ກົນໄກຮັບ ແລະ ແກ້ໄຂຄໍາຮ້ອງຮຽນ ຂອງໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ
ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ ໄດ້ເລີ່ມຂຶ້ນໃນປີ 2019 ເພື່ອຊ່ວຍ ລັດຖະບານ ສປປ ລາວສືບຕໍ່ລົງເລິກການປັບປຸງສະພາບແວດລ້ອມການດຳເນີນທຸລະກິດ, ປັບປຸງການເຊື່ອມໂຍງກັບ ປະເທດໃກ້ຄຽງ, ແລະ ຍົກສູງສະມັດຕະພາບດ້ານການຜະລິດຂອງພາກທຸລະກິດ. ໂຄງການດັ່ງກ່າວນີ້ ໄດ້ຮັບການ ສະໜັບສະໜູນດ້ານວິຊາການ ແລະ ການເງິນຈາກທະນາຄານໂລກ ແລະ ສົມທົບທຶນເພີ່ມເຕີມຈາກ ປະເທດ ອົດສະຕາລີ, ໄອແລນ ແລະ ສະຫະລັດອາເມລິກາ. ໂຄງການດັ່ງກ່າວ ມີຈຸດປະສົງເພື່ອຫຼຸດຜ່ອນອຸປະສັກ ທີ່ກີດຂວາງ ການຂະຫຍາຍຕົວຂອງພາກເອກະຊົນ ໂດຍຜ່ານການປັບປຸງສະພາບແວດລ້ອມ ດ້ານການດໍາເນີນທຸລະກິດ ແລະ ດ້ານ ລະບຽບການຕ່າງໆ, ຫຼຸດຜ່ອນຕົ້ນທຶນການຄ້າ ແລະ ເພີ່ມທະວີຄວາມສາມາດ ໃນການແຂ່ງຂັນຂອງພາກທຸລະກິດ.
ໂຄງການມຸ່ງໝັ້ນທີ່ຈະສ້າງກົນໄກຮັບ ແລະ ແກ້ໄຂຄຳຮ້ອງຮຽນ ຫຼື Grievance Redress Mechanism (GRM) ເພື່ອບໍລິຫານຄວາມສ່ຽງໃນການດຳເນີນງານຂອງໂຄງການ. GRM ເປັນກົນໄກສໍາລັບ ຜູ້ທີ່ໄດ້ຮັບຜົນກະທົບ
ຈາກໂຄງການ ເພື່ອແຈ້ງຂໍ້ກັງວົນ ແລະ ຂໍຄວາມຊ່ວຍເຫຼືອໃນເວລາທີ່ຮູ້ສຶກວ່າໂຄງການມີຜົນກະທົບທາງລົບ
ຕໍ່ພວກເຂົາເຈົ້າ. GRM ຖືກອອກແບບມາເພື່ອຊ່ວຍໃຫ້ຜູ້ຄົນທີ່ກ່ຽວຂ້ອງໄດ້ຮັບການບໍລິການທີ່ຄວນຈະໄດ້ຮັບ ແລະ GRM ສາມາດເປັນເຄື່ອງມືທີ່ມີປະສິດທິພາບໃນການລະບຸ, ການປະເມີນ ແລະ ການແກ້ໄຂການຮ້ອງຮຽນໃນໂຄງການ
ຕັ້ງແຕ່ເບື້ອງຕົ້ນ. ກົນໄກດັ່ງກ່າວ ຈະຊ່ວຍປັບປຸງຜົນໄດ້ຮັບຂອງໂຄງການ ແລະ ມີຜົນປະໂຫຍດຕໍ່ກັບທັງທີມງານ
ໂຄງການ ແລະ ຜູ້ທີ່ໄດ້ຮັບຜົນປະໂຫຍດ.
