ກອງປະຊຸມ “ພາກທຸລະກິດ ລະດັບພາກພື້ນອິນໂດ-ປາຊີຟິກ” ສໍາລັບ ສປປ ລາວ ປະຈໍາປີ ຄັ້ງທີ ສອງ, ໂດຍ ລັດຖະບານສະຫະລັດ ອາເມລິກາ ແລະ ສະພາການຄ້າ ແລະ ອຸດສາຫະກໍາ ແຫ່ງຊາດລາວ

ນະຄອນຫຼວງວຽງຈັນ, ສປປ ລາວ, 29 ຕຸລາ — ລັດຖະບານ ສະຫະລັດອາເມລິກາ, ຮ່ວມກັບ ສະພາການຄ້າ ແລະ ອຸດສາຫະຫໍາ ແຫ່ງຊາດລາວ (ສຄອຊ) ແລະ ກະຊວງ ອຸດສາຫະກໍາ ແລະ ການຄ້າ (ກະຊວງ ອຄ), ໄດ້ຈັດກອງປະຊຸມ “ພາກທຸລະກິດ ລະດັບພາກພື້ນ ອິນໂດ-ປາຊີຟິກ” ສໍາລັບລາວ ເປັນປີທີສອງຕິດຕໍ່ກັນ, ເຊິ່ງເປັນກອງປະຊຸມທີ່ຈັດຄຽງຄູ່ກັນກັບ ກອງປະຊຸມພາກທຸລະກິດ ລະດັບພາກພື້ນອິນໂດ-ປາຊິຟິກ ທີ່ຈັດຂຶ້ນທີ່ ປະເທດ ອິນເດຍ. ກອງປະຊຸມຜ່ານລະບົບທາງໄກນີ້ ໄດ້ຮັບກຽດການເປັນປະທານຮ່ວມໂດຍ ທ່ານ ປີເຕີ ເຮມອນ, ເອກອັກຄະລັດຖະທູດ ສະຫະລັດ ອາເມລິກາ ປະຈໍາ ສປປ ລາວ, ແລະ ທ່ານ ອຸເດດ ສຸວັນນະວົງ, ປະທານ ສຄອຊ. ກອງປະຊຸມດັ່ງກ່າວໄດ້ຮັບກຽດເຂົ້າຮ່ວມໂດຍ ພະນັກງານລັດຖະກອນອາວຸໂສ, ຜູ້ຕາງໜ້າຈາກສະຖານທູດສະຫະລັດອາເມລິການ ແລະ ຄຸ່ຮ່ວມພັດທະນາ, ບັນດາອໍານວຍການອຸດສາຫະກໍາ, ບັນດາຫົວໜ່ວຍທຸລະກິດ, ທັງພາຍໃນ ສປປ ລາວ ແລະ ປະຈໍາພາກພື້ນ.

ກອງປະຊຸມດັ່ງກ່າວ ໄດ້ແນໃສ່ການນໍາໃຊ້ເຄື່ອງມືດິຈິຕອນເຂົ້າໃນການຟື້ນຟູເສດຖະກິດ ເນື່ອງຈາກຜົນກະທົບຂອງການລະບາດຂອງ ໂຄວິດ-19. ກອງປະຊຸມດັ່ງກ່າວໄດ້ເປີດໂອກາດ ໃຫ້ແກ່ຜູ້ນໍາທາງທຸລະກິດຈາກ ສປປ ລາວ, ໄທ, ກໍາປູເຈຍ, ແລະ ສະຫະລັດອາເມລິກາ ໃນການແລກປ່ຽນຄວາມຄິດເຫັນກ່ຽວກັບແນວໂນ້ມການນໍາໃຊ້ເຄື່ອງມືດິຈິຕອນ ແລະ ສົນທະນາກ່ຽວກັບວິທີການປັບຕົວ ແລະ ກ້າວໄປສູ່ສະພາບແວດລ້ອມເສດຖະກິດໃໝ່ ພາຍຫຼັງການລະບາດຂອງ ໂຄວິດ-19 ສິ້ນສຸດລົງ.

