ກະຊວງອຸດສາຫະກຳ ແລະ ການຄ້າ ຈັດກອງປະຊຸມທົບທວນຄືນ ການຈັດຕັ້ງປະຕິບັດ ຂອງໂຄງການສ້າງສະພາບແວດລ້ອມ ທີ່ເອື້ອອຳນວຍຕໍ່ທຸລະກິດລາວ (USAID LBE) ຄັ້ງທີ 5.
ແຂວງຈໍາປາສັກ, ວັນທີ 06 ທັນວາ 2022, ກະຊວງອຸດສາຫະກຳ ແລະ ການຄ້າ (ອຄ) ແລະ ອົງການພັດທະນາສາກົນສະຫະລັດອາເມລິກາ ປະຈໍາ ສປປ ລາວ (USAID) ຈັດກອງປະຊຸມທົບທວນຄືນການຈັດຕັ້ງປະຕິບັດຂອງໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ຄັ້ງທີ 5 ຂຶ້ນ ທີ່ ໂຮງແຮມຈໍາປາສັກແກຣນ, ແຂວງຈໍາປາສັກ. ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ແມ່ນໂຄງການ 5 ປີ ທີ່ສະໜັບສະໜູນລັດຖະບານຂອງ ສປປ ລາວ ແລະ ພາກທຸລະກິດ ໃນການສົ່ງເສີມການຄ້າ ແລະ ການລົງທຶນ ແລະ ການສ້າງຂີດຄວາມສາມາດໃຫ້ແກ່ພາກເອກະຊົນ.
ກອງປະຊຸມດັ່ງກ່າວ ໄດ້ຮັບກຽດເປັນປະທານຮ່ວມ ໂດຍ ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານ ໄມເຄິລ ຣອນນິ່ງ, ຜູ້ຕາງໜ້າອົງການພັດທະນາສາກົນສະຫະລັດອາເມລິກາ ປະຈໍາ ສປປ ລາວ. ກອງປະຊຸມດັ່ງກ່າວ ຈັດຂຶ້ນແບບເຊິ່ງໜ້າ ແລະ ຜ່ານລະບົບທາງໄກ ຊຶ່ງມີຜູ້ເຂົ້າຮ່ວມຈາກບັນດາຈຸດປະສານງານຫຼັກຂອງລັດຖະບານ, ກົມວິຊາການທີ່ກ່ຽວຂ້ອງຂອງໂຄງການ ແລະ ຄູ່ຮ່ວມພັດທະນາ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອທົບທວນຄືນ ແລະ ປະເມີນຜົນຂອງການຈັດຕັ້ງປະຕິບັດໂຄງການ ໃນໄລຍະ ປີ 2022 ແລະ ປຶກສາຫາລື ກ່ຽວກັບ ແຜນວຽກຂອງໂຄງການ ສຳລັບໄລຍະ ປີ 2023. ມາຮອດປະຈຸບັນ, ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ໄດ້ບັນລຸຜົນສຳເລັດອັນສໍາຄັນ ລວມມີ ການສ້າງດໍາລັດ ວ່າດ້ວຍ ຫ້ອງການໄກ່ເກ່ຍຂໍ້ຂັດແຍ່ງທາງດ້ານເສດຖະກິດເອກະຊົນ, ການສ້າງແອັບ SMARTUP ຊຶ່ງເປັນຊ່ອງທາງການຮຽນຮູ້ແບບດິຈິຕອລ ກ່ຽວກັບ ວິທີການດຳເນີນທຸລະກິດ ສຳລັບ SME ແລະ ການຈັດຕັ້ງປະຕິບັດກົນໄກການປຶກສາຫາລື ລະຫວ່າງ ພາກລັດ-ພາກທຸລະກິດ ຢູ່ແຂວງ ຈຳປາສັກ.