ກ່ຽວກັບກົນໄກການຮັບ ແລະ ແກ້ໄຂຄຳຮ້ອງຮຽນ
ກົນໄກຮັບ ແລະ ແກ້ໄຂຄຳຮ້ອງຮຽນໄດ້ຖືກອອກແບບມາ ເພື່ອຮັບ ແລະ ແກ້ໄຂຂໍ້ກັງວົນ, ຄຳຮ້ອງຮຽນ, ແຈ້ງການ ກ່ຽວກັບຂໍ້ຂັດແຍ່ງທີ່ເກີດຂຶ້ນ, ຫລື ການຮ້ອງຮຽນທີ່ເກີດຂຶ້ນຈາກໂຄງການ ແລະ ຊ່ວຍໃນການແກ້ໄຂການຮ້ອງຮຽນ ລະຫວ່າງ ແລະ ພາຍໃນ ບັນດາພາກສ່ວນທີ່ກ່ຽວຂ້ອງກັບໂຄງການ ເຊິ່ງຮວມມີບັນດາກະຊວງ, ອົງການຕ່າງໆ, ແລະ ພາກເອກະຊົນທີ່ມີສ່ວນກ່ຽວຂ້ອງໃນໂຄງການ.
ບຸກຄົນທີ່ໄດ້ຮັບຜົນກະທົບຈາກໂຄງການສາມາດຮ້ອງຮຽນບັນຫາໄດ້
ບຸກຄົນ ຫຼື ກຸ່ມຄົນ ຜູ້ທີ່ເຊື່ອວ່າ ພວກເຈົາໄດ້ຮັບຜົນກະທົບ ຫຼື ມີຄວາມເປັນໄປໄດ້ທີ່ຈະໄດ້ຮັບຄວາມເສຍຫາຍ
ຈາກໂຄງການແມ່ນສາມາດສົ່ງການຮ້ອງຮຽນຂອງຕົນໄດ້. ຂໍ້ມູນຂອງຜູ້ຮ້ອງຮຽນຈະຖືກປິດບັງເປັນຄວາມລັບ ເພື່ອປົກປ້ອງສິດ ແລະ ຄວາມເປັນສ່ວນໂຕ ຂອງພວກເຂົາ.
ຂໍ້ມູນທີ່ຄວນປະກອບໃນການຮ້ອງຮຽນ
ການຮ້ອງຮຽນຄວນປະກອບມີຂໍ້ມູນຕໍ່ໄປນີ້:
- ຂໍ້ມູນຕິດຕໍ່ຂອງຜູ້ຮ້ອງຮຽນ (ອີເມລ໌, ໂທລະສັບ, ທີ່ຢູ່ ແລະ ອື່ນໆ), ເຊິ່ງມີພຽງທີ່ປຶກສາຂອງ GRM ເທົ່ານັ້ນ ທີ່ສາມາດຮູ້ໄດ້.
- ລະບຸຜູ້ທີ່ເປັນຕົວແທນ ຮັບສິດອອກສຽງ ຕາງໜ້າ ໃຫ້ແກ່ຜູ້ຮ້ອງຮຽນ ແລະ ຊື່ຂອງພວກເຂົາ.
- ລາຍລະອຽດ ກ່ຽວກັບຄວາມເສຍຫາຍທີ່ອາດເກີດຂຶ້ນໄດ້ ຫຼື ຄວາມເສຍຫາຍຕົວຈິງ ທີ່ເກີດຈາກໂຄງການ.
- ຂໍ້ມູນກ່ຽວກັບຄວາມເສຍຫາຍ ຫຼື ຄວາມສ່ຽງ, ຜູ້ຄົນທີ່ກ່ຽວຂ້ອງ, ພາກສ່ວນທີ່ຮັບຜິດຊອບ, ສະຖານທີ່ ແລະ ເວລາ.
- ການກະທຳ ຫຼື ວິທີການ ຂອງຜູ້ຮ້ອງຮຽນໃນການແກ້ໄຂບັນຫາດັ່ງກ່າວ.
