ພາກລັດ, ພາກທຸລະກິດຈາກສູນກາງ ແລະ ພາກໃຕ້ຂອງ ສປປ ລາວ ໄດ້ປຶກສາຫາລືກ່ຽວກັບມາດຕະການ ສຳລັບ ການຈັດຕັ້ງປະຕິບັດກາງສະໄໝ ເພື່ອສົ່ງເສີມຄວາມສາມາດ ໃນການແຂ່ງຂັນ ໃນຂະແໜງການຕ່າງໆ ທີ່ບໍ່ເອື່ອຍອີງຊັບພະຍາກອນທໍາມະຊາດ

ນະຄອນປາກເຊ, ແຂວງ ຈໍາປາສັກ, ວັນທີ 29 ມີນາ 2020. ພາກລັດ ແລະ ພາກທຸລະກິດໄດ້ປຶກສາຫາລືກັນກ່ຽວກັບຜົນການຄົ້ນຄວ້າ ຈາກບົດວິໄຈການເຊື່ອມໂຍງເຂົ້າສາກົນ ດ້ານການຄ້າ ແລະ ແຜນການພັດທະນາຂະແໜງການຄ້າ ແລະ ພາກທຸລະກິດ ໃນວັນທີ 29 ມີນາ ນີ້.

ກອງປະຊຸມດັ່ງກ່າວນີ້ ຈັດຂຶ້ນເປັນເວລາເຄິ່ງມື້ໂດຍ ກະຊວງອຸດສາຫະກໍາ ແລະ ການຄ້າ ແລະ ໄດ້ຮັບກຽດເຂົ້າຮ່ວມໂດຍຜູ້ຕາງໜ້າຈາກພາກລັດຂັ້ນສູນກາງ, ເຈົ້າໜ້າທີ່ຂັ້ນທ້ອງຖິ່ນ, ແລະ ພາກທຸລະກິດຈາກ 07 ແຂວງພາກກາງ ແລະ ພາກໃຕ້ຂອງ ສປປ ລາວ ຫຼາຍກວ່າ 70 ທ່ານ.

ໃນກອງປະຊຸມດັ່ງກ່າວ, ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງ ອຸດສາຫະກຳ ແລະ ການຄ້າ ໄດ້ໃຫ້ກຽດເປັນປະທານກອງປະຊຸມ ແລະ ກ່າວເປີດກອງປະຊຸມໂດຍເນັ້ນໜັກເຖິງຄວາມມຸ່ງໝັ້ນຂອງລັດຖະບານໃນການເຊື່ອມໂຍງເສດຖະກິດໃນລະດັບພາກພື້ນ ແລະ ສາກົນ, ບັນດາມາດຕະການທີ່ເປັນຮູບປະທຳ ທີ່ທັງພາກລັດ ແລະ ພາກທຸລະກິດ ຕ້ອງໄດ້ປະຕິບັດເພື່ອຮັບມືກັບສິ່ງທ້າທາຍທີ່ອາດຈະເກີດຂຶ້ນໃນອະນາຄົດ ໄດ້ແກ່ພາລະໜ້າທີ່ ຂອງ ສປປ ລາວ ໃນເວທີສາກົນທີ່ເພີ່ມຂຶ້ນ, ການເພີ່ມຄວາມສາມາດໃນການແຂ່ງຂັນ ແລະ ການຫຼຸດຜ່ອນຜົນກະທົບຈາກການລະບາດຂອງໂຄວິດ – 19. ເພິ່ນຍັງໄດ້ເນັ້ນໜັກໃນບົດກ່າວເປີດຂອງເພິ່ນອີກວ່າ: “ເນື່ອງຈາກວ່າຕ່ອງໂສ້ການຜະລິດປັດຈຸບັນແມ່ນມີການເຊື່ອມຕໍ່ກັນລະຫວ່າງປະເທດ, ດັ່ງນັ້ນ ການຮ່ວມມືສາກົນທີ່ມີເປົ້າໝາຍແນໃສ່ ຫຼຸດຜ່ອນຄ່າໃຊ້ຈ່າຍ ທາງດ້ານການຄ້າລະຫວ່າງປະເທດ ແລະ ສົ່ງເສີມການລົງທຶນ ຈຶ່ງມີຄວາມຈຳເປັນຢ່າງຍິ່ງ. ດ້ວຍເຫດນັ້ນ, ການຮ່ວມມືຢ່າງຕັ້ງໜ້າ ແລະ ຫ້າວຫັນຂອງປະເທດເຮົາ ໃນເຂດການຄ້າເສລີອາຊຽນ ແລະ ສັນຍາຄູ່ຮ່ວມເສດຖະກິດຮອບດ້ານລະດັບພາກພື້ນ (Regional Comprehensive Economic Partnership Agreement-RCEP) ລວມໄປເຖິງພັນທະການຮ່ວມມືຫຼາຍຝ່າຍ ໃນຂອບອົງການການຄ້າໂລກ (WTO) ຈຶ່ງມີຄວາມສໍາຄັນຢ່າງຍິ່ງຕໍ່ການເພີ່ມທະວີການລົງທຶນ ແລະ ການຈະເລີນເຕີບໂຕຂອງເສດຖະກິດປະເທດເຮົາ”.

