ໂຄງການ LCT ລາຍງານຜົນສໍາເລັດ ຈາກການຈັດຕັ້ງປະຕິບັດໂຄງການ ໃນກອງປະຊຸມຄະນະຄຸ້ມຄອງ ແລະ ຈັດຕັ້ງປະຕິບັດໂຄງການ ຄັ້ງທີ 6

ນະຄອນຫຼວງວຽງຈັນ, ວັນທີ 07 ທັນວາ 2021, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຄະນະຄຸ້ມຄອງ ແລະ ຈັດຕັ້ງປະຕິບັດໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (Lao Competitiveness and Trade Project – LCT) ຂຶ້ນ, ເພື່ອທົບທວນການຈັດຕັ້ງປະຕິບັດໂຄງການພາຍໃນ 6 ເດືອນທີ່ຜ່ານມາ ແລະ ຮັບຮອງແຜນບູລິມະສິດໃນການຈັດຕັ້ງປະຕິບັດໂຄງການໃນປີ 2022. ກອງປະຊຸມດັ່ງກ່າວໄດ້ຮັບກຽດເປັນປະທານໂດຍ ທ່ານ ບຸນເຖິງ ດວງສະຫວັນ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ. ກອງປະຊຸມດັ່ງກ່າວໄດ້ໃຫ້ກຽດເຂົ້າຮ່ວມໂດຍບັນດາຜູ້ຕາງໜ້າຈາກກະຊວງ ແລະ ກົມກອງທີ່ກ່ຽວຂ້ອງ, ກໍຄື ພາກສ່ວນຈັດຕັ້ງປະຕິບັດໂຄງການ, ບັນດາຜູ້ໃຫ້ທຶນ ແລະ ຄູ່ຮ່ວມພັດທະນາ ຫຼາຍກວ່າ 90 ທ່ານ, ເຊິ່ງຜູ້ເຂົ້າຮ່ວມບາງສ່ວນແມ່ນເຂົ້າຮ່ວມຜ່ານລະບົບປະຊຸມທາງໄກ.
ທ່ານ ບຸນເຖິງ ດວງສະຫວັນ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າໄດ້ກ່າວເປີດກອງປະຊຸມວ່າ:“ກອງປະຊຸມໃນມື້ນີ້ ແມ່ນໄດ້ຈັດຂຶ້ນໃນລະຫວ່າງການລະບາດຂອງ ໂຄວິດ-19 ໃນ ສປປ ລາວ, ເຊິ່ງສົ່ງຜົນກະທົບຕໍ່ສະພາບເສດຖະກິດຂອງ ສປປ ລາວ ແລະ ຈໍາເປັນຕ້ອງປະຢັດງົບປະມານປະຈໍາປີ – ເຊິ່ງສົ່ງຜົນເຮັດໃຫ້ຄວາມຕ້ອງການທົ່ວໂລກຫຼຸດລົງຢ່າງກະທັນຫັນ, ຈົນສົ່ງຜົນກະທົບຕໍ່ຕ່ອງໂສ້ດ້ານຜູ້ສະໜອງ ແລະ ເຮັດໃຫ້ລາຍຮັບຈາກການທ່ອງທ່ຽວ ແລະ ເງິນສົ່ງກັບບ້ານຂອງແຮງງານຈາກຂະແໜງການຕ່າງໆຫຼຸດລົງຢ່າງຫຼວງຫຼາຍ. ໃນຂະນະດຽວກັນ, ວິກິດການດັ່ງກ່າວເຮັດໃຫ້ບັນດາໂຄງການຕ່າງໆຕ້ອງແນໃສ່ປັບປຸງວຽກງານທີ່ຈໍາເປັນໃນການຟື້ນຟູເສດຖະກິດຈາກຜົນກະທົບດັ່ງກ່າວ. ດັ່ງນັ້ນ, ຂ້າພະເຈົ້າຈຶ່ງຂໍຖືໂອກາດນີ້ສະແດງຄວາມຂອບໃຈມາຍັງບັນດາຄູ່ຮ່ວມພັດທະນາເຊັ່ນ: ລັດຖະບານ ອົດສະຕຣາລີ, ລັດຖະບານ ໄອແລນ, ລັດຖະບານ ອາເມລິກາ ແລະ ທະນາຄານໂລກ ທີ່ສະໜັບສະໜູນໂຄງການ LCT ທີ່ໄດ້ປະກອບທຶນຮ່ວມເຂົ້າກອງທຶນສົມທົບຫຼາຍຝ່າຍ ຫຼື Multi-Donor Trust Fund. ນອກຈາກນີ້, ຂ້າພະເຈົ້າຂໍສະແດງຄວາມຍິນດີຕໍ່ໂຄງການ LCT ທີ່ໄດ້ຮັບການເພິີ່ມທຶນເຂົ້າໂຄງການ (Additional Financing), ເຊິ່ງຫາກໍ່ໄດ້ເຊັນຮັບຮອງໃນເດືອນ ຕຸລາ ທີ່ຜ່ານມານີ້.”

ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ສັງລວມຄວາມຄືບໜ້າ ແລະ ສິ່ງທ້າທາຍໃນການຈັດຕັ້ງປະຕິບັດໂຄງການ LCT ແລະ ແຜນບູລິມະສິດໃນການຈັດຕັ້ງປະຕິບັດໂຄງການໃນປີ 2022 ໂດຍຫຍໍ້. ການລາຍງານດັ່ງກ່າວໄດ້ສັງລວມເອົາວຽກງານທັງສີ່ເສົາຄໍ້າ, ເຊິ່ງປະກອບມີ, ເສົາຄໍ້າ ກ – ປັບປຸງຂະບວນການຈົດທະບຽນກໍ່ຕັ້ງວິສາຫະກິດໃຫ້ງ່າຍດາຍຂຶ້ນ, ປັບປຸງ ແລະ ເຜີຍແຜ່ຂອດການອອກໃບອະນຸຍາດດໍາເນີນທຸລະກິດ ແລະ ສະໜັບສະໜູນການປັບປຸງທຸລະກິດທີ່ກ້ວາງຂວາງກວ່າເກົ່າ, ເສົາຄໍ້າ ຂ – ສະໜັບສະໜູນກອງເລຂາອໍານວຍຄວາມສະດວກທາງດ້ານການຄ້າ, ທຶນສະໜັບສະໜູນໂຄງການຍ່ອຍເພື່ອອໍານວຍຄວາມສະດວກດ້ານການຄ້າ, ເສົາຄໍ້າ ຄ – ປັບປຸງຄວາມສາມາດໃນການແຂ່ງຂັນໃຫ້ພາກທຸລະກິດໂດຍຜ່ານ ທຶນສົມທົບເພື່ອສົ່ງເສີມທຸລະກິດ ແລະ ເສົາຄໍ້າ ງ – ຄຸ້ມຄອງ ແລະ ປະສານງານໂຄງການ, ປັບປຸງການສ້າງນະໂຍບາຍ ແລະ ຄວາມໂປ່ງໄສ ແລະ ສະໜັບສະໜູນການຮ່ວມມືລະຫວ່າງພາກລັດ ແລະ ພາກທຸລະກິດ. ໃນລະຫວ່າງກອງປະຊຸມ, ຜູ້ເຂົ້າຮ່ວມໄດ້ມີໂອກາດປະກອບສ່ວນຖາມຕອບ ແລະ ປຶກສາຫາລືກ່ຽວກັບສິ່ງທ້າທາຍ ແລະ ແຜນຈັດຕັ້ງປະຕິບັດໃນຕໍ່ໜ້າ.
ກອງປະຊຸມໄດ້ລາຍງານຜົນສໍາເລັດຈາກການຈັດຕັ້ງປະຕິບັດໂຄງການ LCT ທີ່ຜ່ານມາ, ເຊິ່ງປະກອບມີດັ່ງນີ້:
• ມາດຕະການຫຼຸດຜ່ອນຂັ້ນຕອນການເລີ່ມຕົ້ນທຸລະກິດທີ່ສັ້ນ ແລະ ງ່າຍດາຍກ່ວາເກົ່າ, ເຊິ່ງປະກອບມີ ການຮັບຮອງແຜນຈັດຕັ້ງປະຕິບັດເພື່ອປັບປຸງຂັ້ນຕອນດັ່ງກ່າວ ແລະ ການລຶບລ້າງຂອດຂັ້ນການຈົດທະບຽນ ແລະ ການປະຖົມນິເທດຂອງອາກອນມູນຄ່າເພີ່ມ (VAT), ເຊິ່ງເປັນເງື່ອນໄຂສໍາຄັນໃນການຈົດທະບຽນວິສາຫະກິດຜ່ານລະບົບ Online;
• ສໍາເລັດການກະກຽມຄໍາແນະນໍາ ແລະ ສ້າງເປັນລະບົບຖານຂໍ້ມູນກ່ຽວກັບການຂໍອະນຸຍາດການດໍາເນີນທຸລະກິດ ຫຼື Inventory of Businerss Licenses (IBL), ແລະ ສ້າງກົນໄກການປະສານງານພາຍໃນກະຊວງ ແລະ ບັນດາກະຊວງອ້ອມຂ້າງເພື່ອດຳເນີນຂະບວນການປັບປຸງການຂໍອະນຸຍາດການດໍາເນີນທຸລະກິດຂອງຂະແໜງການ;
• ການປັບປຸງກົນໄກຕິດຕາມຄວາມຄືບໜ້າຂອງການຈັດຕັ້ງປະຕິບັດການປັບປຸງສະພາບແວດລ້ອມໃນການດໍາເນີນທຸລະກິດ ຕາມ ຄຳສັ່ງ ເລກທີ 02/ນຍ ແລະ 03/ນຍ;
