ກະຊວງການເງິນ ຈັດພິທີລົງນາມບົດບັນທຶນ ຄວາມເຂົ້າໃຈກັບ ກະຊວງສາທາລະນະສຸກ ແລະ ກະຊວງກະສິກໍາ ແລະ ປ່າໄມ້ກ່ຽວກັບວຽກງານ ການບໍລິຫານຄວາມສ່ຽງ ແລະ ການອໍານວຍຄວາມສະດວກ ໃຫ້ແກ່ການນໍາເຂົ້າ-ສົ່ງອອກສິນຄ້າຢູ່ດ່ານ
ວັນທີ 13 ທັນວາ 2021 ທີ່ໂຮງແຮມຄຣາວພລາຊາ. ກົມພາສີ, ກະຊວງການເງິນ, ໄດ້ມີພິທີລົງນາມບົດບັນທຶກຄວາມເຂົ້າໃຈ ກັບກົມອາຫານ ແລະ ຢາ, ກະຊວງສາທາລະນະສຸກ, ກົມປູກຝັງ ແລະ ກົມລ້ຽງສັດ ແລະ ການປະມົງ, ກະຊວງກະສິກໍາ ແລະ ປ່າໄມ້, ກ່ຽວກັບການຈັດຕັ້ງປະຕິບັດວຽກງານບໍລິຫານຄວາມສ່ຽງ ແລະ ກົນໄກປະສານງານເພື່ອອໍານວຍຄວາມສະດວກ ໃຫ້ແກ່ການນໍາເຂົ້າ-ສົ່ງອອກສິນຄ້າ ແລະ ເຄື່ອງຂອງ ຢູ່ດ່ານສາກົນ.
ພິທີລົງນາມບົດບັນທຶກຄວາມເຂົ້າໃຈດັ່ງກ່າວເປັນແຜນງານປັບປຸງການແຈ້ງພາສີຜ່ານການຈັດຕັ້ງປະຕິບັດສັນຍາອຳນວຍຄວາມສະດວກການຄ້າສາກົນຂອງ ອົງການການຄ້າໂລກ, ພາຍໃຕ້ການສະໜັບສະໜູນຈາກໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (Lao PDR Competitiveness and Trade Project – LCT) ພິທີລົງນາມດັ່ງກ່າວໄດ້ຮັບກຽດເຂົ້າຮ່ວມຈາກບັນດາກົມກອງທີ່ກ່ຽວຂ້ອງ ແລະ ບັນດາພະແນກອ້ອມຂ້າງກົມພາສີເພື່ອເຂົ້າຮ່ວມເປັນສັກຂີພະຍານໃນພິທີດັ່ງກ່າວ.
- ໃນພິທີດັ່ງກ່າວແມ່ນໃຫ້ກຽດເຂົ້າຮ່ວມລົງນາມໂດຍ
- ທ່ານ ປອ. ດຣ ບຸນຊູ ແກ້ວຫາວົງ, ຫົວໜ້າ ກົມອາຫານ ແລະ ຢາ, ກະຊວງ ສາທາລະນະສຸກ,
- ທ່ານ ທ່ານ ນາງ ມະນິວອນ ວົງໄຊ, ຫົວໜ້າ ກົມການນໍາເຂົ້າ-ສົ່ງອອກ, ກະຊວງອຸດສາຫະກໍາ ແລະ ການຄ້າ.
