ກອງປະຊຸມຄະນະຊີ້ນຳລວມ ຄົ້ນຄວ້າປັບປຸງກົດໝາຍ ວ່າດ້ວຍວິສາຫະກິດ (ສະບັບປັບປຸງ – 2013)
ໃນວັນທີ 22 ມີນາ 2022, ກົມທະບຽນ ແລະ ຄຸ້ມຄອງວິສາຫະກິດ, ກະຊວງອຸດສາຫະກໍາ ແລະ ການຄ້າ (ອຄ), ໄດ້ຈັດກອງປະຊຸມຄະນະຮັບຜິດຊອບ ປັບປຸງກົດໝາຍວ່າດ້ວຍວິສາຫະກິດ (ສະບັບປັບປຸງ – 2013), ທີ່ ຫ້ອງປະຊຸມໃຫຍ່ຊັ້ນ 1 ຕຶກ ກະຊວງອຄ. ວຽກງານດັ່ງກ່າວເປັນໜຶ່ງໃນວຽກງານຫຼັກພາຍໃຕ້ເສົາຄໍ້າ ກ ຂອງ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (Lao Competitiveness and Trade Project – LCT).
ກອງປະຊຸມນີ້ໄດ້ຮັບກຽດການເປັນປະທານຂອງ ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ຫົວໜ້າຄະນະຊີ້ນຳລວມປັບປຸງກົດໝາຍ. ກອງປະຊຸມດັ່ງກ່າວໄດ້ມີບັນດາທ່ານທີ່ຢູ່ໃນຄະນະຮັບຜິດຊອບປັບປຸງກົດໝາຍ ແລະ ກອງເລຂາຊ່ວຍວຽກເຂົ້າຮ່ວມ.
ໃນພິທີເປີດກອງປະຊຸມ, ທ່ານ ປອ. ມະໂນທອງ ໄດ້ກ່າວວ່າ ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຄົ້ນຄວ້າ, ປະກອບຄຳເຫັນໃສ່ຮ່າງກົດໝາຍທີ່ມີການປັບປຸງ ກົດໝາຍວ່າດ້ວຍວິສາຫະກິດ ສະບັບເລກທີ 46/ສພຊ, ລົງວັນທີ 26 ທັນວາ 2013 ແລະ ຜ່ານແຜນທີ່ຈະລົງທາບທາມ ເພື່ອລະດົມຄວາມຄິດເຫັນຢູ່ 3 ພາກ (ພາກເໜືອ, ພາກກາງ ແລະ ພາກໃຕ້) ໃນຂອບເຂດທົ່ວປະເທດ. ເຫດຜົນເບື້ອງຕົ້ນຂອງ ການປັບປຸງກົດໝາຍສະບັບນີ້ ແມ່ນປະຕິບັດຕາມຄຳສັ່ງ 02/ນຍ, ລົງວັນທີ 01 ກຸມພາ 2018 ວ່າດ້ວຍການປັບປຸງບັນດາກົນໄກລະບຽບການ ແລະ ກົນໄກປະສານງານການດໍາເນີນທຸລະກິດ. ໃນນັ້ນ, ມີ 2 ຕົວຊີ້ວັດ ທີ່ກ່ຽວຂ້ອງກັບການດຳເນີນທຸລະກິດ ຄື: ຕົວຊີ້ວັດທີ 1 ການເລີ່ມຕົ້ນທຸລະກິດ ແລະ ຕົວຊີ້ວັດທີ 6 ການປົກປ້ອງຜູ້ລົງທຶນລາຍຍ່ອຍ. ສະນັ້ນ, ເພື່ອປັບປຸງ 2 ຕົວຊີ້ວັດ ຈຶ່ງຈໍາເປັນຕ້ອງໄດ້ປັບປຸງກົດໝາຍວ່າດ້ວຍວິສາຫະກິດ ໂດຍສະເພາະ 2 ຂົງເຂດຕົ້ນຕໍ ຄື: ປັບປຸງໃນພາກທີ II ໝວດທີ 2 – ການຂຶ້ນທະບຽນວິສາຫະກິດ ແລະ ພາກທີ V ໝວດທີ 2 – ບໍລິສັດຈຳກັດ. ຕາມແຜນການປັບປຸງກົດໝາຍວິສາຫະກິດ ຄາດວ່າຈະນໍາເອົາເຂົ້າຜ່ານກອງປະຊຸມລັດຖະບານ ໃນເດືອນ ກໍລະກົດ 2022 ແລະ ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ໃນທ້າຍປີ 2022.