ທ່ານ ປອ ບຸນຍະເດດ ທອງສະຫວັນ, ຫົວໜ້າພະແນກ ອຄ ແຂວງຈໍາປາສັກ, ໄດ້ເນັ້ນເຖິງຄວາມສໍາຄັນຂອງການພັດທະນາຂະແໜງການຄ້າ ແລະ ພາກເອກະຊົນ ໃນນະໂຍບາຍພັດທະນາແຫ່ງຊາດ. “ດັ່ງເປັນທີ່ຮັບຮູ້ຢ່າງກວ້າງຂວາງແລ້ວວ່າ ແຜນພັດທະນາເສດຖະກິດ-ສັງຄົມ ໃນລະດັບຊາດ ແລະ ຂັ້ນແຂວງ ໄດ້ກຳນົດເອົາ ວຽກງານການເຊື່ອມໂຍງເສດຖະກິດ ແລະ ການພັດທະນາພາກເອກະຊົນ ເປັນໜຶ່ງໃນຍຸດທະສາດທີ່ສຳຄັນ ຂອງການພັກດັນການຂະຫຍາຍຕົວຂອງເສດຖະກິດແບບຍືນຍົງ ໃນປະເທດຂອງພວກເຮົາ. ໃນນັ້ນ, ພາກເອກະຊົນ ກໍ່ມີບົດບາດທີ່ສຳຄັນຕໍ່ການ ບັນລຸເປົ້າໝາຍລວມຂອງພັດທະນາ ແລະ ການຂະຫຍາຍຕົວຂອງເສດຖະກິດໂດຍລວມ, ເປົ້າໝາຍການລົງທຶນ, ການຈ້າງງານ ແລະ ຫຼຸດຜ່ອນຄວາມທຸກຍາກ ທີ່ໄດ້ຖືກກຳນົດໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ແລະ ຍຸດທະສາດການພັດທະນາ 2030”.

ບົດວິໄຈ DTIS ສະບັບນີ້ ມີສາມເປົ້າໝາຍສະເພາະຄື: 1.) ທົບທວນຄືນຄວາມຄືບໜ້າໃນການຈັດຕັ້ງປະຕິບັດແຜນວຽກຂອງຂະແໜງການຄ້າ ແລະ ເອກະຊົນ ທີ່ຮັບຮອງໃນບົດວິໄຈ DTIS ປີ 2012; 2.) ດຳເນີນການວິໄຈ ສະພາບແວດລ້ອມການດຳເນີນທຸລະກິດ ໂດຍເນັ້ນໃສ່ ຂະແໜງທຸລະກິດກະສິກໍາ, ທ່ອງທ່ຽວ ແລະ ອຸດສາຫະກຳປຸງແຕ່ງ; ແລະ 3.) ກະກຽມແຜນພັດທະນາຂະແໜງການຄ້າ ແລະ ພາກເອກະຊົນສະບັບປັບປຸງ.

