ໂຄງການ LCT
ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ – LCT
- ແຫຼ່ງທຶນ ສຳລັບ LCT
- ທຶນທັງໝົດ: 13,4 ລ້ານໂດລາສະຫະລັດ
- ເງິນກູ້ຢືມຈາກທະນາຄານໂລກ – ສະມາຄົມພັດທະນາສາກົນ (IDA): 10 ລ້ານໂດລາສະຫະລັດ (ເປັນເງິນກູ້ IDA)
- ແຫຼ່ງທຶນຊ່ວຍເຫຼືອລ້າຫຼາຍຝ່າຍ: 3,4 ລ້ານໂດລາສະຫະລັດ
- ຜູ້ປະກອບທຶນ: ທະນາຄານໂລກ, ລັດຖະບານອົດສະຕາລີ, ລັດຖະບານອົດສຕາລີ່ ແລະ ລັດທະບານໄອແລນ
- ເປົ້າໝາຍຂອງໂຄງການ: ເປົ້າໝາຍພັດທະນາໂຄງການແມ່ນເພື່ອປັບປຸງລະບຽບການທີ່ຕິດພັນກັບທຸລະກິດໃຫ້ງ່າຍດາຍຂຶ້ນ, ອຳນວຍຄວາມສະດວກດ້ານການຄ້າ ແລະ ປັບປຸງຄວາມສາມາດໃນການແຂ່ງຂັນຂອງຫົວໜ່ວຍທຸລະກິດ.
- ຂົງເຂດຈຸດສຸມ:
- ປັບປຸງສະພາບແວດລ້ອມການດຳເນີນທຸລະກິດ
- ອຳນວຍຄວາມສະດວກທາງດ້ານການຄ້າ ແລະ ສົ່ງເສີມການເຂົ້າສູ່ຕະຫຼາດ
- ປັບປຸງຄວາມສາມາດໃນການແຂ່ງຂັນໃຫ້ຫົວໜ່ວຍທຸລະກິດ
- ສະໜັບສະໜູນເພື່ອປັບປຸງການສ້າງນະໂຍບາຍທີ່ເໝາະສົມ ແລະ ມີສ່ວນຮ່ວມ
- ພາກສ່ວນຈັດຕັ້ງປະຕິບັດຫຼັກ: ພະແນກຄຸ້ມຄອງການຈັດຕັ້ງປະຕິບັດໂຄງການຊ່ວຍເຫຼືອຂອງຕ່າງປະເທດ (NIU), ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ
- ໄລຍະໂຄງການ: 27 ກັນຍາ 2018 ຫາ 31 ທັນວາ 2022
- ລາຍລະອຽດຂອງໂຄງການ
ໂຄງການ LCT ຍັງສຶບຕໍ່ເປັນໂຄງການ ທີ່ສະໜັບສະໜູນໂດຍຄູ່ຮ່ວມພັດທະນາຫຼາຍພາກສ່ວນຄື: ທະນາຄານໂລກ, ລັດຖະບານອົດສະຕາລີ, ລັດຖະບານໄອແລນ ແລະ ລັດຖະບານອາເມລິກາ ເຊິ່ງມີເປົ້າໝາຍຫຼັກເພື່ອລົບລ້າງອຸປະສັກ ທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດ ໂດຍໃຫ້ການຊ່ວຍເຫຼືອດ້ານວິຊາການເພື່ອປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນໃນການດຳເນີນທຸລະກິດ ແລະ ຍົກລະດັບຄວາມສາມາດການແຂ່ງຂັນຂອງຫົວໜ່ວຍທຸລະກິດ. ໂຄງການດັ່ງກ່າວປະກອບດ້ວຍ 04 ເສົາຄ້ຳໃຫ່ຍດັ່ງນີ້:
