ກອງປະຊຸມຄະນະຄຸ້ມຄອງ ແລະ ຈັດຕັ້ງປະຕິບັດໂຄງການສ້າງແວດລ້ອມທີ່ເອື້ອອໍານວຍຕໍ່ທຸລະກິດລາວ ຄັ້ງທີ 2

ວັນທີ 3 ສິງຫາ 2021, ນະຄອນຫຼວງວຽງຈັນ. ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຄະນະຄຸ້ມຄອງ ແລະ ຈັດຕັ້ງປະຕິບັດ ໂຄງການສ້າງສະພາບແວດລ້ອມທີ່ເອື້ອອໍານວຍ ຕໍ່ທຸລະກິດລາວ ຄັ້ງທີ 2 ຂຶ້ນທີ່ ໂຮງແຮມ ແລນມາກ, ພາຍໃຕ້ການເປັນປະທານຮ່ວມຂອງ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ທ່ານ ໄມເຄິລ໌ ຣອນນິ້ງ, ຜູ້ຕາງໜ້າ ອົງການພັດທະນາສາກົນຂອງປະເທດສະຫະລັດອາເມລິກາ (USAID). ນອກນັ້ນ, ຍັງມີຕາງໜ້າຂະແໜງການທີ່ກ່ຽວຂ້ອງຈາກກະຊວງອຸດສາຫະກໍາ ແລະ ການຄ້າ, ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ກະຊວງເຕັກໂນໂລຊີ ແລະ ການສື່ສານ, ກະຊວງຍຸຕິທໍໍາ, ສະພາ ການຄ້າ ແລະ ອຸດສາຫະກໍາແຫ່ງ ຊາດລາວ, ຂະແໜງການທີ່ກ່ຽວຂ້ອງຂອງ ແຂວງຈໍາປາສັກ ແລະ ຕາງໜ້າຈາກບັນດາຄູ່ຮ່ວມພັດທະນາ ເຂົ້າຮ່ວມ.

ຈຸດປະສົງຂອງກອງປະຊຸມ ແມ່ນເພື່ອປະເມີນ ແລະ ທົບທວນຄືນການຈັດຕັ້ງປະຕິບັດໂຄງການ ໃນໄລຍະ 6 ເດືອນທີ່ຜ່ານມາ ຕັ້ງແຕ່ ເດືອນມັງກອນ ເຖິງ ມິຖຸນາ 2021 ແລະ ແຜນວຽກການຈັດຕັ້ງປະຕິບັດໂຄງການສໍາລັບ 6 ເດືອນຕໍ່ ໜ້າ ຈົນເຖິງເດືອນທັນວາ ປີ 2021.

ໃນບົດກ່າວເປີດກອງປະຊຸມ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານໄດ້ກ່າວຊົມເຊີຍຜົນສໍາເລັດ ແລະ ຄວາມຄືບໜ້າຂອງໂຄງການ, ການຮັບມືກັບສິ່ງທ້າທາຍຈາກການລະບາດຂອງ ພະຍາດ COVID-19 ເພື່ອໃຫ້ໂຄງການສາມາດສືບຕໍ່ຈັດຕັ້ງປະຕິບັດໄດ້ຕາມແຜນທີ່ກໍານົດໄວ້. ພ້ອມນັ້ນ, ທ່ານ ຍັງໄດ້ຊຸກຍູ້ໃຫ້ທາງໂຄງການເອົາໃຈໃສ່ໃນການກໍານົດວາງແຜນກິດຈະກໍາພາຍໃຕ້ ສາມອົງປະກອບ ໃຫ້ມີຄວາມເຊື່ອມໂຍງກັນຫຼາຍຂຶ້ນ ແລະ ເພີ່ມທະວີການຮ່ວມມືກັບບັນດາໂຄງການຕ່າງໆ, ເຊັ່ນ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ, ໂຄງການເຂົ້າເຖິງແຫຼ່ງທຶນຂອງ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSME) ແລະ ໂຄງການອື່ນໆ, ທີ່ໃຫ້ການຊ່ວຍເຫຼືອ ວຽກງານການປັບປຸງສະພາບແວດລ້ອມການດໍາເນີນທຸລະກິດ ແລະ ການສ້າງຂີດຄວາມສາມາດໃຫ້ແກ່ພາກທຸລະ ກິດລາວ.

ທ່ານ ໄມເຄິລ໌ ຣອນນິ້ງ, ຜູ້ຕາງໜ້າອົງການພັດທະນາສາກົນຂອງປະເທດສະຫະລັດອາເມລິກາ (USAID) ໄດ້ມີຄໍາເຫັນຕໍ່ກອງປະຊຸມ ໂດຍໄດ້ສະແດງຄວາມຂອບໃຈມາຍັງກະຊວງອຸດສາຫະກໍາ ແລະ ການຄ້າ ສໍາລັບ ການຮ່ວມມືທີ່ແໜ້ນແຟ້ນລະຫວ່າງ ກະຊວງອຸດສາຫະກໍາ ແລະ ການຄ້າ ກັບອົງການ USAID, ການສະໜັບສະໜູນ ແລະ ອໍານວຍຄວາມສະດວກ ເຮັດໃຫ້ໂຄງການສ້າງສະພາບແວດລ້ອມທີ່ເອື້ອອໍານວຍ ຕໍ່ທຸລະກິດລາວ ສາມາດຈັດຕັ້ງປະຕິບັດ ແລະ ໄດ້ຮັບຜົນສໍາເລັດຕາມຄາດໝາຍ.

ກອງປະຊຸມດັ່ງກ່າວ ໄດ້ດໍາເນີນເປັນເວລາເຄິ່ງມື້. ຜູ້ເຂົ້າຮ່ວມໄດ້ຮັບຟັງການການນໍາສະເໜີກ່ຽວກັບຜົນສໍາເລັດຂອງ ໂຄງການໃນໄລຍະ 6 ເດືອນຜ່ານມາລວມທັງຜົນການປະເມີນຄັດເລືອກຂະແໜງຫັດຖະກໍາ ເປັນຂະແໜງບູລິມະສິດທີສາມ ແລະ ສິນຄ້າຫັດຖະກໍາທີ່ເປັນເປົ້າໝາຍສໍາລັບການສະໜັບສະໜູນຂອງໂຄງການ. ພ້ອມນັ້ນ, ໂຄງການ ກໍໄດ້ນໍາສະເໜີແຜນວຽກ ແລະ ກິດຈະກໍາບູລິມະສິດຂອງໂຄງການສໍາລັບເດືອນກໍລະກົດ ເຖິງ ທ້າຍປີ 2021 ເຊິ່ງກອງປະຊຸມກໍໄດ້ເປີດໂອກາດໃຫ້ຜູ້ເຂົ້າຮ່ວມ ແລກປ່ຽນສົນທະນາ ແລະ ປະກອບຄໍາເຫັນຕໍ່ແຜນວຽກທີ່ໄດ້ສະເໜີ. ໃນຕອນທ້າຍຂອງກອງປະຊຸມ, ໄດ້ຕົກລົງເຫັນດິ ດ້ານຫຼັກການຮັບຮອງເອົາແຜນວຽກ ສະບັບດັ່ງກ່າວ.

ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.