ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ ສ້າງຄວາມປ່ຽນແປງໂດຍຜ່ານກົນໄກຮັບ ແລະ ແກ້ໄຂຄຳຮ້ອງຮຽນ
ໃນວັນທີ 3 ຕຸລາ 2023 ຢູ່ນະຄອນຫຼວງວຽງຈັນ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT) ພາຍໃຕ້ການຄູ້ມຄອງຂອງກະຊວງອຸດສາຫະກຳ ແລະ ການຄ້າ ໄດ້ລິເລີ່ມນຳສະເໜີກ່ຽວກັບ ກົນໄກຮັບ ແລະ ແກ້ໄຂຄຳຮ້ອງຮຽນຂອງໂຄງການ ໃຫ້ແກ່ ບັນດາກະຊວງທີ່ກ່ຽວຂ້ອງ, ພາກທຸລະກິດ ແລະ ມວນຊົນທົ່ວໄປ ໂດຍຜ່ານກິດຈະກຳຝຶກອົບຮົມ, ກອງປະຊຸມ ແລະ ຊ່ອງທາງສື່ຕ່າງໆ.
ກົນໄກຮັບ ແລະ ແກ້ໄຂຄຳຮ້ອງຮຽນ ຫຼື ທີ່ມີພາສາອັງກິດເອີ້ນວ່າ Grievance Redress Mechanism (GRM)ຂອງໂຄງການສົ່ງເສີມຄວາມສາມາດ ໃນການແຂ່ງຂັນ ແລະ ການຄ້າຂອງ ສປປ ລາວ ເປັນກົນໄກ ທີ່ສາມາດ ຊ່ວຍໃຫ້ຊຸມຊົມ ແລະ ຜູ້ທີ່ໄດ້ຮັບຜົນກະທົບ ສາມາດລາຍງານຄໍາຮ້ອງຮຽນ ແລະ ຊອກຫາວິທີແກ້ໄຂ ເມື່ອພວກເຂົາໄດ້ຮັບຜົນກະທົບ ທາງດ້ານລົບ ຈາກກິດຈະກຳ ຫຼື ພະນັກງານຂອງໂຄງການ. GRM ຖືກອອກແບບມາເພື່ອຊ່ວຍໃຫ້ຜູ້ທີ່ກ່ຽວຂ້ອງໄດ້ຮັບການບໍລິການທີ່ຄວນຈະໄດ້ຮັບ ແລະ GRM ສາມາດເປັນເຄື່ອງມືທີ່ມີປະສິດທິພາບໃນການລະບຸ, ການປະເມີນ ແລະ ການແກ້ໄຂການຮ້ອງຮຽນໃນໂຄງການຕັ້ງແຕ່ເບື້ອງຕົ້ນ.
ກົນໄກ ດັ່ງກ່າວ ຈະຊ່ວຍປັບປຸງຜົນໄດ້ຮັບຂອງໂຄງການ ແລະ ມີຜົນປະໂຫຍດຕໍ່ກັບທັງທີມງານໂຄງການ ແລະ ຜູ້ທີ່ໄດ້ຮັບຜົນປະໂຫຍດ. ນອກຈາກນີ້, GRM ເຮັດໜ້າທີ່ເປັນເຄື່ອງມື ໃນການແກ້ໄຂບັນຫາ ແລະ ສ້າງຄວາມເຂົ້າໃຈເປັນອັນໜຶ່ງອັນດຽວກັນ ໃນການສົ່ງເສີມການຮ່ວມມື, ຄວາມໂປ່ງໃສ ແລະ ຄວາມຮັບຜິດຊອບສຳລັບທຸກຄົນ.
ຊ່ອງທາງໃນການສົ່ງຄຳຮ້ອງຮຽນປະກອບມີ:
- ສົ່ງອີເມວຫາ lctgrm@laosaft.org
- ລາຍງານຜ່ານ https://www.t4dlaos.org/lctgrm/
- ສົ່ງຈົດໝາຍຫາພະແນກຈັດຕັ້ງປະຕິບັດໂຄງການການຊ່ວຍເຫຼືອຂອງຕ່າງປະເທດ ຫຼື NIU, ກະຊວງອຸດສາຫະກຳ ແລະ ການຄ້າ, ຖະໜົນໂພນໄຊ, ຕູ້ໄປສະນີ 4107, ນະຄອນຫຼວງວຽງຈັນ. ສປປ ລາວ
- ນຳເອົາຄຳຮ້ອງຮຽນໄປປ່ອນໃສ່ກ່ອງຄຳເຫັນທີ່ຢູ່ໜ້າຫ້ອງການ NIU, ກະຊວງອຸດສາຫະກຳ ແລະ ການຄ້າ.