ເສົາຄ້ຳ A: ປັບປຸງສະພາບແວດລ້ອມການດຳເນີນທຸລະກິດ: ເສົາຄ້ຳນີ້ຈະສຸມໃສ່ ປັບປຸງແກ້ໄຂຄວາມຫຍຸ້ງຍາກທີ່ຕິດພັນກັບຕົວຊີ້ວັດການກໍ່ຕັ້ງທຸລະກິດ ໂດຍການປັບປຸງຂະບວນການຈົດທະບຽນວິສາຫະກິດ ແລະ ອອກໃບອະນຸຍາດດຳເນີນທຸລະກິດຕ່າງໆ ໃຫ້ມີຄວາມໂປ່ງໄສ ແລະ ມີປະສິດທິພາບກ່ວາເກົ່າ, ຊ່ວຍຫຼຸດຜ່ອນຄ່າໃຊ້ຈ່າຍທີ່ບໍ່ຈຳເປັນໃຫ້ວິສາຫະກິດ ໂດຍສະເພາະແມ່ນ SMEs. ນອກຈາກນີ້, ເສົາຄ້ຳນີ້ຍັງຈະຊ່ວຍກະຊວງແຜນການ ແລະ ການລົງທຶນ ໃນການປະສານການຈັດຕັ້ງປະຕິບັດ ຄຳສັ່ງນາຍົກລັດຖະມົນຕີເລກທີ 02/ນຍ ແລະ ປະກອບດ້ວຍ 03 ອົງປະກອບຄື: A1: ປັບປຸງຂະບວນການຈົດທະບຽນວິສາຫະກິດໃຫ້ງ່າຍດາຍຂຶ້ນ, A2: ປັບປຸງຂັ້ນຕອນການອອກໃບອະນຸຍາດດຳເນີນໃນບັນດາຂະແໜງການຕ່າງໆທີ່ເປັນບູລິມະສິດ, A3: ນຳໃຊ້ຮູບແບບການໃຫ້ທຶນສະໜັບສະໜູນໂຄງການຍ່ອຍ (Challenge Facility-CF) ເພື່ອສະໜັບສະໜູນບັນດາກົມທີ່ກ່ຽວຂ້ອງໃນການຈັດຕັ້ງປະຕິບັດຄຳສັ່ງເລກທີ 02/ນຍ.
ເສົາຄ້ຳ B: ອຳນວຍຄວາມສະດວກດ້ານການຄ້າ ແລະ ສົ່ງເສີມການເຂົ້າສູ່ຕະຫຼາດ. ເສົາຄ້ຳນີ້ ແມ່ນຈະສືບຕໍ່ຜັນຂະຫຍາຍແຜນດຳເນີນງານວຽກງານອຳນວຍຄວາມສະດວກທາງດ້ານການຄ້າ ຂອງ ສປປ ລາວ 2017-2022 (Trade Failitation Road Map – TFRM) ໂດຍຈະສະໜັບສະໜູນການຈັດຕັ້ງປະຕິບັດເງື່ອນໄຂ ແລະ ພັນທະຕ່າງໆ ຂອງສົນທິສັນຍາອົງການການຄ້າໂລກວ່າດ້ວຍ ການອຳນວຍຄວາມສະດວກທາງດ້ານການຄ້າ (TFA) ເພື່ອຫຼຸດຜ່ອນຄ່າໃຊ້ ຈ່າຍການຄ້າລະຫວ່າງປະເທດທີ່ສູງ ລວມທັງເວລາໃນການຂໍເອກະສານຕ່າງໆ ແລະ ການແຈ້ງສິນຄ້າໃນເວລານຳເຂົ້າ ແລະ ສົ່ງອອກ. ປະກອບມີ 02 ອົງປະກອບຄື: B1: ຈະສະໜັບສະໜູນວຽກງານກອງເລຂາອຳນວຍຄວາມສະດວກທາງດ້ານການຄ້າ ຊຶ່ງພວມຖືກຍົກລະດັບໃຫ້ເປັນຄະນະກຳມະການອຳນວຍຄວາມສະດວກທາງການຄ້າລະດັບຊາດ, B2: ສົ່ງເສີມການຈັດຕັ້ງປະຕິບັດສັນຍາອຳນວຍຄວາມສະດວກດ້ານການຄ້າໃນຮູບແບບທຶນສະໜັບສະໜູນໂຄງການຍ່ອຍ (TFA CF) ໂດຍຈະສຸມໃສ່ແກ້ໄຂຄວາມບໍ່ສອດຄ່ອງຂອງລະບຽບການລະຫວ່າງລະບຽບການຂອງລາວ ແລະ TFA ເພື່ອເຮັດໃຫ້ລະບຽບການຂອງລາວມີຄວາມທັນສະໃໝສຳລັບການນຳເຂົ້າ ແລະ ສົ່ງອອກ.
