ພິທີເຊັນບົດບັນທຶກຄວາມເຂົ້າໃຈ ເພື່ອຈັດຕັ້ງປະຕິບັດໂຄງການ ຂະແໜງຫັດຖະກຳຢູ່ 3 ແຂວງພາກເໜືອ
ນະຄອນຫຼວງພະບາງ ວັນທີ 18 ມັກອນ 2023, ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ ຮ່ວມມືກັບສູນຫັດຖະກຳ ອອກ ພົບ ຕົກ ເພື່ອຈັດພິທີເຊັນບົດບັນທຶກຄວາມເຂົ້າໃຈ ເພື່ອຈັດຕັ້ງປະຕິບັດໂຄງການ ສົ່ງເສີມຂະແໜງຫັດຖະກຳຢູ່ 3 ແຂວງພາກເໜືອ (ຫຼວງນ້ຳທາ, ອຸດົມໄຊ ແລະ ຜົ້ງສາລີ) ພາຍໃຕ້ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ 3 ແຂວງພາກເໜືອ.
ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື ໃນນາມຊີ້ນຳພະແນກຄຸ້ມຄອງຈັດຕັ້ງປະຕິບັດ ໂຄງການຊ່ວຍເຫຼືອຂອງຕ່າງປະເທດ ໂດຍໄດ້ຮັບການແຕ່ງຕັ້ງຈາກທ່ານ ມະໂນທອງ ວົງໄຊ, ຮອງລັດຖະມົນຕີກະຊວງ ອຸດສາຫະກຳ ແລະ ການຄ້າ, ຜູ້ປະສານງານໂຄງການປະຈຳ ສປປ ລາວ, ເຊັນບົດບັນທືກຄວາມເຂົ້າໃຈຮ່ວມກັບທ່ານນາງ ແວວມະນີ ດວງດາລາ ປະທານສູນຫັດຖະກຳ ອອກ ພົບ ຕົກ ໂດຍມີຕາງໜ້າຈາກພະແນກ ອຸດສາຫະກຳ ແລະ ການຄ້າແຂວງ ທັງ 3 ແຂວງ ເຂົ້າຮ່ວມເປັນສັກຂີພະຍານ ໃນການສະໜັບສະໜູນ 6 ບ້ານຫັດຖະກຳເປົ້າໝາຍ.
ຕະຫຼອດໄລຍະ 32 ເດືອນຜ່ານມາ ທັງສອງຝ່າຍໄດ້ຮ່ວມມືກັນ ສົ່ງເສີມຜູ້ຜະລິດສິນຄ້າຫັດຖະກຳຫຼາຍກ່ວາ 120 ຄົວເຮືອນ ເຊິ່ງໃນນັ້ນປະກອບດ້ວຍແມ່ຍິງ 80%. ຜູ້ເຂົ້າຮ່ວມໄດ້ຫ້າວຫັນເຂົ້າຮ່ວມກິດຈະກຳໂຄງການຢ່າງຕັ້ງໜ້າ ໂດຍສະເພາະແມ່ນການຝຶກອົບຮົມ ວິຊາການ ແລະ ການອອກຕະຫຼາດນັດ ເຊິ່ງສະມາດສ້າງລາຍຮັບເພີ່ມໃຫ້ກັບຄົວເຮືອນປະມານ 19% ຂອງລາຍຮັບປະຈຳປີ.
ອີງໃສ່ຜົນຂອງການຈັດຕັ້ງປະຕິບັດໂຄງການໃນໄລຍະຜ່ານມາ ແລະ ທ່າແຮງບົ່ມຊ້ອນຂອງທັງ 3 ແຂວງ, ໂຄງການໄດ້ພິຈາລະນາ ສືບຕໍ່ສົ່ງເສີມຂະແໜງຫັດຖະກຳແຜ່ນແພ ອີກຕື່ມ 9 ເດືອນ ແຕ່ເດືອນມັງກອນ ຮອດເດືອນ ກັນຍາ 2023 ໂດຍແນໃສ່ເພີ່ມຈຳນວນຜູ້ເຂົ້າຮ່ວມໂຄງການໃຫ້ໄດ້ອີກ 20% ແລະ ນຳພາຜູ້ຜະລິດສິນຄ້າຢ່າງໜ້ອຍ 15 ຜະລິດຕະພັນເຂົ້າຮ່ວມງານຕະຫຼາດນັດ ຫຼື ກິດຈະກຳຊອກຫາຕະຫຼາດອື່ນໆ. ບັນດາເປົ້າໝາຍເຫຼົ່ານີ້ ຈະສຳເລັດຜົນໄດ້ກໍ່ຍ້ອນໄດ້ຮັບຄວາມເອົາໃຈໃສ່ສະໜັບສະໜູນ ແລະ ປະສານງານຈາກໜ່ວຍງານປະສານງານໂຄງການປະຈຳແຂວງ ກໍຄື ພະແນກອຸດສາຫະກຳ ແລະ ການຄ້າແຂວງ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງເປັນໂຄງການທີ່ໄດ້ຮັບການສະໜັບສະໜູນໂດຍ ກອບເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ ( Enhanced Integrated Framework – EIF). ໂຄງການດັ່ງກ່າວແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາ ບັນດາແຂວງພາກເໜືອ ດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມ ທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