ໃນເດືອນກໍລະກົດ ແລະ ກັນຍາ 2023 ຜ່ານມາ, ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ ໄດ້ຈັດກອງປະຊຸມຢູ່ ແຂວງວຽງຈັນ ແລະ ຫຼວງພະບາງ ເພື່ອນຳສະເໜີກ່ຽວກັບກົນໄກຮັບ ແລະ ແກ້ໄຂຄຳຮ້ອງຮຽນ ໃຫ້ແກ່ພາກສ່ວນທີ່ກ່ຽວຂ້ອງກັບໂຄງການ. ໂຄງການດັ່ງກ່າວຍັງຈະສຶບຕໍ່ເຜີຍແຜ່ ແລະ ສະໜອງຄວາມຮູ້ກ່ຽວກັບກົນໄກຮັບ ແລະ ແກ້ໄຂຄຳຮ້ອງຮຽນໃຫ້ແກ່ບັນດາພະນັກງານ ຈາກອົງການຈັດຕັ້ງທີ່ກ່ຽວຂ້ອງ ໂດຍສະເພາະບັນດາພາກສ່ວນຈັດຕັ້ງປະຕິບັດໂຄງການເຊັ່ນ: ກະຊວງອູດສາຫະກຳ ແລະ ການຄ້າ, ກະຊວງການເງີນ, ກະຊວງສາທາລະນະສຸກ, ກະຊວງກະສິກຳ ແລະ ປ່າໄມ້, ສະພາການຄ້າ ແລະ ອຸດສາຫະກຳແຫ່ງຊາດ, ທຶນສົມທົບເພື່ອສົ່ງເສີມທຸລະກິດ ແລະ ກອງປະຊຸມທຸລະກິດລາວ. ກອງປະຊຸມຝຶກອົບຮົມກ່ຽວກັບ ກົນໄກ GRM ຍັງຕະສຶບຕໍ່ຈັດຂຶ້ນຢູ່ແຂວງອຸດົມໄຊໃນເດືອນ ທັນວາ 2023 ແລະ ນະຄອນຫຼວງວຽງຈັນໃນເດືອນ ກຸມພາ 2024.
ຖ້າທ່ານມີຄຳຮ້ອງຮຽນກ່ຽວກັບໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ ທ່ານສາມາດສົ່ງຄຳຮ້ອງຮຽນຂອງທ່ານຜ່ານກົນໄກຮັບ ແລະ ແກ້ໄຂຄຳຮ້ອງຮຽນຂອງໂຄງການໄດ້ເລີຍ. ຂໍ້ມູນຂອງຜູ້ຮ້ອງຮຽນຈະຖືກປິດບັງເປັນຄວາມລັບ ເພື່ອປົກປ້ອງສິດ ແລະ ຄວາມເປັນສ່ວນຕົວຂອງທ່ານ.
ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ ໄດ້ຮັບການ ສະໜັບສະໜູນດ້ານວິຊາການ ແລະ ການເງິນຈາກທະນາຄານໂລກ ແລະ ສົມທົບທຶນເພີ່ມເຕີມຈາກ ປະເທດ ອົດສະຕາລີ, ໄອແລນ ແລະ ສະຫະລັດອາເມລິກາ. ໂຄງການດັ່ງກ່າວ ມີຈຸດປະສົງເພື່ອຫຼຸດຜ່ອນອຸປະສັກ ທີ່ກີດຂວາງ ການຂະຫຍາຍຕົວຂອງພາກເອກະຊົນ ໂດຍຜ່ານການປັບປຸງ ສະພາບແວດລ້ອມດ້ານການດໍາເນີນທຸລະກິດ ແລະ ດ້ານລະບຽບການຕ່າງໆ, ຫຼຸດຜ່ອນຕົ້ນທຶນການຄ້າ ແລະ ເພີ່ມທະວີຄວາມສາມາດໃນການແຂ່ງຂັນຂອງພາກທຸລະກິດ.
