USAID ໃຫ້ການສະໜັບສະໜຸນ ການຈັດກອງປະຊຸມປຶກສາຫາລື ລະຫວ່າງພາກລັດ ແລະ ພາກທຸລະກິດ ໃນວຽກງານການພັດທະນາ ການທ່ອງທ່ຽວແບບອະນຸລັກຂອງ ສປປ ລາວ ແລະ ເຜີຍແຜ່ ວຽກງານມາດຕະຖານເຮືອນພັກແຮມ (ASEAN Homestay Standard) ແລະ ການທ່ອງທ່ຽວແບບປະຊາຊົນ ມີສ່ວນຮ່ວມອາຊຽນ (ASEAN CBT Standard) ໃຫ້ແກ່ພາກສ່ວນກ່ຽວຂ້ອງຂັ້ນທ້ອງຖິ່ນ

ນະຄອນປາກເຊ, ລະຫວ່າງວັນທີ 27-28 ເມສາ 2022. ກົມພັດທະນາການທ່ອງທ່ຽວ, ກະຊວງຖະແຫຼງຂ່າວ, ວັດທະນາທໍາ ແລະ ທ່ອງທ່ຽວ, ໂດຍໄດ້ຮັບການສະໜັບສະໜູນຈາກອົງການພັດທະນາສາກົນຂອງສະຫະລັດອາເມລິກາ (USAID) ຜ່ານໂຄງການສ້າງສະພາບແວດລ້ອມ ທີ່ເອື້ອອຳນວຍຕໍ່ທຸລະກິດລາວ (LBE), ຈັດກອງປະຊຸມປຶກສາຫາລືລະຫວ່າງ ພາກລັດ ແລະ ພາກທຸລະກິດ ໃນວຽກງານການພັດທະນາ ການທ່ອງທ່ຽວແບບອະນຸລັກຂອງ ສປປ ລາວ ແລະ ເຜີຍແຜ່ວຽກງານມາດຕະຖານເຮືອນພັກແຮມ ແລະ ມາດຕະຖານການທ່ອງທ່ຽວ ແບບປະຊາຊົນມີສ່ວນຮ່ວມອາຊຽນ ໃຫ້ແກ່ພາກສ່ວນກ່ຽວຂ້ອງຂັ້ນທ້ອງຖິ່ນ.

ໃນກອງປະຊຸມໄດ້ເນັ້ນໜັກຊຸກຍູ້ການປັບປຸງນະໂຍບາຍເພື່ອສະໜັບສະໜູນການພັດທະນາການທ່ອງທ່ຽວແບບອະນຸລັກ, ພ້ອມທັງຮຽນຮູ້ເຖິງບັນຫາ ແລະ ສິ່ງທ້າທາຍທີ່ພາກທຸລະກິດກໍາລັງພົບພໍ້ໃນການສົ່ງເສີມຜະລິດຕະພັນທ້ອງຖິ່ນແບບອະນຸລັກ ແລະ ກິດຈະກຳຕ່າງໆໃນການພັດທະນາເສດຖະກິດໃຫ້ເຂົ້າກັບລະບົບເສດຖະກິດປົກກະຕິແບບໃໝ່ ທີ່ເປັນຜົນມາຈາກການແຜ່ລະບາດຂອງ COVID-19.

ກອງປະຊຸມຍັງໄດ້ຍົກໃຫ້ເຫັນບັນຫາຕົ້ນຕໍທີ່ພາກທຸລະກິດທ່ອງທ່ຽວພາຍໃນທ້ອງຖິ່ນທີ່ພົບພໍ້ເພື່ອປະຕິບັດຕາມມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມອາຊຽນ ແລະ ມາດຕະຖານເຮືອນພັກແຮມ, ພ້ອມທັງມາດຕະການແກ້ໄຂ.

ຜົນຮັບຂອງກອງປະຊຸມໃນຄັ້ງນີ້ຈະຖືກນຳໃຊ້ໃນການກຳນົດມາດຕະການທີ່ຊ່ວຍໃຫ້ບັນດາທຸລະກິດໃນຂະແໜງການທ່ອງທ່ຽວໃຫ້ສາມາດເຊື່ອມຕໍ່ກັບການທ່ອງທ່ຽວໃນລະດັບພາກພື້ນ ແລະ ເພີ່ມຄວາມສາມາດໃນການແຂ່ງຂັນໃຫ້ກັບຫົວໜ່ວຍທຸລະກິດດັ່ງກ່າວ.

