ກອງປະຊຸມປຶກສາຫາລືການສ້າງລາຍການເອກະສານ ທີ່ຕ້ອງການໃຫ້ນັກລົງທຶນປະກອບໃນເວລາຍື່ນຄຳຮ້ອງຂໍ້ລົງທຶນ ແລະ ປັບປຸງການອອກໃບອະນຸຍາດດໍາເນີນທຸລະກິດ ພາຍໃຕ້ຄໍາເລກທີ 03/ນຍ
ໃນວັນພຸດ ວັນທີ 13 ກໍລະກົດ 2022, ເວລາ 9:00 ໂມງ, ກົມສົ່ງເສີມການລົງທຶນ, ກະຊວງ ແຜນການ ແລະ ການລົງທຶນ ໄດ້ຈັດກອງປະຊຸມປຶກສາຫາລືການສ້າງລາຍການເອກະສານທີ່ຕ້ອງການໃຫ້ນັກລົງທຶນປະກອບໃນເວລາຍື່ນຄຳຮ້ອງຂໍ້ລົງທຶນ ແລະ ປັບປຸງການອອກໃບອະນຸຍາດດໍາເນີນທຸລະກິດ ພາຍໃຕ້ຄໍາເລກທີ 03/ນຍ ພາຍໃຕ້ການເປັນປະທານຂອງ ທ່ານ ຄໍາສາຍ ນັນທະວົງ ຮອງຫົວໜ້າກົມສົ່ງເສີມການລົງທຶນ, ກະຊວງ ແຜນການ ແລະ ການລົງທຶນ, ຊຶ່ງມີຜູ້ເຂົ້າຮ່ວມຈາກຄະນະປະສານງານ ຈາກຂະແໜງການກ່ຽວຂ້ອງຈໍານວນ 30 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອສະຫຼຸບຕີລາຄາ ສະພາບການຈັດຕັ້ງປະຕິບັດຄໍາສັ່ງເລກທີ 03/ນຍ ວ່າດ້ວຍ ການປັບປຸງວຽກງານການບໍລິການ ການອອກໃບອະນຸຍາດລົງທຶນ ແລະ ການອອກໃບອະນຸຍາດດຳເນີນທຸລະກິດ ໂດຍລົງເລິກແຜນແກ້ໄຂບັນຫາຂໍ້ຄົງຄ້າງ, ແຜນການຈັດຕັ້ງປະຕິບັດໃນຕໍ່ໜ້າ ແລະ ການສ້າງລາຍການເອກະສານທີ່ຕ້ອງການ ໃຫ້ນັກລົງທຶນປະກອບໃນເວລາຍື່ນຄຳຮ້ອງຂໍ້ລົງທຶນ ໃນກິດຈະການຄວບຄຸມ ແລະ ກິດຈະການສຳປະທານ ແນ່ໃສ່ປັບປຸງບັນດາລະບຽບການ ແລະ ກົນໄກປະສານງານ ອຳນວຍຄວາມສະດວກ ແກ່ການດຳເນີນທຸລະກິດ, ການລົງທຶນ ຢູ່ ສປປ ລາວ ໃຫ້ສາມາດສໍາເລັດຕາມຄາດໝາຍ. ຜ່ານການຮັບຟັງການລາຍງານ ຂອງຂະແໜງການກ່ຽວຂ້ອງ ເຫັນໄດ້ວ່າທຸກໆຂະແໜງການໄດ້ເອົາໃຈໃສ່ ຈັດຕັ້ງປະຕິບັດຕາມພາລະບົດບາດຂອງຕົນ.
ໃນຕອນທ້າຍ, ປະທານກອງປະຊຸມກໍ່ໄດ້ເນັ້ນໜັກໃຫ້ທຸກຂະແໜງການເອົາໃຈ ໃສ່ໃນການສ້າງແຜນການດຳເນີນງານຈັດຕັ້ງປະຕິບັດໃນຕໍ່ໜ້າ ຂອງຂະແໜງການຂອງຕົນ ແລະ ສ້າງລາຍການເອກະສານ (Check List) ປະກອບຄໍາຮ້ອງຂໍລົງທຶນໂດຍທົບທວນຄືນ ບັນດາລາຍການເອກະສານ ທີ່ມີຢູ່ ແລະ ເຫັນວ່າບໍ່ຈໍາເປັນ ແມ່ນສາມາດຕັດອອກຈາກລາຍການປະກອບຄໍາຮ້ອງຂໍລົງທຶນ ເພື່ອເປັນການຫຼຸດຂອດຂັ້ນຂອງເອກະສານ ແລະ ອໍານວຍຄວາມສະດວກໃຫ້ແກ່ກົນໄກການອະນຸມັດການລົງທຶນວ່ອງໄວ ມີປະສິດທິພາບ ແລະ ປະສິດທິຜົນ.
ກອງປະຊຸມໃນຄັ້ງນີ້ໄດ້ຮັບການສະໜັບສະໜູນໂດຍໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT) ເປັນໂຄງການທີ່ຈັດຕັ້ງປະຕິບັດພາຍໃຕ້ ກົມແຜນການ ແລະ ການຮ່ວມມື, ກະຊວງ ອຸດສາຫະກໍາ ແລະ ການຄ້າ, ໂດຍໄດ້ຮັບການປະກອບທຶນ ຮ່ວມເຂົ້າກອງທຶນສົບທົບຫຼາຍຝ່າຍ ໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດ ໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
