ກອງປະຊຸມເຜີຍແຜ່ ປຶ້ມແຜນດໍາເນີນງານການດໍາເນີນທຸລະກິດໃນ ສປປ ລາວ 2020 – 2022
ນະຄອນຫຼວງວຽງຈັນວັນທີ 05 ສິງຫາ 2020, ກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ, ໄດ້ຈັດກອງປະຊຸມເຜີຍແຜ່ປຶ້ມແຜນດໍາເນີນງານການດໍາເນີນທຸລະກິດໃນ ສປປ ລາວ 2020 – 2022 ຂຶ້ນ ໂດຍການສະໜັບສະໜູນຂອງໂຄງການເຊື່ອມໂຍງເສດຖະກິດອາຊຽນຂອງ ສປປ ລາວ ເພື່ອພັດທະນາດ້ານທຸລະກິດ ແລະ ການຄ້າ (RELATED) ພາຍໃຕ້ອົງການຮ່ວມມື ລາວ-ເຢຍລະມັນ (GIZ).
ກອງປະຊຸມດັ່ງກ່າວໄດ້ໃຫ້ກຽດເປັນປະທານໂດຍ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແລະ ລັດຖະມົນຕີກະຊວງແຜນການ ແລະ ການລົງທຶນ, , ແລະ ທ່ານ Jens Peter Lütkenherm, ເອກອັກຄະລັດຖະທູດ ສ. ເຢຍລະມັນ ປະຈໍາ ສປປ ລາວ,. ນອກຈາກນີ້, ຍັງມີບັນດາຄະນະນໍາຂອງຂະແໜງການທີ່ກ່ຽວຂ້ອງເຂົ້າຮ່ວມເຊັ່ນ ທ່ານ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານຮອງລັດຖະມົນຕີ ກະຊວງການເງິນ, ທ່ານຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, ທ່ານຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານຮອງລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ທ່ານຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.
ໃນປີຜ່ານມາ, ລັດຖະບານລາວໄດ້ຈັດຕັ້ງປະຕິບັດບາດກ້າວສໍາຄັນ ໃນການປັບປຸງການສະພາບແວດລ້ອມ ທີ່ອໍານວຍຄວາມສະດວກໃນການດໍາເນີນທຸລະກິດ, ລວມທັງຈັດຕັ້ງປະຕິບັດຕາມຄໍາສັ່ງຂອງທ່ານ ນາຍົກລັດຖະມົນຕີ ເລກທີ 002/2018 ວ່າດ້ວຍການປັບປຸງກົດລະບຽບ ແລະ ກົນໄກການປະສານງານເພື່ອອໍານວຍຄວາມສະດວກໃນການດໍາເນີນທຸລະກິດໃນ ສປປ ລາວ ແລະ ຄໍາສັ່ງເລກທີ 003/2020 ວ່າດ້ວຍການປັບປຸງການໃຫ້ບໍລິການຄຸ້ມຄອງສໍາລັບການລົງທຶນ ແລະ ການອອກໃບອະນຸຍາດດໍາເນີນທຸລະກິດ. ດັ່ງນັ້ນ, ຈຸດປະສົງຂອງກອງປະຊຸມຄັ້ງນີ້ແມ່ນເພື່ອເຜີຍແຜ່ ປຶ້້ມແຜນດໍາເນີນງານການດໍາເນີນທຸລະກິດໃນ ສປປ ລາວ 2020 – 2022ທີ່ກະຊວງແຜນການ ແລະ ການລົງທຶນເປັນຜູ້ປະສານງານ ແລະ ຕິດຕາມຄວາມຄືບໜ້າໃນການປັບປຸງ ແຕ່ລະຕົວຊີ້ວັດຂອງຂະແໜງການກ່ຽວຂ້ອງ ໃຫ້ອົງການຕ່າງໆຂອງພາກລັດ ຕະຫຼອດຮອດພາກເອກະຊົນໄດ້ຮັບຊາບ ແລະ ຕິດຕາມ. ໃນນັ້ນ ກໍແມ່ນເພື່ອເປັນການສະໜອງຂໍ້ມູນ ໃຫ້ແກ່ບັນດາຜູ້ໃຫ້ທຶນຕ່າງໆ ທີ່ມີຄວາມສົນໃຈໃຫ້ການສະໜັບສະໜູນທາງດ້ານທຶນຮອນ ຫຼື ວິຊາການ ເພື່ອຊຸກຍູ້ວຽກງານປັບປຸງຄວາມສະດວກໃນການດໍາເນີນທຸລະກິດຢູ່ ສປປ ລາວໃຫ້ດີຂຶ້ນເປັນກ້າວໆ.
ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແລະ ລັດຖະມົນຕີກະຊວງແຜນການ ແລະ ການລົງທຶນ ໄດ້ກ່າວໃນກອງປະຊຸມວ່າ: ຕໍ່ກັບບົດລາຍງານຄວາມສະດວກໃນການດໍາເນີນທຸລະກິດປີ 2020 ທີ່ ກຸ່ມທະນາຄານໂລກໄດ້ເຮັດການປະເມີນຄວາມສະດວກຮອບດ້ານຂອງການດໍາເນີນທຸລະກິດໃນ 190 ປະເທດ ແລະ ຂົງເຂດເສດຖະກິດໃຫຍ່ທົ່ວໂລກນັ້ນ, ສປປ ລາວ ແມ່ນຈັດຢູ່ໃນອັນດັບທີ 154 ໃນທົ່ວໂລກ ແລະ ເປັນອັນດັບທີ 9 ໃນອາຊຽນ. ບົດລາຍງານນີ້ໄດ້ປຸກລະດົບໃຫ້ບັນດາປະເທດຕ່າງໆມີການແຂ່ງຂັນເພື່ອປັບປຸງບັນດາລະບຽບການ ແລະ ກົນໄກປະສານງານໃນການດໍາເນີນທຸລະກິດໃຫ້ມີປະສິດທິພາບ, ຊຶ່ງ ສປປ ລາວກໍໄດ້ຈັດຕັ້ງປະຕິບັດຕາມຄໍາສັ່ງຂອງນາຍົກລັດຖະມົນຕີເພື່ອປັບປຸງສະພາບແວດລ້ອມໃນການດໍາເນີນທຸລະກິດເຊັ່ນ: ຄໍາສັ່ງເລກທີ 002/ນຍ, ເລກທີ 012/ນຍ ແລະ ເລກທີ 003/ນຍ. ຄໍາສັ່ງເຫຼົ່ານີ້ໄດ້ມອບໃຫ້ແຕ່ລະຂະແໜງການເອົາໃຈໃສ່ປັບປຸງຕົວຊີ້ວັດຕາມຂອບເຂດສິດ ແລະ ໜ້າທີ່ຮັບຜິດຊອບຂອງຕົນ ເພື່ອສຸມໃສ່ປັບປຸງບັນຍາກາດ ໃນການດໍາເນີນທຸລະກິດຢູ່ພາຍໃນປະເທດໃຫ້ດີຂຶ້ນ, ແນໃສ່ຍາດແຍ່ງ ແລະ ດຶງດູດເອົາການລົງທຶນທີ່ມີຄຸນນະພາບ, ຊຸກຍູ້ສົ່ງເສີມ ແລະ ສ້າງຂີດຄວາມສາມາດໃນການແຂ່ງຂັນ ຂອງທຸລະກິດພາຍໃນໃຫ້ສູງຂຶ້ນ”.
ກອງປະຊຸມດັ່ງກ່າວໄດ້ດໍາເນີນໄປຢ່າງຫ້າວຫັນ ແລະ ມີປະສິດທິພາບ. ຜູ້ຕາງໜ້າຈາກພາກລັດ ແລະ ພາກເອກະຊົນໄດ້ສະແດງຄວາມຍິນດີຕໍ່ກັບແຜນງານດັ່ງກ່າວ, ເຊິ່ງສະແດງໃຫ້ເຫັນວ່າລັດຖະບານລາວໄດ້ສຸມໃສ່ ການປັບປຸງວຽກງານດ້ານການດໍາເນີນທຸລະກິດຢ່າງຈິງຈັງ ເພື່ອຫຼຸດອັນດັບ ແລະ ຄະແນນທີ່ປະເມີນກ່ຽວກັບການດໍາເນີນທຸລະກິດ ໃນ ສປປ ລາວ.
ໂຄງການເຊື່ອມໂຍງເສດຖະກິດອາຊຽນຂອງ ສປປ ລາວເພື່ອພັດທະນາດ້ານທຸລະກິດ ແລະ ການຄ້າ (RELATED) ແມ່ນໂຄງການພາຍໃຕ້ການສະໜັບສະໜັບສະໜູນ ຂອງລັດຖະບານເຢຍລະມັນ. ໂຄງການດັ່ງກ່າວໄດ້ສ້າງຕັ້ງຂຶ້ນໃນປີ 2014 ພາຍໃຕ້ການຈັດຕັ້ງປະຕິບັດຂອງອົງການຮ່ວມມື ລາວ-ເຢຍລະມັນ (GIZ).
ໂຄງການດັ່ງກ່າວມີເປົ້າໝາຍໃຫ້ການສະໜັບສະໜູນລັດຖະບານລາວ ໃນການປັບປຸງນະໂຍບາຍທີ່ຕິດພັນກັບການເຊື່ອມໂຍງເສດຖະກິດອາຊຽນ (AEC) ໃນຂົງເຂດດ້ານການຄ້າ-ດສິນຄ້າ ແລະ ການລົງທຶນ, ສະໜັບສະໜູນພາກເອກະຊົນໃນການພັດທະນາ ແລະ ສະໜອງບໍລິການທີ່ກ່ຽວຂ້ອງກັບ AEC ແລະຊ່ວຍປັບປຸງຄວາມສາມາດໃນການແຂ່ງຂັນ ໃຫ້ພາກທຸລະກິດເພື່ອກຽມຄວາມພ້ອມເຂົ້າໃນ AEC.
