ກົມທະບຽນ ແລະ ຄຸ້ມຄອງວິສາຫະກິດ ກະຊວງ ອຄ ຈັດກອງປະຊຸມຄະນະປະສານງານກ່ຽວກັບການປັບປຸງການອອກໃບອະນຸຍາດດໍາເນີນທຸລະກິດພາຍໃຕ້ການຈັດຕັ້ງປະຕິບັດຄໍາສັ່ງເລກທີ 03/ນຍ

ນະຄອນຫຼວງວຽງຈັນ, ວັນທີ 29 ມີນາ 2022, ກົມທະບຽນ ແລະ ຄຸ້ມຄອງວິສາຫະກິດ, ກະຊວງອຸດສາຫະກຳ ແລະ ການຄ້າ (ອຄ), ໄດ້ຈັດກອງປະຊຸມຄົບຄະນະຄັ້ງທີ່ II ຂອງຄະນະປະສານງານກ່ຽວກັບການປັບປຸງການອອກໃບອະນຸຍາດດໍາເນີນທຸລະກິດພາຍໃຕ້ການຈັດຕັ້ງປະຕິບັດຄໍາສັ່ງເລກທີ 03, ຢູ່ທີ່ຫ້ອງປະຊຸມໃຫຍ່ຊັ້ນ 1 ຕຶກກະຊວງ ອຄ, ພາຍໃຕ້ການສະໜັບສະໜູນໂດຍໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (Lao Competitiveness and Trade Project – LCT). ກອງປະຊຸມນີ້ໄດ້ຮັບກຽດການເປັນປະທານຂອງ ທ່ານ ອະພິສິດ ແສງສຸລິວົງ, ຫົວໜ້າກົມທະບຽນ ແລະ ຄຸ້ມຄອງວິສາຫະກິດ, ແລະ ມີຜູ້ເຂົ້າຮ່ວມປະມານ 80 ທ່ານ ທັງໃນແບບເຂົ້າຮ່ວມຕົວຈິງ ແລະ ທາງໄກ.

ຈຸດປະສົງແມ່ນເພື່ອປຶກສາຫາລື ແລະ ລາຍງານຄວາມຄືບໜ້າ; ແລະ ບັນຊີກິດຈະການທຸລະກິດຈາກບັນດາຂະແໜງການ ທີ່ຕ້ອງໄດ້ອອກໃບອະນຸຍາດ ດຳເນີນທຸລະກິດ; ນຳສະເໜີຂໍ້ມູນເວັບໄຊ້ລະບົບຖານຂໍ້ມູນກ່ຽວກັບການຂໍອະນຸຍາດດຳເນີນທຸລະກິດ (IBL) ຂອງ ສປປ ລາວ ແລະ ຮັບຟັງຂໍ້ມູນຈາກຜູ້ເຂົ້າຮ່ວມ; ນໍາສະເໜີຮ່າງຂໍ້ຕົກລົງຂໍ້ຕົກລົງວ່າດ້ວຍການແຕ່ງຕັ້ງຄະນະປັບປຸງເວັບໄຊ້ລະບົບຖານຂໍ້ມູນກ່ຽວກັບການຂໍອະນຸຍາດດຳເນີນທຸລະກິດ ເຊິ່ງປະກອບມີຜູ້ຕາງໜ້າຈາກເຈົ້າໜ້າທີ່ອອກໃບອະນຸຍາດຂອງຂະແໜງການກ່ຽວຂ້ອງ; ແລະ ໄດ້ສົນທະນາສິ່ງທ້າທາຍ ແລະ ໜ້າວຽກໃນຕໍ່ໜ້າ.

ໃນພິທີເປີດກອງປະຊຸມ, ທ່ານ ອະພິສິດ ໄດ້ເນັ້ນໜັກເຖິງບົດບາດຄວາມສຳຄັນຂອງຄະນະຮັບຜິດຊອບການປັບປຸງໃບອະນຸຍາດທຸລະກິດເພື່ອໃຫ້ບັນລຸເປົ້າໝາຍ ແລະຜົນສຳເລັດຂອງການຈັດຕັ້ງປະຕິບັດຂອງ ຄຳສັ່ງເລກທີ່ 03/ນຍ, ສຳລັບການປັບປຸງແວດລ້ອມການດຳເນີນທຸລະກິດ, ເຊິ່ງເປັນໜຶ່ງໃນແຜນວຽກ ບຸລິມະສິດຂອງວາລະແຫ່ງຊາດ. ຈາກນັ້ນ, ປະທານກອງປະຊຸມໄດ້ຂອບໃຈບັນດາຂະແໜງການກ່ຽວຂ້ອງ ທີ່ໄດ້ສະໜອງລາຍການຂອງກິດຈະການພາຍໃຕ້ ຄວາມຮັບຜິດຊອບຂອງຕົນ ແລະ ໄດ້ຮຽກຮ້ອງໃຫ້ຂະແໜງການທີ່ຍັງບໍ່ທັນໄດ້ສະໜອງ ໃຫ້ນຳສົ່ງຂໍ້ມູນໂດຍໄວ. ມາຮອດປັດຈຸບັນ, ກົມທະບຽນ ໄດ້ເກັບກຳຫຼາຍກວ່າ 400 ກິດຈະການຈາກ 10 ກະຊວງ ແລະ ບັນດາອົງການທຽບເທົ່າ. ທ່ານ ອະພິສິດ ໄດ້ເວົ້າຕື່ມວ່າ ຂໍ້ມູນຂອງລາຍກາຍຂອງກິດ ຈະການທີ່ຕ້ອງໄດ້ຂໍອະນຸຍາດຈະຖືກສະໜອງໃຫ້ແກ່ພາກສ່ວນເອກະຊົນ ເຊິ່ງຈະເປັນບັນຊີກິດຈະການ ທີ່ຄຽງຄູ່ກັບບັນຊີສໍາປະທານ ແລະ ກິດຈະການທີ່ນອນໃນບັນຊີຄວບຄຸມ, ແລະ ຈະເປັນການແກ້ໄຂອຸປະສັກໃນການເຂົ້າເຖິງຂໍ້ມູນ ແລະ ສ້າງແວດລ້ອມການດຳເນີນທຸລະກິດໃນ ສປປ ລາວ ໃຫ້ດີຂຶ້ນ.

