ກອງປະຊຸມປຶກສາຫາລືດ້ານວິຊາການ ລະຫວ່າງ ພະແນກຄຸ້ມຄອງ ການຈັດຕັ້ງປະຕິບັດໂຄງການຊ່ວຍເຫຼືອຂອງຕ່າງປະເທດ (NIU) ແລະ ພາກສ່ວນຈັດຕັ້ງປະຕິບັດໂຄງການ (IAs)
ວັງວຽງ ວັນທີ 25-26 ສິງຫາ 2022. ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມປຶກສາຫາລື ດ້ານວິຊາການ ລະຫວ່າງພະແນກພະແນກຄຸ້ມຄອງການຈັດຕັ້ງປະຕິບັດໂຄງການຊ່ວຍເຫຼືອຂອງຕ່າງປະເທດ ແລະ ພາກສ່ວນຈັດຕັ້ງປະຕິບັດໂຄງການ ພາຍໃຕ້ການເປັນປະທານຂອງທ່ານ ປອ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມດ້ວຍຜູ້ເຂົ້າຮ່ວມຈຳນວນ 60 ກ່ວາທ່ານ ເຊິ່ງເປັນຕົວແທນຈາກ ພະແນກ NIU ແລະ ບັນດາພາກສ່ວນຈັດຕັ້ງປະຕິບັດໂຄງການ ຈາກພາກສ່ວນທີ່ກ່ຽວຂ້ອງເຂົ້າຮ່ວມ
ກອງປະຊຸມດັ່ງກ່າວໄດ້ດຳເນີນໄປເປັນເວລາສອງມື້ ໂດຍເນັ້ນໃສ່ການນຳສະເໜີ ກ່ຽວກັບຜົນໄດ້ຮັບຕົ້ນຕໍ ແລະ ສິ່ງທ້າທາຍທີ່ພົບພໍ້ໃນເວລາການຈັດຕັ້ງປະຕິບັດໂຄງການ LCT, ນຳສະເໜີກ່ຽວກັບ ຕົວຊີ້ວັດໝາກຜົນໄດ້ຮັບຂອງໂຄງການ LCT, ແຜນຈັດຕັ້ງປະຕິບັດວຽກງານບົດບາດຍິງ-ຊາຍ, ລະບຽບການສຳຄັນໃນການຄຸ້ມຄອງການເງິນ ສຳລັບໂຄງການທີ່ບໍລິຫານທຶນ ແລະ ລະບຽບການສຳຄັນໃນການຈັດຊື້-ຈັດຈ້າງ ສຳລັບໂຄງການທີ່ບໍລິຫານທຶນໂດຍທະນາ ຄານໂລກ.
ທ່ານ ປອ ມະໂນທອງ ວົງໄຊ ໄດ້ກ່າວວ່າ “ເຖິງວ່າໃນໄລຍະ ສອງປິຜ່ານມາ ພວກເຮົາໄດ້ປະເຊີນກັບ ສິ່ງທ້າທາຍຫຼາຍຢ່າງ ເຊິ່ງລວມທັງ ການແຜ່ລະບາດຂອງພະຍາດ ໂຄວິດ 19 ຢູ່ພາຍໃນປະເທດ ແລະ ທົ່ວໂລກ ແລະ ສະພາບຂໍ້ຫຍຸ້ງຍາກດ້ານເສດຖະກິດ ທີ່ກຳລັງປະເຊີນໃນປະຈຸບັນ, ຍ້ອນຄວາມພະຍາຍາມ ແລະ ຄວາມເອົາໃຈໃສ່ ຂອງທຸກພາກສ່ວນກ່ຽວຂ້ອງ ຈາກພາກລັດ ແລະ ເອກະຊົນ, ໂຄງການຂອງພວກເຮົາສາມາດມີໝາກຜົນທີ່ພົ້ນເດັ່ນຈຳນວນໜຶ່ງໃນແຕ່ລະເສົາຄໍ້າ, ໄດ້ມີລະບົບຄຸ້ມຄອງບໍລິຫານ ແລະ ການປະສານງານ ທີ່ເພິ່ງພໍໃຈ, ພວກເຮົາຈຶ່ງສາມາດຍາດແຍ່ງທຶນຊ່ວຍເຫຼືອເພີ່ມເຕີມ ເປັນຈຳນວນ 6,5 ລ້ານໂດລາສະຫະລັດ. ສິ່ງນີ້ກໍ່ເປັນການຊີ້ບອກເຖິງ ຄວາມເຊື່ອໝັ້ນ ທີ່ຜູ້ໃຫ້ທຶນ ແລະ ຄະນະນຳຂອງກະຊວງພວກເຮົາ ມີຕໍ່ທ່າແຮງຂອງໂຄງການ”
ໂຄງການ LCT ເປັນໂຄງການຊ່ວຍເຫຼືອດ້ານວິຊາການ ທີ່ມີເປົ້າໝາຍສົ່ງເສີມໃຫ້ທຸລະກິດພາກເອກະຊົນລາວເຕີບໃຫຍ່ຂະຫຍາຍຕົວຢ່າງຍືນຍົງ ໂດຍການປັບປຸງສະພາບແວດລ້ອມການດຳເນີນທຸລະກິດ ທີ່ສຸມໃສ່ ການຈັດຕັ້ງປະຕິບັດຄຳສັ່ງ ນາຍົກເລກທີ 02 ວ່າດ້ວຍການປັບປຸງ ບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດຢູ່ ສປປ ລາວ, ແລະ ຄຳສັ່ງ ນາຍົກ ເລກທີ 03 