ນອກຈາກນັ້ນ, ບົດວິໄຈນີ້ ຍັງໄດ້ແນໃສ່ແກ້ໄຂບັນຫາທາງດ້ານ ການອຳນວວຍຄວາມສະດວກດ້ານການຄ້າ, ການຄ້າລາຍຍ່ອຍ ແລະ ບັນຫາດ້ານບົດບາດຍິງ-ຊາຍ. ບົດວິໄຈນີ້ ຍັງໄດ້ກຳນົດບັນຊີມາດຕະການທີ່ເປັນບູລິມະສິດ ທີ່ຈະຊ່ວຍສະໜັບສະໜູນ ປະເທດຂຶງພວກເຮົາໃຫ້ເຕິບໃຫຍ່ຂະຫຍາຍຕົວ ທີ່ທຸກຝ່າຍມີສ່ວນຮ່ວມ, ມີຄວາມຫຼາກຫຼາຍ ແລະ ຍືນຍົງ.

ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງ ອຸດສາຫະກຳ ແລະ ການຄ້າ ໄດ້ກ່າວສະຫຼຸບກອງປະຊຸມນີ້ວ່າ: “ໃນນາມທີ່ເປັນຂະແໜງການຫຼັກໃນການປະສານວຽກງານການພັດທະນາຂະແໜງການຄ້າ ແລະ ພາກເອກະຊົນ ໃນປະເທດເຮົາ, ກະຊວງອຸດສາຫະກຳ ແລະ ການຄ້າ ຈະສືບຕໍ່ເສີມຂະຫຍາຍການມີສ່ວນຮ່ວມ ແລະ ການປຶກສາຫາລືກັບທຸກພາກສ່ວນທີ່ກ່ຽວຂ້ອງ ເພື່ອຮັບປະກັນວ່າບົດວິໄຈທີ່ຈະຈັດພິມສະບັບສຸດທ້າຍ ໄດ້ສະທ້ອນ ບັນດາສິ່ງທ້າທາຍ ແລະ ບູລິມະສິດຂອງລະດັບທ້ອງຖິ່ນແລະ ແຜນການຊ່ວຍເຫຼືອໃນອະນາຄົດ ກໍຈະຊ່ວຍແກ້ໄຂບັນຫາສຳຄັນທີ່ມີຜົນກະທົບຕໍ່ຄວາມສາມາດ ໃນການແຂ່ງຂັນໃນຂະແໜງການຕ່າງໆ ທີ່ບໍ່ເອື່ອຍອີງຊັບພະຍາກອນ ທໍາມະຊາດ”.
 
ການປັບປຸງບົດວິໄຈການເຊື່ອມໂຍງເຂົ້າສາກົນດ້ານການຄ້າໄດ້ຮັບການສະໜັບສະໜູນໂດຍໂຄງການ ເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF). ໂຄງການດັ່ງກ່າວແມ່ນການຊ່ວຍເຫຼືອເພື່ອການຮ່ວມມືດ້ານການຄ້າ ໃນບັນດາປະເທດດ້ອຍພັດທະນາ (LDCs). ໂຄງການນີ້ເລີ່ມຈັດຕັ້ງປະຕິບັດຕັ້ງແຕ່ປີ 2009 ແລະ ເປັນແຜນງານທີ່ມີຜູ້ໃຫ້ທຶນຫຼາຍຝ່າຍເພື່ອສະໜັບສະໜູນບັນດາປະເທດ ດ້ອຍພັດທະນາໃຫ້ສາມາດແຂ່ງຂັນໃນຕະຫຼາດ ການຄ້າໂລກໂດຍການຊ່ວຍກໍາຈັດ ບັນດາຂໍ້ຈໍາກັດໃນຕ່ອງໂສ້ການສະໜອງສິນຄ້າ.