ອົງການພັດທະນາສາກົນຂອງສະຫະລັດອາເມລິກາ (USAID) ສະໜັບໜູນກອງປະຊຸມປັບປຸງ ຂີດຄວາມສາມາດ ແລະ ການວາງແຜນຍຸດທະສາດ ຂອງສູນບໍລິການ ວິສາຫະກິດຂະໜາດນ້ອຍ ແລະ ກາງ.
ແຂວງຈຳປາສັກ, ໃນວັນທີ 17-18 ກຸມພາ 2022, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ (DOSMEP), ກະຊວງ ອຸດສາຫະກຳ ແລະ ການຄ້າ (MOIC), ສະພາການຄ້າ ແລະ ອຸດສາຫະກຳແຫ່ງຊາດລາວ (LNCCI) ແລະ ສະພາການຄ້າ ແລະ ອຸດສາຫະກຳແຂວງຈໍາປາສັກ (CCCI) ຮ່ວມກັບ ອົງການພັດທະນາສາກົນ ຂອງສະຫະລັດອາເມລິກາ (USAID) ໂດຍຜ່ານໂຄງການສ້າງສະພາບແວດລ້ອມ ທີ່ເອື້ອອຳນວຍຕໍ່ທຸລະກິດຂອງລາວ ໄດ້ຈັດກອງປະຊຸມຝຶກອົບຮົມປັບປຸງຂີດຄວາມສາມາດ ແລະ ການວາງແຜນຍຸດທະສາດ ຂອງສູນບໍລິການ ວິສາຫະກິດຂະໜາດນ້ອຍ ແລະ ກາງ (SSC) ແລະ ສະເຫຼີມສະຫຼອງວັນສ້າງຕັ້ງສູນບໍລິການ ວິສາຫະກິດຂະໜາດນ້ອຍ ແລະ ກາງ ຄົບຮອບ 5 ປີ. ກອງປະຊຸມໄດ້ເປີດໂອກາດໃຫ້ຄະນະບໍລິຫານງານ SSC ໄດ້ສະເໜີບັນຫາ ແລະ ຂໍ້ຈຳກັດທີ່ປະເຊີນ, ປຶກສາຫາລືກ່ຽວກັບຂົງເຂດຕ່າງໆເພື່ອປັບປຸງແຜນງານ ແລະ ປະກອບສ່ວນເຂົ້າໃນການສ້າງຄູ່ມື ການດຳເນີນງານ ແລະ ໂຄງຮ່າງການຄຸ້ມຄອງຂອງ SSC ທົ່ວ ສປປ ລາວ.
ກອງປະຊຸມດັ່ງກ່າວໄດ້ຮັບກຽດການເປັນປະທານໂດຍ ທ່ານ ບຸນເຖິງ ດວງສະຫວັນ, ຮອງລັດຖະມົນຕີ ກະຊວງ ອຸດສາຫະກຳ ແລະ ການຄ້າ ແລະ ໄດ້ຮັບກຽດເຂົ້າຮ່ວມໂດຍຜູ້ຕາງໜ້າຈາກສູນບໍລິການ ວິສາຫະກິດຂະໜາດນ້ອຍ ແລະ ກາງທັງ 4 ແຫ່ງໂດຍຈາກ ນະຄອນຫຼວງ, ແຂວງ ຫຼວງພະບາງ, ແຂວງ ສະຫວັນນະເຂດ ແລະ ແຂວງ ຈຳປາສັກ ລວມທັງໝົດປະມານ 40 ທ່ານ.
ໃນບົດກ່າວເປີດກອງປະຊຸມ, ທ່ານ ບຸນເຖິງ ດວງສະຫວັນ ໄດ້ສະແດງຄວາມຂອບໃຈມາຍັງອົງການ USAID ທີ່ໃຫ້ການສະໜັບສະໜູນຢ່າງຕໍ່ເນື່ອງ. ທ່ານ ບຸນເຖິງ ດວງສະຫວັນ ກ່າວວ່າ “ລັດຖະບານແຫ່ງ ສປປ ລາວ ຍາມໃດກໍ່ຖືເອົາ ການເສີມສ້າງຄວາມສາມາດໃນການແຂ່ງຂັນຂອງ ຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSME) ເປັນວຽກງານທີ່ສໍາຄັນ, ຍ້ອນວ່າບັນດານັກທຸລະກິດໃນຂະແໜງການດັ່ງກ່າວ ປະກອບສ່ວນເຂົ້າໃນ ການພັດທະນາເສດຖະກິດ-ສັງຄົມ. ການສ້າງຄວາມເຂັ້ມແຂງ ຂອງສູນບໍລິການ ວິສາຫະກິດຂະໜາດນ້ອຍ ແລະ ກາງ ແມ່ນມີຄວາມຈໍາເປັນ ໃນການສະໜັບສະໜູນ ການປັບປຸງນະໂຍບາຍຂອງລັດຖະບານສໍາລັບການພັດທະນາ SME ແລະ ໃນການສະໜອງການບໍລິການໃຫ້ແກ່ SME. ການປະເມີນຜົນການດໍາເນີນງານຂອງ SSC ແມ່ນມີຄວາມສໍາຄັນຫຼາຍ ແລະ ຈະເປັນເອກະສານອ້າງອີງສໍາລັບ SSC ໃນການປັບປຸງຕໍ່ໄປ. ທັງນີ້, ຍັງຈະນຳໄປສູ່ການສ້າງແຜນຍຸດທະສາດ ເພື່ອເປັນແບບຢ່າງທີ່ດີໃນການສ້າງຕັ້ງ SSC ໃນແຂວງອື່ນໆ”.
ທ່ານ ນາງ ພັນມະນີ ຄຳພິລາວົງ, ຮອງຫົວໜ້າໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດຂອງລາວ, ອົງການພັດທະນາສາກົນ ຂອງສະຫະລັດອາເມລິກາ (USAID-LBE), ໄດ້ກ່າວຊົມເຊີຍພາກສ່ວນຈັດຕັ້ງປະຕິບັດ ຝ່າຍລັດຖະບານ ສປປ ລາວທີ່ພະຍາຍາມປັບປຸງສະພາບແວດລ້ອມ ທີ່ເອື້ອອໍານວຍຕໍ່ທຸລະກິດລາວ. ທ່ານ ນາງ ພັນມະນີ ຄຳພິລາວົງ ກ່າວວ່າ ”USAID ມີຄວາມພູມໃຈທີ່ຈະສືບຕໍ່ໃຫ້ການສະໜັບສະໜູນ ກົມສົ່ງເສີມວິສາຫະກິດ ຂະໜາດນ້ອຍ ແລະ ກາງ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ໃນການເພີ່ມຂີດຄວາມສາມາດສຳລັບ SME, ຍ້ອນວ່າບັນດານັກທຸລະກິດ ໃນຂະແໜງການດັ່ງກ່າວມີບົດບາດສຳຄັນໃນການເສີມຂະຫຍາຍການພັດທະນາເສດຖະກິດ-ສັງຄົມຂອງ ສປປ ລາວ ແລະ ເປັນກຳລັງສຳຄັນໃນການສ້າງລາຍຮັບ ແລະ ການຈ້າງງານ. ການເພີ່ມຂີດຄວາມສາມາດພາຍໃນ SSC ແມ່ນບາດກ້າວທໍາອິດເພື່ອຮັບປະກັນ ການໃຫ້ບໍລິການດ້ານການພັດທະນາ ທຸລະກິດໃນ ສປປ ລາວ ໃຫ້ມີຄຸນນະພາບສູງ”.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID-LBE) ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