ກອງປະຊຸມດັ່ງກ່າວໄດ້ຮັບກຽດການເປັນປະທານຮ່ວມໂດຍ ທ່ານ ອຸ່ນທວງ ຂາວພັນ, ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ທ່ານ ໂສມ ບຸດຕາກຸນ, ຮອງເຈົ້າແຂວງໆຈຳປາສັກ. ກອງປະຊຸມດັ່ງກ່າວຍັງໄດ້ຮັບກຽດເຂົ້າຮ່ວມໂດຍຫຼາຍພາກສ່ວນ ຫຼາຍກວ່າ 50 ທ່ານ, ເຊິ່ງຕາງໜ້າຈາກບັນດາກະຊວງທີ່ກ່ຽວຂ້ອງ, ສະພາການຄ້າ ແລະ ອຸດສາຫະກຳແຂວງຈຳປາສັກ, ສະມາຄົມທຸລະກິດທ່ອງທ່ຽວຂັ້ນທ້ອງຖິ່ນ ແລະ ບັນດານັກທຸລະກິດໃນຂະແໜງການທ່ອງທ່ຽວ.

ທ່ານ ອຸ່ນທວງ ຂາວພັນ, ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ເນັ້ນໜັກໃນບົດກ່າວເປີດກອງປະຊຸມໂດຍການສະແດງຄວາມຂອບໃຈຕໍ່ການສະໜັບສະໜູນຢ່າງຕໍ່ເນື່ອງຂອງ ອົງການ USAID ທີ່ໃຫ້ການຊ່ວຍເຫຼືອລາວໃນການປັບປຸງສະພາບແວດລ້ອມການດຳເນີນທຸລະກິດ. ທ່ານໄດ້ກ່າວວ່າ: “ການທ່ອງທ່ຽວແບບອະນຸລັກ ມີບົດບາດສຳຄັນໃນການຊ່ວຍໃຫ້ຂະແໜງການທ່ອງທ່ຽວຟື້ນຕົວຈາກຜົນກະທົບທີ່ເກີດຈາກການລະບາດຂອງCOVID-19. ສະນັ້ນ,ຈຶ່ງມີຄວາມສໍາຄັນຢ່າງຍິ່ງທີ່ຈະປັບປຸງຄຸນນະພາບໃຫ້ສູງຂຶ້ນທຽບເທົ່າລະດັບພາກພື້ນ ແລະ ສາກົນຕາມທີ່ໄດ້ກໍານົດ ໃນແຜນພັດທະນາການທ່ອງທ່ຽວ 2021-2025 ແລະ ວິໄສທັດຮອດປີ 2030 ເພື່ອເຮັດໃຫ້ປະເທດລາວເປັນສະຖານທີ່ດຶງດູດນັກທ່ອງທ່ຽວ. ທ່ານກ່າວຕື່ມອີກວ່າ: “ກອງປະຊຸມໃນມື້ນີ້ເປັນການເປີດໂອກາດໃຫ້ພາກລັດ ແລະ ພາກທຸລະກິດໄດ້ປຶກສາຫາລື ກ່ຽວກັບບັນຫາໃນການຊຸກຍູ້ການປັບປຸງ ນະໂຍບາຍເພື່ອບັນລຸແຜນການພັດທະນາການທ່ອງທ່ຽວແບບອະນຸລັກ ແລະ ເພີ່ມທະວີຄວາມຮູ້ຄວາມເຂົ້າໃຈກ່ຽວກັບມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມອາຊຽນ ແລະ ມາດຕະຖານເຮືອນພັກແຮມຂອງບັນດາພາກສ່ວນກ່ຽວຂ້ອງຂອງແຂວງຈຳປາສັກ”.

