ກະຊວງອຸດສາຫະກໍາ ແລະ ການຄ້າ ຮ່ວມກັບ ADB ຈັດກອງປະຊຸມທາງໄກ ເພື່ອເຜີຍແຜ່ບົດປະເມີນ ນະໂຍບາຍສົ່ງເສີມເສດຖະກິດລາວ ເພື່ອເພີ່ມຜະລິດຕະພາບທຸລະກິດ ແລະ ການຈ້າງງານ ຂະແໜງການຄ້າ ແລະ ການລົງທຶນ

ໃນວັນທີ 15 ທັນວາ 2020. ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ໄດ້ຈັດກອງປະຊຸມທາງໄກເພື່ອເຜີຍແຜ່ບົດປະເມີນນະໂຍບາຍສົ່ງເສີມເສດຖະກິດລາວ ເພື່ອເພີ່ມຜະລິດຕະພາບທຸລະກິດ ແລະ ການຈ້າງງານບົດປະເມີນ ຂະແໜງການຄ້າ ແລະ ການລົງທຶນ ພາຍໃຕ້ການສະໜັບສະໜູນດ້ານວິຊາການ ຈາກ ທະນາຄານພັດທະນາ ອາຊີ (ADB) ພາຍໃຕ້ຫົວຂໍ້ “ນະໂຍບາຍສົ່ງເສີມເສດຖະກິດລາວ ເພື່ອເພີ່ມຜະລິດຕະພາບທຸລະກິດ ແລະ ການຈ້າງງານ”. ກອງປະຊຸມດັ່ງກ່າວໃຫ້ກຽດເປັນປະທານໂດຍ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ. ໂດຍມີຜູ້ຕາງໜ້າຈາກສະຖາບັນຄົ້ນຄວ້າເສດຖະກິດການຄ້າ, ບັນດາກົມກ່ຽວຂ້ອງພາຍໃຕ້ ກະຊວງ ອຄ, ກະຊວງແຜນການ ແລະ ການລົງທຶນ ແລະ ຜູ້ເຂົ້າຮ່ວມຜ່ານລະບົບອ່ອນລາຍຈາກສຳນັກງານໃຫຍ່ ADB ປະຈຳລາວ, ສິງກະໂປ ແລະ ມາເລເຊຍ ລວມທັງໝົດ 50 ທ່ານ. ຈຸດປະສົງຂອງກອງປະຊຸມເພື່ອເຜີຍແຜ່ຂໍ້ມູນ ກ່ຽວກັບບົດປະເມີນນະໂຍບາຍສົ່ງເສີມເສດຖະກິດລາວ ເພື່ອເພີ່ມຜະລິດຕະພາບທຸລະກິດ ແລະ ການຈ້າງງານບົດປະເມີນ ຂະແໜງການຄ້າ ແລະ ການລົງທຶນ ໃຫ້ພາກລັດທີ່ກ່ຽວຂ້ອງໄດ້ມີຄຳຄິດຄຳເຫັນ ຕໍ່ບົດປະເມີນດັ່ງກ່າວເພື່ອນຳໄປປັບປຸງ.

ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ເນັ້ນໜັກເຖິງຜົນກະທົບຂອງການລະບາດ COVID-19 ຕໍ່ກັບຂະແໜງການຄ້າ ແລະ ການລົງທຶນ, ໂດຍສະເພາະແມ່ນການຈ້າງງານທີ່ຫຼຸດລົງ ເນື່ອງຈາກການຜະລິດໄດ້ຢູດຕິຊົ່ວຄາວ, ເຊິ່ງສົ່ງຜົນກະທົບຕໍ່ຕ່ອງໂສ້ການຜະລິດທັງພາຍໃນ ແລະ ຕ່າງປະເທດ. ເຊິ່ງປະຈຸບັນ, ກະຊວງອຸດສາຫະກໍາ ແລະ ການຄ້າ ກໍາລັງເຮັດບົດວິໄຈການເຊື່ອມໂຍງເຂົ້າສາກົນດ້ານການຄ້າ ຄັ້ງທີ ສອງ. ຈຸດປະສົງເພື່ອລົງເລິກວິໄຈ ແລະ ນໍາເອົາຄໍາແນະນໍາໃນການຈັດຕັ້ງປະຕິບັດ ໃນແຜນງານການພັດທະນາຂະແໜງການຄ້າ ແລະ ພາກເອກະຊົນມາຜັນຂະຫຍາຍ, ໂດຍສະເພາະປະຈຸບັນ ການພັດທະນາແມ່ນແນໃສ່ຂະແໜງກະສິກໍາ, ການທ່ອງທ່ຽວ, ການຜະລິດໃນຮູບແບບໂຮງຈັກໂຮງງານ, ແລະ ທົບທວນແຜນ ຈັດຕັ້ງປະຕິບັດຜ່ານມາ. ບົດວິໄຈດັ່ງກ່າວ ແມ່ນອີງໃສ່ການຄົ້ນຄວ້າຈາກບົດລາຍງານຜ່ານມາ, ບົດວິໄຈ ແລະ ການປຶກສາຫາລືກັບ ຂະ ແໜງການກ່ຽວຂ້ອງ.

ກອງປະຊຸມໄດ້ເປີດໂອກາດໃຫ້ຊ່ຽວຊານ ນຳສະເໜີຈຸດປະສົງຂອງກາເຮັດບົດປະເມີນ ແລະ ຜົນໄດ້ຮັບ ໂດຍ ທ່ານນາງ ຄັນຢາ ຊັນຢານິ, ຜູ້ຕາງໜ້າຈາກ ADB ໄດ້ນຳສະເໜີກ່ຽວກັບຄວາມສຳຄັນ ບົດປະເມີນຂະແໜງການຄ້າ ແລະ ການລົງທຶນ. ພ້ອມທັງ ທີມຊ່ຽວຊານຈາກ ADB ໄດ້ນໍາສະເໜີລົງເລິກໃນຫົວຂໍ້ “ນະໂຍບາຍທາງເສດຖະກິດໃນການສົ່ງເສີມການຜະລິດ ແລະ ການຈ້າງງານ”. ພ້ອມກຽວກັນນີ້ກອງປະຊຸມ ໄດ້ເປີດໂອກາດໃຫ້ຜູ້ເຂົ້າຮ່ວມປະກອບຄຳຄິດຄຳເຫັນ ແລະ ປຶກສາຫາລືຢ່າງກົງໄປກົງມາ. ໃນຕອນທ້າຍຂອງກອງປະຊຸມ, ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ສະແດງຄວາມຂອບໃຈມາຍັງຜູ້ຕາງໜ້າຈາກ ADB ແລະ ຜູ້ເຂົ້າຮ່ວມທີ່ໄດ້ປະກອບສ່ວນເຂົ້າໃນກອງປະຊຸມໃນຄັ້ງນີ້.