ໃນພິທີເປີດກອງປະຊຸມ, ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ ສະແດງຄວາມຂອບໃຈຢ່າງຈິງໃຈ ຕໍ່ອົງການ USAID ຕໍ່ການສະໜັບສະໜູນອັນຍາວນານ ໃນການປັບປຸງສະພາບແວດລ້ອມໃນການດຳເນີນທຸລະກິດ ແລະ ສົ່ງເສີມການລົງທຶນໃນໄລຍະທົດສະວັດທີ່ຜ່ານມາ. ທ່ານກ່າວວ່າ “ໂຄງການ USAID LBE ໄດ້ປະກອບສ່ວນອັນສຳຄັນເຂົ້າໃນການຈັດຕັ້ງປະຕິບັດບັນດາບູລິມະສິດຂອງ ສປປ ລາວ ໃນການພັດທະນາພາກເອກະຊົນ ພາຍຫຼັງການແຜ່ລະບາດຂອງພະຍາດໂຄວິດ. ໂຄງການ ໄດ້ບັນລຸຜົນສຳເລັດອັນເປັນຮຸບປະທຳ ໃນການສ້າງຄວາມສາມາດໃຫ້ຫົວໜ່ວຍທຸລະກິດໃນຂະແໜງທ່ອງທ່ຽວ ແລະ ຫັດຖະກຳ”.
ທ່ານ ໄມເຄິລ ຣອນນິ່ງ, ຜູ້ຕາງໜ້າອົງການພັດທະນາສາກົນສະຫະລັດອາເມລິກາ ປະຈໍາ ສປປ ລາວ ໄດ້ເນັ້ນຢ້ຳການຮ່ວມມືອັນແໜ້ນແຟ້ນ ລະຫວ່າງ USAID ແລະ ກະຊວງ ອຄ. “ພ້ອມນັ້ນ, ເຫັນວ່າໂຄງການ ມີຄວາມຄືບໜ້າ ພ້ອມທັງໄດ້ຮັບຜົນສຳເລັດອັນສຳຄັນ ຊຶ່ງເປັນຜົນມາຈາກການສະໜັບສະໜູນຂອງກະຊວງ ອຄ ແລະ ບັນດາພາກທຸລະກິດ. ໃນໄລຍະປີທີ 4, ພວກເຮົາ ຈະສືບຕໍ່ສ້າງຜົນສຳເລັດທີ່ເປັນຮຸບປະທຳໃຫ້ແກ່ບັນດາຫົວໜ່ວຍທຸລະກິດ. USAID ຈະສືບຕໍ່ຍຶດໝັ້ນໃນການຊ່ວຍເຫຼືອ ສປປ ລາວ ເພື່ອປັບປຸງສະພາບແວດລ້ອມໃນການດຳເນີນທຸລະກິດ ແລະ ສົ່ງເສີມການຄ້າ ແລະ ການລົງທຶນ ແລະ ຟື້ນຄືນເສດຖະກິດຂອງ ສປປ ລາວ”.
ບົດລາຍງານຄວາມຄືບໜ້າໃນການຈັດຕັ້ງປະຕິບັດແຜນວຽກປີ 2022 ຂອງໂຄງການ USAID LBE ແມ່ນໄດ້ຖືກນຳສະເໜີໂດຍ ບັນດາກົມວິຊາການທີ່ກ່ຽວຂ້ອງ ຂອງໂຄງການຄື: ກົມສົ່ງເສີມວິສາຫະກິດຂະໜາດນ້ອຍ ແລະ ກາງ; ສະພາການຄ້າ ແລະ ອຸດສາຫະກຳແຫ່ງຊາດລາວ; ແລະ ກົມນະໂຍບາຍການຄ້າຕ່າງປະເທດ. ນອກນັ້ນ, ກອງປະຊຸມ ກໍໄດ້ຮັບຟັງການນໍາສະເໜີແຜນວຽກຂອງໂຄງການ USAID LBE ສຳລັບປີ 2023.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ໄດ້ໃຫ້ການຊ່ວຍເຫຼືອລັດຖະບານລາວ ໃນການຍົກລະດັບຄວາມສາມາດດ້ານແຂ່ງຂັນຂອງວິສາຫະກິດຂະໜາດນ້ອຍ ແລະ ກາງ ພ້ອມທັງປັບປຸງສະພາບແວດລ້ອມໃນການດຳເນີນທຸລະກິດຂອງປະເທດ.