ຈາກນັ້ນ ທ່ານ ອະພິສິດ ແສງສຸລິວົງ, ຫົວໜ້າກົມທະບຽນ ແລະ ຄຸ້ມຄອງວິສາຫະກິດ ໃນນາມ ຫົວໜ້າຄະນະຮັບຜິດຊອບຄົ້ນຄວ້າປັບປຸງກົດໝາຍ, ໄດ້ລາຍງານຄວາມຄືບໜ້າຜົນການຄົ້ນຄວ້າ ປັບປຸງກົດໝາຍວິສາຫະກິດ (ສະບັບປັບປຸງ – 2013) ແລະ ໄດ້ນຳເອົາຮ່າງກົດໝາຍສະບັບປັບປຸງເບື້ອງ ຕົ້ນຜ່ານຄະນະຮັບຜິດຊອບ ເພື່ອຄວາມເປັນເອກະພາບກ່ອນທີ່ຈະນຳເອົາຮ່າງດັ່ງກ່າວລົງໄປທາບທາມ, ນອກນັ້ນ, ຍັງໄດ້ລາຍງານແຜນທີ່ຈະລົງທາບທາມຢູ່ 3 ພາກ ໃນຂອບເຂດທົ່ວປະເທດໃຫ້ທີ່ປະຊຸມຊາບ.
ໃນກອງປະຊຸມດັ່ງກ່າວ, ບັນດາຜູ້ເຂົ້າຮ່ວມໄດ້ປະກອບຄຳຄິດເຫັນໃສ່ເນື້ອໃນຂອງຮ່າງກົດໝາຍ, ແຜນການປັງປຸງ ແລະ ການລົງທາບທາມ ຢ່າງຕົງໄປຕົງມາ. ທີ່ປະຊຸມສະເໜີໃຫ້ຄະນະຮັບຜິດຊອບປັບປຸງ ກົດໝາຍນຳເອົາຮ່າງກົດໝາຍດັ່ງກ່າວໄປຜ່ານບັນດາຂະແໜງການກ່ຽວຂ້ອງ ແລະ ພາກທຸລະກິດເພື່ອໃຫ້ມີສ່ວນຮ່ວມ ໃນການປັບປຸງກົດໝາຍວິສາຫະກິດໃນຄັ້ງນີ້ ຮັບປະກັນການເຂົ້າເຖິງ, ເນື້ອໃນ, ຮູບການ ແລະ ຄວາມທັນສະໄໝຂອງກົດໝາຍໃຫ້ສອດຄ່ອງກັບພາກພື້ນ ແລະ ສາກົນ ພາຍຫຼັງການປັບປຸງ.
ກອງປະຊຸມນີ້ໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT), ເຊິ່ງເປັນໂຄງການທີ່ຈັດຕັ້ງປະຕິບັດພາຍໃຕ້ ກົມແຜນການ ແລະ ການຮ່ວມມື, ກະຊວງ ອຸດສາຫະກໍາ ແລະ ການຄ້າ, ໂດຍໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍ ລັດຖະບານອົດສະຕຣາລີ, ລັດຖະບານ ໄອແລນ, ລັດຖະບານ ອາເມຣິກາ ແລະ ທະນາຄານໂລກ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
