ກອງປະຊຸມໂຄສະນາເຜີຍແຜ່ກົດໝາຍວ່າດ້ວຍການຟື້ນຟູ ແລະ ການລົ້ມລະລາຍຂອງວິສາຫະກິດ
ນະຄອນຫຼວງວຽງຈັນ, ວັນທີ 17 ກັນຍາ 2020. ໃນຕອນເຊົ້າຂອງວັນທີ 17 ກັນຍາ 2020 ທີ່ໂຮງແຮມແລນມາກ ນະຄອນຫຼວງວຽງຈັນ ກະຊວງຍຸຕິທຳ ໄດ້ເປີດກອງປະຊຸມ ເພື່ອເຜີຍແຜ່ກົດໝາຍວ່າດ້ວຍ ການຟື້ນຟູ ແລະ ລົ້ມລະລາຍ ຂອງວິສາຫະກິດຂຶ້ນ ໂດຍການເປັນປະທານຂອງທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ, ມີບັນດາຫົວໜ້າກົມ-ຮອງກົມ, ຜູ້ຕາງໜ້າຈາກບັນດາກະຊວງ-ອົງການລັດທຽບເທົ່າກະຊວງ, ຫົວໜ່ວຍວິສາຫະກິດ ເຂົ້າຮ່ວມທັງໝົດຈຳນວນ 85 ທ່ານ, ຍິງ 25 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ ແນໃສ່ເພື່ອສ້າງຄວາມຮັບຮູ້ ແລະ ເຂົ້າໃຈທີ່ເປັນເອກະພາບກັນກ່ຽວກັບ ເນື້ອໃນຂອງກົດໝາຍວ່າດ້ວຍການຟື້ນຟູ ແລະ ການລົ້ມລະລາຍຂອງວິສາຫະກິດ ສະບັບປັບປຸງ ເພື່ອແກ້ໄຂວິສາຫະກິດທີ່ຢູ່ໃນສະພາວະລົ້ມລະລາຍ ຫຼື ໃກ້ຈະຢູ່ໃນສະພາວະລົ້ມລະລາຍ ທັງຮັບປະກັນການປົກປ້ອງຜົນປະໂຫຍດອັນຊອບທຳຂອງເຈົ້າໜີ້, ວິສາຫະກິດລູກໜີ້ ແລະ ບຸກຄົນອຶ່ນທີ່ກ່ຽວຂ້ອງ, ສ້າງຄວາມເຊື່ອໝັ້ນແກ່ລະບົບສິນເຊື່ອ ປົກປັກຮັກສາຄວາມໝັ້ນຄົງຂອງລະບົບກົດໝາຍວ່າດ້ວຍການລົ້ມລະລາຍຂອງວິສາຫະກິດ ຖືວ່າເປັນກົດໝາຍໜຶ່ງທີ່ມີຄວາມສໍາຄັນໃນການຮັບປະກັນສະຖຽນລະພາບທາງດ້ານການເງິນ ແລະ ລະບອບເສດຖະກິດ.
ກົດໝາຍດັ່ງກ່າວໄດ້ຖືກຮັບຮອງ ແລະ ປະກາດນໍາໃຊ້ໃນປີ 1994 ເປັນຕົ້ນມາ, ແຕ່ກົດໝາຍດັ່ງກ່າວ ແມ່ນບໍ່ໄດ້ມີການປັບປຸງຈັກເທື່ອ ແລະ ບໍ່ມີຈັກຄະດີ ທີ່ນໍາມາພິຈາລະນາ ຫຼື ດໍາເນີນການແກ້ໄຂຕາມກົນໄກ ຫຼື ຂັ້ນຕອນທີ່ກໍານົດໃນກົດໝາຍດັ່ງກ່າວ. ເພື່ອແກ້ໄຂ ແລະ ສ້າງສິ່ງອໍານວຍຄວາມສະດວກໃນການດໍາເນີນທຸລະກິດໃຫ້ດີຂຶ້ນ, ນາຍົກລັດຖະມົນຕີ ຈຶ່ງອອກຄໍາສັ່ງວ່າດ້ວຍການປັບປຸງລະບຽບການ ແລະ ກົນໄກການປະສານງານໃນການດໍາເນີນທຸລະກິດ ຢູ່ ສປປ ລາວ ສະບັບເລກທີ 02/ນຍ, ລົງວັນທີ 01 ກຸມພາ 2018, ຊຶ່ງມອບໃຫ້ກະຊວງຍຸຕິທໍາເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງໃນການປັບປຸງກົດໝາຍວ່າດ້ວຍການລົ້ມລະລາຍຂອງວິສາຫະກິດ ສະບັບປີ 1994.
ໃນກອງປະຊຸມຜູ້ເຂົ້າຮ່ວມໄດ້ຮັບຟັງການນຳສະເໜີກ່ຽວກັບຄວາມໝາຍຄວາມສຳຄັນ ຂອງການຟື້ນຟູ ແລະ ການລົ້ມລະລາຍຂອງວິສາຫະກິດ, ຂັ້ນຕອນໃນການດຳເນີນ ແລະ ບັນຫາສຳຄັນ ຈຳນວນໜຶ່ງ ຂອງກົດໝາຍວ່າດ້ວຍການຟື້ນຟູ ແລະ ການລົ້ມລາຍຂອງວິສາຫະກິດ. ໃນກອງປະຊຸມ ກໍໄດ້ມີການຖາມ-ຕອບ ແລະ ແລກປ່ຽນບົດຮຽນກ່ຽວກັບການຟື້ນຟູ ແລະ ການລົ້ມລະລາຍຂອງວິສາຫະກິດ ດ້ວຍບັນຍາກາດອັນດີ ແລະ ກົງໄປກົງມາ. ກົດໝາຍສະບັບດັ່ງກ່າວນີ້ ປະກອບມີ 11 ພາກ, 2 ໝວດ ແລະ 103 ມາດຕາ.
ໃນຕອນທ້າຍຂອງກອງປະຊຸມ, ທ່ານ ປອ ເສີມສຸກ ສິມພະວົງ, ປະທານກອງປະຊຸມ, ໄດ້ສະຫຼຸບຫົວຂໍ້ ແລະ ຜົນສໍາເລັດຂອງກອງປະຊຸມດັ່ງກ່າວ ພ້ອມທັງສະແດງຄວາມຂອບໃຈມາຍັງຜູ້ເຂົ້າຮ່ວມ ກໍຄືຜູ້ຕາງໜ້າຈາກພາກສ່ວນຕ່າງໆທີ່ເສຍສະຫຼະເວລາອັນມີຄ່າເຂົ້າຮ່ວມກອງປະຊຸມ ໂດຍສະເພາະໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ທີ່ໃຫ້ການສະໜັບສະໜູນການຈັດຕັ້ງປະຕິບັດການປັບປຸງ ແລະ ສ້າງຄວາມເຂັ້ມແຂງໃຫ້ແກ່ລະບົບຄຸ້ມຄອງການລົ້ມລະລາຍວິສາຫະກິດ ຂອງ ສປປ ລາວ.