ທ່ານ ໂສມ ບຸດຕາກຸນ, ຮອງເຈົ້າແຂວງໆຈຳປາສັກ, ໃຫ້ຮູ້ວ່າ: “ການທ່ອງທ່ຽວ ຖືເປັນຂະແໜງການໜຶ່ງທີ່ສຳຄັນ ໃນການພັດທະນາເສດຖະກິດ-ສັງຄົມຂອງແຂວງຈຳປາສັກ, ເຊິ່ງແຂວງຈໍາປາສັກນີ້ ມີທ່າໄດ້ປຽບໃນການພັດທະນາ ການທ່ອງທ່ຽວແບບປະຊາຊົນມີສ່ວນຮ່ວມ”. ທ່ານຍັງກ່າວຕື່ມອີກວ່າ: ກອງປະຊຸມດັ່ງກ່າວຖືເປັນຂີດໝາຍສຳຄັນ ໃນການເພີ່ມທະວີການພັດທະນາການທ່ອງທ່ຽວແບບອະນຸລັກໃນ ສປປ ລາວ, ໂດຍສະເພາະແມ່ນຈະເພີ່ມຄວາມຮັບຮູ້ ໃຫ້ປະຊາຊົນທ້ອງຖິ່ນກ່ຽວກັບເງື່ອນໄຂ ແລະ ລະບຽບການທີ່ຈຳເປັນເພື່ອບັນລຸມາດຕະຖານການທ່ອງທ່ຽວແບບອະນຸລັກຂອງພາກພື້ນ. ດັ່ງນັ້ນ, ການປັບປຸງຄຸນນະພາບ ແລະ ການບໍລິການຂອງທຸລະກິດທ່ອງທ່ຽວພາຍໃນທ້ອງຖິ່ນໃຫ້ແທດເໝາະກັບຄວາມຕ້ອງການຂອງຕະຫຼາດ, ປະກອບສ່ວນເພີ່ມລາຍຮັບ ແລະ ຍົກສູງຄຸນນະພາບຊີວິດໃຫ້ແກ່ວິສາຫະກິດ SMEs ຂອງ ແຂວງຈໍາປາສັກ ຈຶ່ງເປັນສິ່ງທີ່ສໍາຄັນ.

ທ່ານ ເມວວິນ ສະເປນສ, ຫົວໜ້າໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ອົງການພັດທະນາສາກົນ ຂອງສະຫະລັດອາເມລິກາ (USAID LBE), ໄດ້ກ່າວວ່າ: “ຂະແໜງການທ່ອງທ່ຽວມີບົດບາດສໍາຄັນຕໍ່ເສດຖະກິດຂອງລາວ. ການຂະຫຍາຍການທ່ອງທ່ຽວແບບອະນຸລັກ ແລະ ການປົກປັກຮັກສາມໍລະດົກວັດທະນະທໍາອັນດີງາມ, ລວມໄປເຖິງການປົກປັກຮັກສາ ສິ່ງແວດລ້ອມ, ເຊິ່ງຕ້ອງໄດ້ຮຽກຮ້ອງໃຫ້ທຸກພາກສ່ວນປະກອບສ່ວນຢ່າງຕັ້ງໜ້າ. ທ່ານຍັງກ່າວຕື່ມອີກວ່າ: “ການສ້າງຄວາມເຂົ້າໃຈ ແລະ ການບັນລຸມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມອາຊຽນ ແລະ ມາດຕະຖານເຮືອນພັກແຮມ ໄດ້ປະກອບສ່ວນເຂົ້າໃນການພັດທະນາ ການທ່ອງທ່ຽວແບບອະນຸລັກ ແລະ ເປີດໂອກາດໃຫ້ປະຊາຊົນທ້ອງຖິ່ນສາມາດເຂົ້າຮ່ວມໄດ້ໂດຍກົງ, ເຊິ່ງຈະສາມາດນຳລາຍໄດ້ລົງສູ່ຮາກຖານ ແລະ ຮັບປະກັນລາຍຮັບຈາກການທ່ອງທ່ຽວໃຫ້ກວ້າງຂວາງທົ່ວຊຸມຊົນກໍຄືທົ່ວປະເທດລາວ.

ອົງການພັດທະນາສາກົນຂອງສະຫະລັດອາເມລິກາ ໂດຍຜ່ານໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos) ຊ່ວຍເຫຼືອລັດຖະບານລາວ ປັບປຸງສະພາບການລົງທຶນ ແລະ ການຄ້າ ແລະ ຍົກສູງຄວາມສາມາດໃນການແຂ່ງຂັນຂອງວິສາຫະກິດຂະໜາດນ້ອຍ ແລະ ກາງ.