ກອງປະຊຸມກວດກາຄວາມສອດຄ່ອງ ທາງດ້ານກົດໝາຍ ຂອງຮ່າງກົດໝາຍ ວ່າດ້ວຍວິສາຫະກິດ ສະບັບປັບປຸງ ປີ 2013.
ນະຄອນຫຼວງວຽງຈັນ, ວັນທີ 4 ສິງຫາ 2022, ກະຊວງຍຸຕິທໍາ ໄດ້ເປັນເຈົ້າການຈັດກອງປະຊຸມ ຮ່ວມກັບ ກົມທະບຽນ ແລະ ຄຸ້ມຄອງວິສາຫະກິດ, ກະຊວງອຸດສາຫະກໍາ ແລະ ການຄ້າ (ອຄ), ຈຸດປະສົງຂອງກອງປະຊຸມ ເພື່ອຄົ້ນຄວ້າ, ປືກສາຫາລື ແລະ ປະກອບຄໍາຄິດ, ຄໍາເຫັນໃສ່ ຮ່າງກົດໝາຍວ່າດ້ວຍວິສາຫະກິດສະບັບປັບປຸງ ປີ 2013 ເພື່ອກວດກາຄວາມສອດຄ່ອງທາງດ້ານກົດໝາຍ ຂອງຮ່າງກົດໝາຍສະບັບດັ່ງກ່າວ ພາຍໃຕ້ການເປັນປະທານຂອງ ທ່ານ ກົງຈີ ຢາງຈື່, ຮອງລັດຖະມົນຕີ ກະຊວງຍຸຕິທໍາ. ກອງປະຊຸມດັ່ງກ່າວ ມີຕາງໜ້າຈາກພາກສ່ວນກ່ຽວຂ້ອງເຂົ້າຮ່ວມຫລາຍກວ່າ 30 ທ່ານ ໂດຍມີ ຫົວໜ້າກົມ ກົດໝາຍ, ຮອງຫົວໜ້າກົມກົດໝາຍ, ຫົວໜ້າພະແນກ, ຮອງຫົວໜ້າພະແນກ ແລະ ວິຊາການທີ່ກ່ຽວຂ້ອງ ຈາກ ກົມກົດໝາຍ ກະຊວງຍຸຕິທໍາ, ຫົວໜ້າກົມ, ຮອງຫົວໜ້າກົມ ແລະ ກອງເລຂາປັບປຸງກົດໝາຍວິສາຫະກິດ ຂອງກົມທະບຽນ ແລະ ຄຸ້ມຄອງວິສາຫະກິດ, ຜູ້ຊົງຄຸນວຸດທິ, ຜູ້ຕາງໜ້າຈາກ ສະພາແຫ່ງຊາດ, ສໍານັກງານນາຍົກລັດຖະມົນຕີ, ກະຊວງແຜນການ ແລະ ການລົງທຶນ.
ໃນພິທີເປີດກອງປະຊຸມ, ທ່ານ ກົງຈີ ຢາງຈື່, ຮອງລັດຖະມົນຕີ ກະຊວງຍຸຕິທໍາ ໄດ້ກ່າວຈຸດປະສົງຂອງກອງປະຊຸມດັ່ງນີ້: ເພື່ອກວດກາຄວາມສອດຄ່ອງທາງດ້ານກົດໝາຍ ຂອງຮ່າງກົດໝາຍວ່າດ້ວຍວິສາຫະກິດ ສະບັບປັບປຸງ ປີ 2013 ເພື່ອດໍາເນີນການຕາມຂັ້ນຕອນການປັບປຸງຮ່າງກົດໝາຍ ຕາມກົດໝາຍວ່າດ້ວຍການສ້າງນິຕິກໍາ. ຮ່າງກົດໝາຍສະບັບດັ່ງກ່າວ ໄດ້ປັບປຸງຂົງເຂດຕົ້ນຕໍຄື: 1. ຂັ້ນຕອນການເລີ່ມຕົ້ນທຸລະກິດເປັນຕົ້ນແມ່ນການຂຶ້ນທະບຽນວິສາຫະກິດ ໃຫ້ມີຄວາມສະດວກ, ກະທັດຮັດ ແລະ ວ່ອງໄວ. ພາຍຫຼັງຂຶ້ນທະບຽນວິສາຫະກິດ (ສ່ວນບຸກຄົນ ແລະ ນິຕິບຸກຄົນ) ແລ້ວ, ກ່ອນຈະດໍາເນີນທຸລະກິດໃດໜຶ່ງນັ້ນ ຕ້ອງໄດ້ຂໍອະນຸຍາດດໍາເນີນທຸລະກິດນໍາຂະແໜງການກ່ຽວຂ້ອງ, ເຊິ່ງປະເດັນດັ່ງກ່າວ ແມ່ນຕິດພັນກັບການກ້າວເຂົ້າສູ່ ການຂຶ້ນທະບຽນວິສາຫະກິດແບບອອນລາຍ; 2. ປັບປຸງບາງປະເດັນທີ່ຕິດພັນກັບການປົກປ້ອງຜູ້ລົງທຶນລາຍຍ່ອຍ; 3. ການແບ່ງພາລະບົດບາດໃນການຄຸ້ມຄອງລະຫວ່າງຂະແໜງອຸດສາຫະກໍາ ແລະ ການຄ້າໃນນາມຜູ້ອອກໃບທະບຽນວິສາຫະກິດ ແລະ ຂະແໜງການທີ່ກ່ຽວຂ້ອງໃນນາມຜູ້ອອກໃບອະນຸຍາດດໍາເນີນທຸລະກິດ; ແລະ 4. ປັບປຸງ 10 ປະເດັນທີ່ຕິດພັນກັບບັນຫາການຈັດຕັ້ງປະຕິບັດ.
ກອງປະຊຸມໄດ້ດໍາເນີນເປັນເວລາ 3 ວັນ ແລະ ປະທານກອງປະຊຸມໄດ້ມອບໃຫ້ກອງເລຂາປັບປຸງກົດ ໝາຍເບິ່ງຄືນ ມາດຕາທີ່ອ້າງອີງເຖິງ, ເນື້ອໃນບາງປະເດັນ ແລະ ນໍາເອົາເນື້ອໃນທີ່ໄດ້ຮຽບຮຽງລາຍງານຄະນະນໍາຂອງຕົນ ພ້ອມດ້ວຍຂໍທິດຊີ້ນໍາໃນບາງຈຸດ ທີ່ຍັງບໍ່ທັນໄດ້ເປັນເອກະພາບ, ຈາກນັ້ນ ສົ່ງຄືນໃຫ້ກະຊວງຍຸຕິທໍາ ເພື່ອສະເໜີຕໍ່ກອງປະຊຸມລັດຖະບານ ໃນທ້າຍເດືອນສິງຫານີ້.
ກອງປະຊຸມດັ່ງກ່າວ ໄດ້ຮັບການສະໜັບສະໜູນໂດຍ ໂຄງການ ສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT) ເຊິ່ງເປັນໂຄງການທີ່ຈັດຕັ້ງປະຕິບັດພາຍໃຕ້ ກົມແຜນການ ແລະ ການຮ່ວມມື, ກະຊວງ ອຸດສາຫະກໍາ ແລະ ການຄ້າ, ໂດຍໄດ້ຮັບການປະກອບທຶນຮ່ວມ ເຂົ້າກອງທຶນສົບທົບຫຼາຍຝ່າຍ ໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