ວ່າດ້ວຍການປັບປຸງ ວຽກງານການບໍລິການອອກໃບອະນຸຍາດລົງທຶນ ແລະ ໃບອະນຸຍາດດຳເນີນທຸລະກິດ ພ້ອມທັງໃຫ້ການສະໜັບສະໜູນດ້ານວິຊາການຢ່າງຄົບຊຸດ ເພື່ອປັບປຸງຂະບວນການກໍ່ຕັ້ງທຸລະກິດ, ລວມທັງການສ້າງລະບົບຂື້ນທະບຽນວິສາຫະກິດ ຜ່ານເອເລັກໂຕຣນິກ ຫລື ອອນລາຍ, ການປັບປຸງຂັ້ນຕອນການອອກອະນຸຍາດດຳເນີນທຸລະກິດ ລວມເຖິງການສ້າງເວັບໄຊ້ຖານຂໍ້ມູນບັນດາໃບອະນຸຍາດດຳເນີນທຸລະກິດ ແລະ ການປັບປຸງບາງຕົວຊີ້ວັດຂອງບົດລາຍງານການດຳເນີນທຸລະກິດຂອງກຸ່ມທະນາຄານໂລກ ທີ່ປະເມີນລະບຽບການຄຸ້ມຄອງແຕ່ລະໄລຍະ ຂອງວົງຈອນການດຳເນີນທຸລະກິດ ແລະ ຈັດອັນດັບຂອງບັນດາປະເທດ ຕາມຄວາມສະດວກ ແລະ ງ່າຍດາຍໃນການດຳເນີນທຸລະກິດ ດ້ວຍການພິຈາລະນາໃຫ້ທຶນຊ່ວຍເຫຼືອດ້ານວິຊາການ ອີງຕາມບົດສະເໜີໂຄງການຂອງໜ່ວຍງານທີ່ຮັບຜິດຊອບປັບປຸງຕົວຊີ້ວັດໃດໜຶ່ງ
ນອກຈາກວຽກງານປັບປຸງສະພາບແວດລ້ອມການດຳເນີນທຸລະກິດ ເຊິ່ງເປັນປັດໃຈພາຍນອກ ທີ່ຢູ່ເໜືອການຄວບຄຸມທຸລະກິດແລ້ວ, ໂຄງການ LCT ຍັງໄດ້ໃຫ້ການຊ່ວຍເຫຼືອ ແລະ ສະໜັບສະໜູນແກ່ບັນດາຫົວໜ່ວຍທຸລະກິດ ທີ່ມີຄວາມສົນໃຈປັບປຸງ ແລະ ຂະຫຍາຍທຸລະກິດຂອງຕົນ ຜ່ານທຶນສົມທົບທີ່ເອີ້ນວ່າ Business Assitance Facility ໄລຍະສອງ ຫຼື BAF II ເພື່ອຊຸກຍູ້ໃຫ້ທຸລະກິດລາວ ປັບປຸງຂີດຄວາມສາມາດ ການແຂ່ງຂັນຂອງຕົນ ໂດຍນຳໃຊ້ການບໍລິການດ້ານການພັດທະນາທຸລະກິດ (Business development services) ຈາກພາຍນອກ ພາຍໃຕ້ເງື່ອນໄຂທີ່ໂຄງການຈ່າຍຄ່າບໍລິການດ້ານວິຊາການ 50% ຂອງມູນຄ່າທັງໝົດ. ນອກນັ້ນ, ໂຄງການຍັງໄດ້ ສະໜັບສະໜູນ ຢ່າງເຕັມຮູບແບບແກ່ ສະພາການຄ້າ ແລະ ອຸດສາຫະກຳແຫ່ງຊາດລາວ ໃນການຈັດຕັ້ງປະຕິບັດກົນໄກປຶກສາຫາລືລະຫວ່າງ ພາກລັດ ແລະ ທຸລະກິດ ພາຍໃຕ້ກອງປະຊຸມທຸລະກິດລາວ ແນໃສ່ປັບປຸງປະສິດທິພາບຂອງການແກ້ໄຂບັນຫາຮີບດ່ວນ ທີ່ກະທົບຫຼື ກົດນ່ວງການກໍ່ຕັ້ງ, ດຳເນີນ, ແລະ ການຂະຫຍາຍທຸລະກິດ ຜ່ານຂະບວນການປຶກສາຫາລື ຢ່າງເປັນລະບົບ.
ໃນມື້ທີ່ສອງຂອງກອງປະຊຸມ ບັນດາຜູ້ເຂົ້າຮ່ວມ ໄດ້ພ້ອມກັນເຂົ້າຮ່ວມການຝຶກອົບຮົມກ່ຽວກັບລະລະບຽບການໃນການຄຸ້ມຄອງການເງິນ ສຳລັບໂຄງການທີ່ບໍລິຫານທຶນ ແລະ ລະບຽບການໃນການຈັດຊື້-ຈັດຈ້າງ ສຳລັບໂຄງການທີ່ບໍລິຫານທຶນໂດຍທະນາ ຄານໂລກ ແລະ ພ້ອມກັນເຮັດບົດກໍລະນີສຶກສາຂອງວຽກງານດັ່ງກ່າວ.
ໂຄງການ LCT ເປັນໂຄງການທີ່ຈັດຕັ້ງປະຕິບັດພາຍໃຕ້ ກົມແຜນການ ແລະ ການຮ່ວມມື, ກະຊວງ ອຸດສາຫະກໍາ ແລະ ການຄ້າ, ໂດຍໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
