ໄດ້ມີບາດກ້າວອັນສຳຄັນ ເພື່ອສ້າງຄວາມເຂັ້ມແຂງ ໃນການປະສານສົມທົບລະຫວ່າງ ສາມກອງເລຂາ ທີ່ສະໜັບສະໜູນວຽກງານປັບປຸງ ສະພາບແວດລ້ອມຂອງການດຳເນີນທຸລະກິດ ໂດຍລວມມີກອງເລຂາຈັດຕັ້ງປະຕິບັດ ວຽກງານຄໍາສັ່ງ ຂອງທ່ານນາຍົກລັດຖະມົນຕີ ເລກ 02 ແລະ 03, ກອງເລຂາຄະນະກຳມະການ ອໍານວຍຄວາມສະດວກດ້ານການຄ້າ ແລະ ກອງເລຂາກອງປະຊຸມທຸລະກິດລາວ

ທີ່ແຂວງວຽງຈັນ, ວັນທີ 11 ມີນາ 2022, ກະຊວງອຸດສາຫະກໍາ ແລະ ການຄ້າ ໂດຍຜ່ານກົມແຜນການ ແລະ ການຮ່ວມມື ໄດ້ຈັດກອງປະຊຸມປຶກສາຫາລືື ດ້ານວິຊາການ ລະຫວ່າງ ສາມກອງເລຂາ ລວມມີ: ກອງເລຂາຄະນະປະສານ ງານ ແລະ ຕິດຕາມການຈັດຕັ້ງປະຕິບັດຄໍາສັ່ງນາຍົກລັດຖະມົນຕີ ເລກທີ 02 ແລະ 03, ຊຶ່ງຕາງໜ້າໂດຍກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ; ກອງເລຂາຄະນະກຳມະ ການອໍານວຍຄວາມສະດວກດ້ານການ ຄ້າ, ຊຶ່ງຕາງໜ້າໂດຍກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ; ແລະ ກອງເລຂາກອງປະ ຊຸມທຸລະກິດລາວ, ຊຶ່ງຕາງໜ້າໂດຍ ສະພາການຄ້າ ແລະ ອຸດສາຫະກໍາແຫ່ງຊາດລາວ.

ຈຸດປະສົງຂອງກອງປະຊຸມແມ່ນເພື່ອປັບປຸງກົນໄກການປະສານງານລະຫວ່າງສາມກອງເລຂາ ແລະ ການຮ່ວມມືລະຫວ່າງພາກລັດ ແລະ ພາກເອກະຊົນ ໂດຍການແລກປ່ຽນປະສົບການຮ່ວມກັນ ເພື່ອໃຫ້ມີເພີ່ມຄວາມເຂົ້າໃຈກ່ຽວກັບໂຄງສ້າງການດຳເນີນງານຂອງແຕ່ລະກອງເລຂາ, ກົນໄກການລາຍງານໃນປະຈຸບັນ ແລະ ຮັບຮອງເອົາບັນດາ ມາດຕະການທີ່ແທດເໝາະ, ທັງນີ້ກໍ່ເພື່ອສ້າງຄວາມເຫັນດີເຫັນພ້ອມໃນມາດຕະການປະຕິຮູບສະພາບແວດລ້ອມ ຂອງການດຳເນີນທຸລະກິດ.

ກອງປະຊຸມດັ່ງກ່າວໄດ້ຮັບກຽດເປັນປະທານໂດຍ ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ແລະ ຮ່ວມເປັນປະທານໂດຍ ທ່ານ ປອ. ພອນໄຊ ວິໄລສັກ, ຮອງຫົວໜ້າກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ ແລະ ທ່ານ ພູໄຊ ເທບພະວົງ, ເລຂາທິ ການ, ສະພາການຄ້າ ແລະ ອຸດສາຫະກໍາແຫ່ງຊາດລາວ.

ຜູ້ເຂົ້າຮ່ວມກອງປະຊຸມໄດ້ປຶກສາຫາລືກ່ຽວກັບໂຄງສ້າງການດຳເນີນງານ, ໂຄງຮ່າງການຈັດຕັ້ງທີ່ມີຢູ່ໃນປະຈຸບັນ ແລະ ແຜນວຽກບູລິມະສິດສຳລັບປັບປຸງ ກົນໄກການປະສານງານຮ່ວມກັນຂອງ ທັງສາມກອງເລຂາ ໂດຍສະເພາະແມ່ນການຮ່ວມມືລະຫວ່າງກະຊວງ ແລະ ການຮ່ວມມືຂອງພາກລັດ ແລະ ເອກະຊົນ ກໍຄື ບູລິມະສິດໄລຍະກາງ ແລະ ໄດ້ເຫັນດີນຳກັນກ່ຽວກັບບັນດາມາດຕະການສຳຄັນ ທີ່ຈະເສີມສ້າງຄວາມເຂັ້ມແຂງໃນການປະສານສົມທົບຂອງສາມກອງເລຂາ, ທັງນີ້ກໍເພື່ອຮັບປະກັນວ່າ ຈະສາມາດບັນລຸໝາກຜົນຢ່າງເປັນຮູບປະທຳ ໂດຍສະເພາະໃນຂົງເຂດວຽກງານປັບປຸງການດຳເນີນທຸລະກິດໃຫ້ງ່າຍດາຍຂຶ້ນ, ວຽກງານອຳນວຍຄວາມສະດວກດ້ານການຄ້າ ແລະ ການແກ້ໄຂບັນຫາທີ່ເປັນອຸປະສັກໃຫ້ພາກທຸລະກິດ.

ໃນວາລະສຸດທ້າຍຂອງກອງປະຊຸມ ທ່ານ ແສງພະນົມຈອນ ໄດ້ກ່າວຢ້ຳຄືນການຕັດສິນໃຈຂອງກອງປະຊຸມ ໃນການເພີ່ມທະວີການຮ່ວມມືດ້ານວິຊາການ ຂອງສາມກອງເລຂາ ໂດຍຜ່ານການແລກປ່ຽນຂໍ້ມູນຂ່າວສານ ໃນຮູບແບບທີ່ບໍ່ເປັນທາງການ, ຈັດກອງປະຊຸມວິຊາການປະຈຳໄຕມາດ ແລະ ກອງປະຊຸມປະຈຳຫົກເດືອນ ໂດຍການນຳພາປະຊຸມຈາກບັນດາຫົວໜ້າຂອງກອງເລຂາ ທັງສາມຄະນະ.

ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ຊຶ່ງເປັນໂຄງການທີ່ໄດ້ຮັບການປະກອບທຶນເຂົ້າໃນທຶນຊ່ວຍເຫຼືອຫຼາຍຝ່າຍໂດຍທະນາ ຄານໂລກ, ລັດຖະບານ ອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ຊຶ່ງເປົ້າໝາຍຫຼັກ ແມ່ນ ການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການປັບປຸງສະ ພາບແວດ ລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນ ຂອງພາກທຸລະ ກິດ.