ເສົາຄ້ຳ C: ປັບປຸງຄວາມສາມາດໃນການແຂ່ງຂັນໃຫ້ພາກທຸລະກິດ: ເສົາຄ້ຳນີ້ຈະສົ່ງເສີມພາກທຸລະກິດໃນລະດັບຫົວໜ່ວຍວິສາຫະກິດ, ເປົ້າໝາຍແມ່ນເພື່ອໃຫ້ຄຳປຶກສາແກ່ທຸລະກິດໃນການສ້າງຍຸດທະສາດ ຫຼືແຜນການຂະຫຍາຍທຸລະກິດ ສະໜອງທຶນສົມທົບແບບຊ່ວຍເຫຼືອລ້າ 50% ໃຫ້ບໍລິສັດແນໃສ່ຊ່ວຍຫຼຸດຜ່ອນຄ່າໃຊ້ຈ່າຍພາຍໃນຂອງບໍລິສັດໃນການປັບປຸງການຄຸ້ມຄອງບໍລິຫານ, ການຍົກລະດັບຄຸນນະພາບຂອງການຜະລິດ, ການເຂົ້າຫາຕະຫຼາດ, ຊ່ອງທາງການຂະຫຍາຍທຸລະກິດຜ່ານລະບົບການຄ້າແບບເອລັກໂຕຼນິກ (e-commerce), ແລະ ອື່ນໆ.
ເສົາຄ້ຳ D: ສະໜັບສະໜູນເພື່ອປັບປຸງການສ້າງນະໂຍບາຍທີ່ເໝາະສົມ ແລະ ມີສ່ວນຮ່ວມ ເພື່ອໃຫ້ການສະໜັບສະໜູນການຈັດຕັ້ງປະຕິບັດໂຄງການຢ່າງມີປະສິດທິພາບ, ການຕິດຕາມ ແລະ ປະເມີນຜົນໂຄງການ ພ້ອມທັງປັບປຸງການສ້າງນະໂຍບາຍຕ່າງໆ. ນອກນັ້ນ ກໍຍັງຈະສືບຕໍ່ໃຫ້ການສະໜັບສະໜູນຄວາມໂປ່ງໄສດ້ານລະບຽບການທີ່ຕິດພັນກັບຂະແໜງການຄ້າ ແລະ ພາກເອກະຊົນ ພ້ອມທັງສ້າງຄວາມເຂັ້ມແຂງໃຫ້ແກ່ຂະບວນການປຶກສາຫາລືລະຫວ່າງພາກລັດ ແລະ ທຸລະກິດ ພາຍໃຕ້ກອງປະຊຸມທຸລະກິດລາວ ຫຼື Lao Business Forum ແລະ ສະໜັບສະໜູນການດຳເນີນງານຂອງໜ່ວຍງານຂະແໜງການຄ້າ ແລະ ພາກເອກະຊົນ. ຊຶ່ງປະກອບມີ 3 ອົງປະກອບຄື: D.1 ການຄຸ້ມຄອງ ແລະ ປະສານງານໂຄງການ; D.2 ປັບປຸງການສ້າງນະໂຍບາຍທີ່ຕິດພັນ ແລະ ຄວາມໂປ່ງໄສ; D.3 ໃຫ້ການສະໜັບສະໜູນ ການປະສານງານລະຫວ່າງພາກລັດ ແລະ ເອກະຊົນ.
