເພື່ອປຶກສາຫາລືບັນຫາບູລິມະສິດ ຂອງບັນດາທຸລະກິດໃນຂະແໜງການທີ່ກ່ຽວຂ້ອງ ເຊິ່ງເປັນພາກທີສອງຂອງກົນໄກການປຶກສາຫາລື ລະຫວ່າງພາກລັດ-ທຸລະກິດທ້ອງຖິ່ນ (LPPD). ກອງປະຊຸມດັ່ງກ່າວ ໄດ້ຮັບການສະໜັບສະໜູນໂດຍອົງການພັດທະນາສາກົນຂອງສະຫະລັດອາເມລິກາ ໂດຍຜ່ານໂຄງການ ສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos).

ກອງປະຊຸມດັ່ງກ່າວ ໄດ້ຮັບກຽດເປັນປະທານຮ່ວມໂດຍ ທ່ານ ນາງ ບຸນເຮືອງ ແຄຣໍ ລິດດັງ, ປະທານສະພາການຄ້າ ແລະ ອຸດສາຫະກໍາ ແຂວງຈໍາປາສັກ, ທ່ານ ປະຈິດ ນໍລະແສງ, ຮອງປະທານສະພາການຄ້າ ແລະ ອຸດສາຫະກໍາ ແຂວງຈໍາປາສັກ ແລະ ທ່ານ ນາງ ພັນມະນີ ຄຳພິລາວົງ, ຮອງຫົວໜ້າໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos Business Environment) ແລະ ມີຜູ້ເຂົ້າຮ່ວມຈາກບັນດາສະມາຄົມທ່ອງທ່ຽວ, ສະມາຄົມຫັດຖະກໍາ, ສະມາຄົມກາເຟ, ສະມາຄົມມັນຕົ້ນ ແລະ ບັນດາຫົວໜ່ວຍທຸລະກິດທີ່ກ່ຽວຂ້ອງ.

ຈຸດປະສົງຂອງກອງປະຊຸມ ແມ່ນເພື່ອຊ່ວຍເຫຼືອບັນດາທຸລະກິດໃນຂະແໜງການທີ່ກ່ຽວຂ້ອງ ເພື່ອແກ້ໄຂບັນຫາຕົ້ນຕໍທີ່ກີດຂວາງ ຄວາມອາດສາມາດ ແລະ ການເຕີບໂຕຂອງບັນດາທຸລະກິດ ພ້ອມທັງ ສະເໜີບັນດາມາດຕະການໃນການແກ້ໄຂບັນຫາ ແລະ ຂໍ້ສະເໜີແນະໃຫ້ບັນດາກະຊວງທີ່ກ່ຽວຂ້ອງ.

ໃນພິທີເປີດກອງປະຊຸມ, ທ່ານ ນາງ ບຸນເຮືອງ ແຄຣໍ ລິດດັງ ໄດ້ເນັ້ນໜັກເຖິງຄວາມສຳຄັນຂອງກົນໄກການປຶກສາຫາລືລະຫວ່າງພາກລັດ-ທຸລະກິດທ້ອງຖິ່ນ (LPPD) ແລະ ຊຸກຍູ້ໃຫ້ບັນດາທຸລະກິດທີ່ເຂົ້າຮ່ວມ ຖືໂອກາດນີ້ປະກອບສ່ວນຢ່າງຫ້າວຫັນໃນການປຶກສາຫາລື ແລະ ແລກປ່ຽນຂໍ້ມູນຂ່າວສານ.

ທ່ານ ນາງພັນມະນີ ຄຳພິລາວົງ ໄດ້ຊົມເຊີຍອຳນາດການປົກຄອງ ແຂວງຈຳປາສັກ ແລະ ສະພາການຄ້າ ແລະ ອຸດສາຫະກໍາ ແຂວງຈຳປາສັກ ຕໍ່ຜົນສຳເລັດໃນການຈັດຕັ້ງປະຕິບັດກົນໄກ LPPD ແລະ ການຈັດກອງປະຊຸມທຸລະກິດແຂວງຈຳປາສັກ ຄັ້ງທີ 1 ທີ່ໄດ້ຈັດຂຶ້ນໃນເດືອນມີນາ 2022 ທີ່ຜ່ານມາ. ພ້ອມນີ້, ທ່ານຍັງກ່າວຕື່ມອີກວ່າ: ໂຄງການພວກເຮົາຍັງຈະສືບຕໍ່ສະໜັບສະໜູນກົນໄກ LPPD ແຂວງຈຳປາສັກ ເພື່ອປັບປຸງສະພາບແວດລ້ອມທີ່ເອື້ອອຳນວຍຕໍ່ທຸລະກິດຂອງ ແຂວງຈຳປາສັກ ແລະ ສະໜັບສະໜູນຄວາມພະຍາຍາມຂອງພາກທຸລະກິດ ເພື່ອແກ້ໄຂບັນຫາທີ່ເປັນບູລິມະສິດຂອງເຂົາເຈົ້າ ໂດຍຜ່ານການມີສ່ວນຮ່ວມຢ່າງຫ້າວຫັນໃນຂະບວນການປຶກສາຫາລືດ້ານນະໂຍບາຍ ທັງໃນຂັ້ນທ້ອງຖິ່ນ ແລະ ສູນກາງ.

ຜົນຂອງການສົນທະນາ ແລະ ປຶກສາຫາລືຂອງແຕ່ລະຂະແໜງການຈະຖືກບັນທຶກ, ສັງລວມ ແລະ ຈັດລຽງບູລິມະສິດ ເພື່ອປະກອບເປັນບົດລາຍງານສະເໜີຕໍ່ອໍານາດການປົກຄອງຂັ້ນທ້ອງຖິ່ນທີ່ກ່ຽວຂ້ອງ ແລະ ວາງທິດທາງເພື່ອສືບຕໍ່ປຶກສາຫາລື ໃນໂອກາດກອງປະຊຸມປຶກສາຫາລືພາກລັດ-ທຸລະກິດໃນຕໍ່ໜ້າ.

ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos) ຊ່ວຍເຫຼືອລັດຖະບານລາວ ໃນການເສີມສ້າງຄວາມສາມາດ ໃນການແຂ່ງຂັນຂອງວິສາຫະກິດຂະໜາດນ້ອຍ ແລະ ຂະໜາດກາງ ແລະ ປັບປຸງສະພາບການລົງທຶນ ແລະ ການຄ້າ.