• ຄະນະກໍາມະການອໍານວຍຄວາມສະດວກດ້ານການຄ້າແຫ່ງຊາດ (NTFC) ໄດ້ອອກແຈ້ງການກ່ຽວກັບການປັບປຸງວຽກງານການບໍລິຫານຄວາມສ່ຽງຢູ່ດ່ານຮ່ວມກັບບັນດາກົມອ້ອມຂ້າງທີ່ກ່ຽວຂ້ອງ;
• ສໍາເລັດການສຶກສາເວລາກວດປ່ອຍສິນຄ້າ ຢູ່ ສປປ ລາວ ແລະ ການສໍາຫຼວດຄວາມຄິດເຫັນຂອງພາກເອກະຊົນ ກ່ຽວກັບການຈັດຕັ້ງປະຕິບັດ ສັນຍາອໍານວຍຄວາມສະດວກດ້ານການຄ້າຂອງອົງການການຄ້າໂລກ ຢູ່ ສປປ ລາວ ຄັ້ງທໍາອິດ;
• ການບໍລິການໃຫ້ຄໍາປຶກສາ ແລະ ການສະໜັບສະໜູນວິສາຫະກິດ ພາຍໃຕ້ ທຶນສົມທົບເພື່ອສົ່ງເສີມທຸລະກິດ ໄລຍະ ສອງ (BAF II) ແມ່ນໄດ້ຈັດຕັ້ງປະຕິບັດຕາມແຜນທີ່ໄດ້ວາງໄວ້. ຕັ້ງແຕ່ເລີ່ມຈັດຕັ້ງປະຕິບັດ BAF II ຈົນຮອດທ້າຍເດືອນ ພະຈິກ 2021, ທຶນສົມທົບ ຈໍານວນ 222 ທຶນໄດ້ຮັບການອະນຸມັດ, ເຊິ່ງມີມູນຄ່າປະມານ 1,283,000 ໂດລາ ສະຫະລັດ, ເຊິ່ງໃນນັ້ນມີ 138 ທຶນ (63,7%) ແມ່ນທຶນສົມທົບທີ່ອະນຸມັດໃຫ້ທຸລະກິດທີ່ນັກທຸລະກິດຍິງເປັນເຈົ້າຂອງ, 21% ແມ່ນທຸລະກິດທີ່ດໍາເນີນຢູ່ຕ່າງແຂວງ ແລະ ຫລາຍກ່ວາ 90% ແມ່ນວິສາຫະກິດຂະໜາດນ້ອຍ ແລະ ກາງ;
• ກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດ ພາຍໃຕ້ກອງປະຊຸມທຸລະກິດລາວ (LBF) ໄດ້ຮັບການສະໜັບສະໜູນ ແລະ ເຂົ້າຮ່ວມຈາກຫຼາຍພາກສ່ວນ, ລວມທັງພາກລັດ ແລະ ທຸລະກິດໂດຍສະເພາະແມ່ນນັກລົງທຶນຕ່າງປະເທດ ແລະ ທຸລະກິດຈາກແຂວງຕ່າງໆ;
• ວຽກງານການຈັດຕັ້ງປະຕິບັດໂຄງການໂດຍລວມ ແມ່ນຖືກຕີລາຄາວ່າ ເປັນທີ່ໜ້າພໍໃຈ ໂດຍການປະເມີນຜົນຄວາມຄືບໜ້າການຈັດຕັ້ງປະຕິບັດໂຄງການໂດຍຄະນະຊ່ຽວຊານຈາກອົງການຜູ້ໃຫ້ທຶນໃນເດືອນ ພະຈິກ 2021 ທີ່ຜ່ານມາ.
ໃນລະຫວ່າງກອງປະຊຸມ, ຜູ້ຕາງໜ້າຈາກພາກສ່ວນຈັດຕັ້ງປະຕິບັດໂຄງການໄດ້ນໍາສະເໜີກ່ຽວກັບແຜນບູລິມະສິດໃນປີ 2022 ທີ່ຕິດພັນກັບການຈັດຕັ້ງປະຕິບັດໂຄງການ. ທ່ານ ບຸນເຖິງ ດວງສະຫວັນ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ໄດ້ໃຫ້ກຽດກ່າວປິດກອງປະຊຸມໂດຍສະແດງຄວາມຂອບໃຈມາຍັງຫຼາຍຝ່າຍທີ່ປະກອບສ່ວນເຂົ້າໃນໂຄງການ ແລະ ໃຫ້ທຸກຝ່າຍເອົາໃຈໃສ່ຕໍ່ແຜນວຽກໃນປີ 2022 ເພື່ອຮັບປະກັນວ່າວຽກງານການອໍານວຍຄວາມສະດວກທາງການຄ້າ ແລະ ການລົງທຶນ ໄດ້ຖືກຈັດຕັ້ງປະຕິບັດໃຫ້ມີປະສິດທິພາບຍິ່ງຂຶ້ນ.

ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.