- ໃຫ້ແຈ້ງບອກວ່າ ຜູ້ຮ້ອງຮຽນ ຕ້ອງການໃຫ້ປົກປິດຂໍ້ມູນຂອງພວກເຂົາ ໄວ້ເປັນຄວາມລັບ, ແລະ
- ຜູ້ຮ້ອງຮຽນຕ້ອງການການຊ່ວຍເຫຼືອແນວໃດ ຈາກກົນໄກ GRM.
ເຖິງຢ່າງໃດກໍ່ຕາມ, ຜູ້ຮ້ອງຮຽນບໍ່ຈໍາເປັນຕ້ອງສະໜອງຂໍ້ມູນທັງໝົດທີ່ລະບຸໄວ້ຂ້າງເທິງ ແລະ ສາມາດເລືອກຍືນ ການຮ້ອງຮຽນດ້ວຍຮູບແບບທີ່ບໍ່ເປີດເຜີຍຂໍ້ມູນຂອງຕົນຕາມທີ່ໄດ້ລະບຸໄວ້ຂ້າງເທິງ. ໃນເບື້ອງຕົ້ນ, ຜູ້ຮ້ອງຮຽນ ຕ້ອງການພຽງແຕ່ສະໜອງຂໍ້ມູນໃຫ້ພຽງພໍ ເພື່ອໃຊ້ໃນການພິຈາລະນາ ການໄດ້ຮັບສິດ. ຖ້າຫາກຂໍ້ມູນບໍ່ພຽງພໍ, GRM ມີພັນທະໃນການຕິດຕໍ່ປະສານກັບຜູ້ຮ້ອງຮຽນ ເພື່ອຮ້ອງຂໍໃຫ້ສະໜອງຂໍ້ມູນເພີ່ມເຕີມທີ່ຈຳເປັນ ເພື່ອໃຊ້ໃນການພິຈາລະນາການໄດ້ຮັບສິດ, ແລະ ເພື່ອຕອບກັບຕໍ່ການຮ້ອງຮຽນທີ່ສະເໜີ.
ການຮ້ອງຮຽນສາມາດເຮັດໄດ້ໂດຍ:
- ສົ່ງອີເມວຫາ: lctgrm@laosaft.org
- ລາຍງານມາຍັງ: www.t4dlaos.org/lctgrm/
- ນຳເອົາຄຳຮ້ອງຮຽນໄປປ່ອນໃສ່ກ່ອງຄໍາຄິດເຫັນທີ່ຢູ່ຫນ້າພະແນກ NIU, ກະຊວງອຸດສາຫະກຳ ແລະ ການຄ້າ.
- ສົ່ງຈົດໝາຍເຖິງພະແນກ NIU, ກະຊວງອຸດສາຫກຳ ແລະ ການຄ້າ, ຖະໜົນ ໂພນໄຊ, ຕູ້ໄປສະນີ 4107, ນະຄອນຫຼວງວຽງຈັນ, ສປປ ລາວ.
