ກອງປະຊຸມຝຶກອົບຮົມ ວ່າດ້ວຍການຄຸ້ມຄອງບໍລິຫານການເງິນໂຄງການ, ວຽກການການຈັດຊື້-ຈັດຈ້າງ ແລະ ວຽກງານຂໍ້ມູນຂ່າວສານສໍາລັບໂຄງການ LCT
ນະຄອນຫຼວງວຽງຈັນ, ວັນທີ 05 ຕຸລາ 2020, ກົມແຜນການ ແລະ ການຮ່ວມມື, ກະຊວງອຸດສະຫະກໍາ ແລະ ການຄ້າ ໄດ້ຈັດກອງປະຊຸມຝຶກອົບຮົມ ພາຍໃຕ້ຫົວຂໍ້ ການຄຸ້ມຄອງບໍລິຫານການເງິນໂຄງການ, ວຽກງານການຈັດຊື້-ຈັດຈ້າງ ແລະ ວຽກງານຂໍ້ມູນຂ່າວສານສໍາລັບໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ (LCT Project), ຂຶ້ນທີ່ໂຮງແຮມ Crowne Plaza, ພາຍໃຕ້ການເປັນປະທານຂອງທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື. ກອງປະຊຸມດັ່ງກ່າວມີຜູ້ຕາງໜ້າຈາກພາກສ່ວນຈັດຕັ້ງປະຕິບັດໂຄງການ, ເຊິ່ງກໍແມ່ນບັນດາພະນັກງານຈາກກະຊວງ, ກົມກອງ ແລະ ພະແນກທີ່ກ່ຽວຂ້ອງ ລວມມີ 47 ທ່ານ.
ຈຸດປະສົງຂອງກອງປະຊຸມຝຶກອົບຮົມດັ່ງກ່າວ ແມ່ນເພື່ອຍົກລະດັບຄວາມຮູ້ຄວາມສາມາດທາງດ້ານການເງິນ, ການຈັດຊື້-ຈັດຈ້າງ ແລະ ຂໍ້ມູນຂ່າວສານໃຫ້ແກ່ພະນັກງານ ຈາກພາກສ່ວນຈັດຕັ້ງປະຕິບັດໂຄງການ ໂດຍຜ່ານປະສົບການ ຂອງພະນັກງານໂຄງການໂດຍກົງ. ກອງປະຊຸມດັ່ງກ່າວໄດ້ນໍາສະເໜີວຽກງານໃນການຄຸ້ມຄອງບໍລິຫານໂຄງການລວມທັງລະບຽບການ ແລະ ເງື່ອນໄຂຕ່າງໆ ແລະ ການກວດສອບຈາກບໍລິສັດກວດສອບພາຍນອກ, ວິທີການຂຶ້ນແຜນງົບປະມານໃນການຈັດກິດຈະກໍາຕ່າງໆ ລວມມີການຊໍາລະສະສາງເງິນລ່ວງໜ້າ ແລະ ການຄຸ້ມຄອງພາຫະນະ ແລະ ການຕິດຕາມຊັບສົມບັດຂອງໂຄງການ, ລະບຽບຂັ້ນຕອນໃນການຈັດຊື້ຈັດຈ້າງ ແລະ ຄວາມສໍາຄັນຂອງວຽກງານຂໍ້ມູນຂ່າວສານ. ໃນລະຫວ່າງການຝຶກອົບຮົມ, ຜູ້ເຂົ້າຮ່ວມໄດ້ມີໂອກາດໃນການຖາມ-ຕອບກ່ຽວກັບຫົວຂໍ້ຕ່າງໆ, ລົງມືປະຕິບັດຕົວຈິງໂດຍການທົດລອງຂຶ້ນແຜນງົບປະມານການຈັດກອງປະຊຸມ, ແລະ ໄດ້ຮ່ວມກິດຈະກໍາເສີມສ້າງຄວາມສາມັກຄີພາຍໃນອົງກອນ, ເຮັດບັນຍາກາດຂອງກອງປະຊຸມມີຄວາມເປັນກັນເອງຫຼາຍຂຶ້ນ.