ໃນທີ່ປະຊຸມ, ຕາງໜ້າໃຫ້ແກ່ບັນດາຂະແໜງການອອກໃບອະນຸຍາດໄດ້ແລກປ່ຽນສົນທະນາສະພາບຂໍ້ຫຍຸ້ງຍາກໃນການຈັດຕັ້ງປະຕິບັດຕົວຈິງ ແລະ ສິ່ງທ້າທາຍທີ່ກະທົບຕໍ່ກັບຄວາມຄືບໜ້າຂອງການປັບປຸງ ຍ້ອນການລະບາດຂອງພະຍາດ COVID-19, ແລະ ການຊັບຊ້ອນພະນັກງານພາຍໃນອົງກອນ ເຊິ່ງເປັນບັນຫາຫຼັກທີ່ກະທົບຕໍ່ກັບການແລກປ່ຽນຂໍ້ມູນຂອງຂໍ້ມູນ. ຜູ້ເຂົ້າຮ່ວມກອງປະຊຸມເຫັນດີໃຫ້ກົມທະບຽນ ແລະ ຄຸ້ມຄອງວິສາຫະກິດ ຕິດຕາມຄວາມຄືບໜ້າໃນການເກັບກຳຂໍ້ມູນເພື່ອຮ່າງຂໍ້ຕົກລົງວ່າດ້ວຍການແຕ່ງຕັ້ງຄະນະປັບປຸງເວັບໄຊ້ລະບົບຖານຂໍ້ມູນກ່ຽວກັບການຂໍອະນຸຍາດດຳເນີນທຸລະກິດ, ແລະ ປັບປຸງຄືນລາຍຊື່ຂອງຄະນະຮັບຜິດຊອບໃໝ່. ເວັບໄຊ້ລະບົບຖານຂໍ້ມູນກ່ຽວກັບການຂໍອະນຸຍາດດຳເນີນທຸລະກິດ ຈະໄດ້ມີການເປີດໂຕຢ່າງເປັນທາງການພາຍຫຼັງມີການອັບເດດຂໍ້ມູນທັງໝົດໃນໝໍ່ໆນີ້.

ໃນພິທີປິດກອງປະຊຸມ, ທ່ານ ອະພິສິດ ໄດ້ໃຫ້ເນັ້ນໜັກວ່າ ກົມທະບຽນຈະສືບຕໍ່ເຮັດວຽກຢ່າງໃກ້ຊິດຮ່ວມບັນດາຂະແໜງການ ທີ່ອອກໃບອະນຸຍາດ ດໍາເນີນທຸລະກິດເພື່ອເກັບກໍາບັນຊີກິດຈະການໃຫ້ສໍາເລັດ, ນໍາພາຈັດຝຶກອົບຮົມກ່ຽວກັບຄູ່ມືການອອກໃບອະນຸຍາດ ແລະ ວິທີການອອກໃບອະນຸຍາດ ດຳເນີນທຸລະກິດໂດຍອີງໃສ່ຄວາມສ່ຽງ, ແລະ ປະສານງານຢ່າງກົງໄປກົງມາກັບແຕ່ລະຂະແໜງການ ເພື່ອກຳນົດບຸລິມະສິດໃນການປັງປຸງ ໃບອະນຸຍາດຂອງແຕ່ລະຂະແໜງການ, ແລະ ສ້າງແຜນວຽກທີ່ມີຄວາມຊັດເຈນທີ່ຕ້ອງການການສະໜັບສະໜູນໃນຂັ້ນຕໍ່ໄປ.

ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍ ລັດຖະບານອົດສະຕຣາລີ, ລັດຖະບານ ໄອແລນ, ລັດຖະບານ ອາເມຣິກາ ແລະ ທະນາຄານໂລກ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການ ປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.