ຂະບວນການທົບທວນການຮ້ອງຮຽນ
ຫຼັງຈາກຍືນການຮ້ອງຮຽນແລ້ວ, ຈະມີການດຳເນີນການຫຼາຍຂັ້ນຕອນ ກ່ອນທີ່ຈະໄດ້ຮັບການແກ້ໄຂຢ່າງສົມບູນ. ເວລາທີ່ໃຊ້ໃນການແກ້ໄຂຄຳຮ້ອງຮຽນ ແມ່ນແຕກຕ່າງກັນ ຂຶ້ນກັບຄວາມສະຫຼັບຊັບຊ້ອນ ແລະ ຄວາມຮ້າຍແຮງ. ໂດຍປົກກະຕິແລ້ວ, ຄໍຮ້ອງຮຽນ ຈະຖືກແກ້ໄຂ ພາຍໃນ 10 ຫາ 60 ວັນ. ຂັ້ນຕອນທີ່ສຳຄັນ ໃນການທົບທວນຄຳ ຮ້ອງຮຽນ ແລະ ແກ້ໄຂການຮ້ອງຮຽນ ແມ່ນປະກອບມີ:
- ກອງເລຂາ GRM ຮັບການຮ້ອງຮຽນ;
- ກອງເລຂາ GRM ຮັບຮູ້ການຮ້ອງຮຽນ;
- ຄະນະກໍາມະການ GRM ພ້ອມດ້ວຍຫົວຫນ້າກອງເລຂາ GRM ດຳເນີນການທົບທວນການຮ້ອງຮຽນ ໂດຍຜ່ານການສືບສວນ ຫຼື ສົ່ງຕໍ່ໄປໃຫ້ຜູ້ໄກ່ເກ່ຍ ຫຼື ອົງການອື່ນທີ່ກ່ຽວຂ້ອງ;
ຖ້າຫາກການຮ້ອງຮຽນນັ້ນ ຖືກປິດເປັນຄວາມລັບ ແຜນດຳເນີນງານ ແມ່ນຈະໄດ້ມີການປຶກສາຫາລືກັບຜູ້ຮ້ອງຮຽນ ແລະ ຫຼັງຈາກນັ້ນຈຶ່ງດໍາເນີນການ.
ບຸກຄະລາກອນທີ່ກ່ຽວຂ້ອງກັບການຮ້ອງຮຽນ/ບັນຫາ ຈະຕ້ອງຮັບຜິດຊອບ ແລະ ດຳເນີນການຕາມຂັ້ນຕອນໃນການ ແກ້ໄຂບັນຫາທີ່ສະເໜີ. - ກອງເລຂາ GRM ແຈ້ງໃຫ້ຜູ້ຮ້ອງຮຽນຮັບຊາບກ່ຽວກັບຜົນການປະເມີນ;
- ການຕິດຕາມຜົນ ເພື່ອກວດກາ/ກວດສອບເປັນແຕ່ລະໄລຍະ ເພື່ອໃຫ້ຮັບປະກັນວ່າ ມີການດໍາເນີນການ ຕາມຂັ້ນຕອນທີ່ເໝາະສົມ ແຕ່ຖ້າຜູ້ຮ້ອງຮຽນບໍ່ຍອມຮັບຄຳຕັດສິນ ແມ່ນອາດຈະຍື່ນອຸທອນຕໍ່ ຕາມຂັ້ນຕອນ ເປັນທາງການ.
ການມີກົນໄກການຮ້ອງຮຽນທີ່ດີ ເຮັດໃຫ້ຜູ້ມີສ່ວນຮ່ວມກັບໂຄງການ ສາມາດແຈ້ງຂໍ້ກັງວົນ ແລະ ໃຫ້ຄໍາຄິດເຫັນ ຕໍ່ກັບໂຄງການ. ຫຼັງຈາກນັ້ນ, ຄໍາຄິດເຫັນດັ່ງກ່າວສາມາດນໍາໃຊ້ໃນການປັບປຸງໂຄງການ ແລະ ເພື່ອຮັບປະກັນວ່າ ສາມາດຕອບສະໜອງ ຕາມຄວາມຕ້ອງການຂອງທຸກພາກສ່ວນທີ່ກ່ຽວຂ້ອງໄດ້. GRM ບໍ່ພຽງແຕ່ເປັນອົງປະກອບ ທີ່ສໍາຄັນໃນການມີສ່ວນຮ່ວມ ຂອງພາກສ່ວນທີ່ກ່ຽວຂ້ອງເທົ່ານັ້ນ, ແຕ່ຍັງເປັນແຫຼ່ງຂໍ້ມູນທີ່ສໍາຄັນສໍາລັບພວກເຮົາ ໃນການປັບປຸງໂຄງການ ແລະ ການບໍລິການໃຫ້ແກ່ຜູ້ທີ່ໄດ້ຮັບຜົນປະໂຫຍດຢ່າງຕໍ່ເນື່ອງ.
ສົ່ງຄໍາຮ້ອງຮຽນ