ໃນພິທີກ່າວເປີດ, ທ່ານເອກອັກຄະລັດຖະທູດ ໄດ້ເນັ້ນໜັກເຖິງການຮ່ວມມື ຂອງລັດຖະບານ ສະຫະລັດອາເມລິກາ ແລະ ສປປ ລາວ ໃນການສະໜັບສະໜູນບັນດາທຸລະກິດໃນໄລຍະທີ່ທ້າທາຍນີ້. ທ່ານເອກອັກຄະລັດຖະທູດ ເຮມອນ ໄດ້ກ່າວວ່າ: “ປີນີ້, ລັດຖະບານ ສະຫະລັດອາເມລິກາ ໄດ້ສະເຫຼີມສະຫຼອງການເປັນຄູ່ຮ່ວມພັດທະນາ ກັບ ລັດຖະບານ ສປປ ລາວ ຄົບຮອບ ຫ້າປີ. ສະຫະລັດອາເມລິກາໄດ້ໃຫ້ຄໍາໝັ້ນສັນຍາທີ່ຈະໃຫ້ການສະໜັບສະໜູນ ສປປ ລາວ, ບໍ່ພຽງແຕ່ການແກ້ໄຂສິ່ງທ້າທາຍດ້ານເສດຖະກິດໃນປັດຈຸບັນ, ແຕ່ກໍສະໜັບສະໜູນການຟື້ນຟູເສດຖະກິດ ແລະ ສ້າງຄວາມຈະເລີນຮຸ່ງເຮືອງພາຍຫຼັງໂຄວິດ-19 ໃນປີຕໍ່ໆໄປ.”

“ໃນໄລຍະມີການລະບາດຂອງ ໂຄວິດ-19, ເຕັກໂນໂລຊີຍິ່ງເຂົ້າມາມີບົດບາດສູງຂື້ນ ໃນການດໍາເນີນທຸລະກິດຂອງວິສາຫະກິດຂະໜາດນ້ອຍ ແລະ ກາງ ໃນຍຸກປົກກະຕິແບບໃໝ່. ທຸລະກິດມີຄວາມຕັ້ງໃຈໃນການນໍາໃຊ້ເຄື່ອງມືດິຈິຕອນຫຼາຍຂື້ນ. ທະນາຄານໄດ້ເລີ່ມມີການໃຫ້ບໍລິການ ຜ່ານລະບົບດິຈິຕອນ ເພື່ອອໍານວຍຄວາມສະດວກສະບາຍໃຫ້ແກ່ຜູ້ຊົມໃຊ້ ໃນການດໍາເນີນທຸລະກໍາຕ່າງໆ. ຮ້ານຂາຍເຄື່ອງ, ຮ້ານຄ້າ, ແລະ ຮ້ານຂາຍເຄື່ອງຍ່ອຍ ໄດ້ປັບປຸງຮູບແບບການດໍາເນີນທຸລະກິດ ໂດຍເນັ້ນໃສ່ການສັ່ງເຄື່ອງຜ່ານລະບົບອອນລາຍ ແລະ ການບໍລິການຂົນສົ່ງ. ໂຮງຮຽນຈໍານວນຫຼາຍ ແລະ ບັນດາມະຫາວິທະຍາໄລ, ໂດຍສະເພາະ ໃນນະຄອນຫຼວງວຽງຈັນ, ແມ່ນໄດ້ປ່ຽນເປັນການຮຽນຜ່ານລະບົບອອນລາຍ.” ກ່າວໂດຍ ທ່ານ ອຸເດດ.

ປັດຈຸບັນເປັນປີທີສີ່ທີ່ກອງປະຊຸມດັ່ງກ່າວໄດ້ຈັດຂຶ້ນ, ເພື່ອສົ່ງເສີມການຄ້າ, ການລົງທຶນ ແລະ ການຮ່ວມມືທາງເສດຖະກິດ ລະຫວ່າງ ສະຫະລັດອາເມລິກາ ແລະ ຄຸ່ຮ່ວມພັດທະນາໃນພາກພື້ນອິນໂດ-ປາຊິຟິກ. ປີນີ້ກອງປະຊຸມລະດັບພາກພື້ນໄດ້ເນັ້ນໃຫ້ເຫັນເຖິງ ກາລະໂອກາດສໍາລັບບໍລິສັດສະຫະລັດອາເມລິກາ ແລະ ຄຸ່ຮ່ວມມືອິນໂດ-ປາຊິຟິກ ໃນການເປັນຜູ້ນໍາເພື່ອພັດທະນາເສດຖະກິດຂອງໃນລະດັບພາກພື້ນ, ເຊິ່ງກວມເອົາແຜນຍຸດທະສາດອິນໂດ-ປາຊິຟິກ ນໍາພາໂດຍລັດຖະບານສະຫະລັດອາເມລິກາ ທີ່ຕິດພັນກັບການຟຶ້ນຟູເສດຖະກິດ ແລະ ຄວາມສະຖຽນລະພາບ, ແຜນຈັດຕັ້ງປະຕິບັດເພື່ອຮັບມືກັບໄພທໍາມະຊາດທີ່ອາດຈະເກີດຂຶຶ້ນຈາກການປ່ຽນແປງສະພາບອາກາດ, ແລະ ນະວັດຕະກໍາດິຈິຕອນ.