- ທ່ານ ປອ. ສຸລາພອນ ອິນທະວົງ, ຮອງຫົວໜ້າ ກົມປູກຝັງ, ກະຊວງ ກະສິກໍາ ແລະ ປ່າໄມ້,
- ທ່ານ ດຣ. ສີທອງ ພິພັກຄະວົງ, ຮອງຫົວໜ້າ ກົມລ້ຽງສັດ ແລະ ການປະມົງ, ກະຊວງ ກະສິກໍາ ແລະ ປ່າໄມ້
- ທ່ານ ສາຍມະໂນລິນ ສິນບັນດິດ, ຮອງຫົວໜ້າ ກົມພາສີ, ກະຊວງການເງິນ
ຈຸດປະສົງຂອງການຈັດຕັ້ງປະຕິບັດບົດບັນທຶກຄວາມເຂົ້າໃຈດັ່ງກ່າວແມ່ນເພື່ອການຮ່ວມມື, ແລກປ່ຽນຂໍ້ມູນ ແລະ ການປະສານງານກ່ຽວກັບການຈັດຕັ້ງປະຕິບັດ ວຽກງານບໍລິຫານຄວາມສ່ຽງໂດຍນໍາໃຊ້ໂມດູນເລືອກເຟັ້ນຂອງລະບົບອາຊີກູດາ (ASYCUDA) ຂອງກົມພາສີ, ເຊິ່ງແນໃສ່ເຮັດໃຫ້ຂັ້ນຕອນ ແລະ ເວລາຂອງການກວດກາສິນຄ້າ, ເຄື່ອງຂອງ ທີ່ນໍາເຂົ້າ-ສົ່ງອອກມີຄວາມຖືກຕ້ອງ, ວ່ອງໄວ ແລະ ເປັນເອກະພາບຢູ່ດ່ານສາກົນເປົ້າໝາຍ ໃນຂອບເຂດທົ່ວປະເທດ, ເຊິ່ງກອງເລຂາອຳນວຍຄວາມສະດວກ ທາງດ້ານການຄ້າແຫ່ງຊາດ ແລະ ຄະນະນໍາກະຊວງຂອງບັນດາກົມທີ່ກ່ຽວຂ້ອງໄດ້ເຫັນດີໃຫ້ມີການເຊັນບົດບັນທຶກຄວາມເຂົ້າໃຈ (MOU) ແລະ ຄົ້ນຄວ້າລະບຽບການກົນໄກສະເພາະໃນການສົ່ງຂໍ້ມູນ ແລະ ກວດກາຮ່ວມກັນຢູ່ດ່ານ (SOP) ໃນການຈັດຕັ້ງປະຕິບັດ.
ນອກຈາກນີ້, ກະຊວງການເງິນຍັງໄດ້ສ້າງຕັ້ງຄະນະກໍາມະການຮ່ວມກັນວຽກງານບໍລິຫານຄວາມສ່ຽງ, ເຊິ່ງປະກອບມີກົມທີ່ກ່ຽວຂ້ອງເປັນຄະນະ. ຄະນະກໍາມະການດັ່ງ່ກາວມີໜ້າທີ່ເກັບກໍາຂໍ້ມູນຄວາມສ່ຽງທັງໝົດເພື່ອນໍາມາວິເຄາະ, ວິໃຈ, ຈັດລະດັບຄວາມສ່ຽງ ແລະ ພັດທະນາປັບປຸງຂໍ້ມູນເພື່ອປ້ອນເຂົ້າໃນລະບົບອາຊິກຸດາ. ພ້ອມກັນນັ້ນ, ຄະນະດັ່ງກ່າວຍັງພ້ອມກັນຄົ້ນຄ້ວາ ແລະ ປະເມີນບັນດາສິນຄ້າຊາຍແດນທີ່ມີຄວາມສ່ຽງສູງເພື່ອດຳເນີນການຕິດຕາມ, ກວດກາ ແລະ ໃຫ້ຄໍາແນະນໍາກ່ຽວກັບ ການດໍາເນີນງານວຽກງານບໍລິຫານຄວາມສ່ຽງຕໍ່ພາກສ່ວນທີ່ກ່ຽວຂ້ອງເພື່ອນໍາໄປປະຕິບັດໃຫ້ມີປະສິດທິພາບ ແລະ ປະສິດທິຜົນ.
ການນໍາໃຊ້ຫຼັກການບໍລິຫານຄວາມສ່ຽງເປັນວຽກງານທີ່ຈັດຕັ້ງປະຕິບັດໂດຍກົມພາສີໃນຖະນະເປັນພາຄີຂອງ ສົນທິສັນຍາກຽວໂຕສະບັບປັບປຸງ, ເນື່ອງຈາກວ່າພາຄີຂອງສົນທິສັນຍາດັ່ງກ່າວແມ່ນໄດ້ລະບຸວ່າ ລັດຖະການພາສີ ຕ້ອງນໍາໃຊ້ຫຼັກການບໍລິຫານຄວາມສ່ຽງເຂົ້າໃນວຽກງານຄວບຄຸມຂອງພາສີ
ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT) ເປັນໂຄງການທີ່ຈັດຕັ້ງປະຕິບັດພາຍໃຕ້ ກົມແຜນການ ແລະ ການຮ່ວມມື, ກະຊວງ ອຸດສາຫະກໍາ ແລະ ການຄ້າ, ໂດຍໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