ກອງປະຊຸມດັ່ງກ່າວໄດ້ດໍາເນີນຕາມວາລະທີ່ໄດ້ວາງໄວ້, ເຊິ່ງໄດ້ລວມເອົາການປຶກສາຫາລື ລະດັບທ້ອງຖິ່ນ ແລະ ພາກພື້ນ ໂດຍໄດ້ຮັບກຽດຈາກຜູ້ຕາງໜ້າບໍລິສັດເຕັກໂນໂລຊີ, ເຊັ່ນ: ໂລກາ (LOCA), ຟູດແພນດາ (Food Panda) ແລະ ອາດີເຄລາວ (RDK), ລາຍແມນວົງໃນ (LINE MAN Wongnai ຈາກ ປະເທດ ໄທ), ບູດ (Boost) (ສະຖາບັນການເງິນດິຈິຕອນຈຸລະພາກ ກໍາປູເຈຍ), ແລະ ໂຊຊຽວກີບເວີ (SocialGiver ຈາກ ປະເທດ ໄທ) ພາຍໃຕ້ຫົວຂໍ້: “ການເສີມຂະຫຍາຍຄວາມສາມາດໃນການນໍາໃຊ້ເຄື່ອງມືດີຈີຕອນຂອງ SMEs ລາວ ເພື່ອເລັ່ງການຟື້ນຟູເສດຖະກິດຈາກຜົນກະທົບຂອງການລະບາດຂອງ ໂຄວິດ-19 ແລະ ສ້າງພື້ນຖານວຽກງານສໍາລັບການຂະຫຍາຍຕົວຂອງທຸລະກີດໃນໄລຍະຍາວ” ແລະ “ວິທີການຂອງຜູ້ນໍາທາງເຕັກໂນໂລຊີ ແລະ ນະວັດຕະກໍາ ໃນການຮັບມືກັບຜົນກະທົບຂອງການລະບາດຂອງ ໂຄວິດ-19”.

ກອງປະຊຸມດັ່ງກ່າວນີ້ຍັງສະເໜີລິ້ງເພື່ອເຂົ້າຮັບຟັງການນໍາສະເໜີ ແລະ ປຶຶກສາຫາລືໃນກອງປະຊຸມກຸ່ມນັກທຸລະກິດໃນຂະແໜງເຕັກໂນໂລຊີ Fortune 500 ໃນລະດັບພາກພື້ນ ຜ່ານລະບົບກອງປະຊຸມທາງໄກ ກ່ຽວກັບຖານເກັບກໍາຂໍ້ມູນໃນລະບົບ ຄລາວ ແລະ ການປ້ອງກັນຄວາມປອດໄພທາງໄຊເບີ. ໃນຂະນະດຽວກັນ, ພາຍໃນກອງປະຊຸມຍັງໄດ້ສະເໜີບົດກ່າວທີ່ສໍາຄັນຈາກຫົວໜ້າຫ້ອງການທຸລະກິດຂອງ Google ທີ່ຮັບຜິດຊອບວຽກງານໃນປະເທດຫວຽດນາມ, ສປປ ລາວ ແລະ ກໍາປູເຈຍ, ເຊິ່ງໄດ້ປຶຶກສາຫາລືກ່ຽວກັບແນວຄວາມຄິດລິເລີ່ມຂອງ Google ທີ່ຕິດພັນກັບການຟື້ນຟູເສດຖະກິດ ແລະ ຄວາມສະຖຽນລະພາບໃນພາກພື້ນ, ເຊິ່ງໄດ້ຮັບຜົນກະທົບຈາກການລະບາດຂອງ ໂຄວິດ-19.

ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.